Illoqarfiit pingaarnersaata kommuniani isumaqatigiinniarnerit ingerlalluarput
Ataatsimiinnerpassuit oqarasuaatikkullu oqaloqatigiinnerit suli amerlanerusut ilaatigut peqqutigalugit Kommuneqarfik Sermersuumi suleqatigiinnissamik isumaqatigiissut sivisuumik suliarineqarpoq, taamaattoqarnerali kommunerujussuarmi takornartaanngilaq. 2008-mi qinersinerup kingorna suut isumaqatigiissutigineqarsimanersut kikkullu ataatsimiititaliani assigiinngitsuni inissinnersut sapaatit akunneri marluk qaangiunnerini aatsaat innuttaasunut tusarliunneqarput.
-Suli naammassinngilagut, kisianni naammassinissarput qanittuararsuuvoq. Maannakkorpiaq allamik oqarsinnaanngikkallarpunga. Inuit sorliit sumut inissinneqarnissaat tikitsinnagu suleqatigiinnissamik isumaqatigiissut naammassivillugu isumaqatigiinniutiginissaa toqqarsimavarput. Taamaaliornikkut ataatsimiititaliat assigiinngitsut inuttalersunnginnerini ilisimasariaqakkagut inissereerniarlutigit, Anda Uldum Demokraatineersoq oqarpoq.
Avataanit isigalugu Uldum borgmesterip tulliatut siullertut inissinnissaa ilimanarluinnarpoq, Martha Abelsenillu Siumumeersup borgmesterip tulliata aappaatut ingerlaqqissanersoq imaluunniit allamik toqqaasoqassanersoq piffissap takutikkumaarpaa. Tamannalu pillugu maanna borgmesteriusoq borgmesteritullu ingerlaqqittussaq oqaaseqarusuppallaanngilaq.
-Avammut tusarliussaqannginnitsinni isumaqatigiissutigisarput kommunimi immikkoortortaqarfitsinni assigiinngitsuni akueriteqqaartussaavarput. IA Nuummi, Paamiuni, Ittoqqortoormiini Tasiilamilu immikkoortortaqarfeqarpoq, taakku isumaqatigiissummik avammut saqqummiussaqanngitsinni akuerseqqaartussaapput. Isumaqatigiinniarnittali ingerlalluarnerat pitsaasumillu oqaloqatigiittarnerput oqaluttuariinnarsinnaavara. Isumaqatigiinniarnerit pitsaanerpaamik angusaqarfiunissaat partiit marluulluta anersaaralugu ingerlatsivugut, taamaalilluta ukiuni aggersuni malitassaqarluaqqulluta. Isumaqatigiissutilli piffissap ingerlanerani iluarsillattaarneqarsinnaanera ilimanarpoq, Asii Chamnitz Narup knr.gl-imut oqarpoq.
