Illersuisuinik nutaanik ilinniartitsinissamut aningaasaqarniarneq aporfiusoq
- Neriukkaluarsinnaavugummi.
Nunatta illersuisuunera eqqartuussissuserisorlu, Finn Meinel, danskit inatsisinik atuutitsinermut ministeriata Søren Pape Poulsenip (K) aningaasaqarnermullu ministerip Kristian Jensenip (V) Nunatta Illersuisuuneqarfianut aningaasaliissutissanik amerlanerusunik danskit 2019-imut aningaasanut inatsisaatigut nassaarsinnaanissaat pillugu taama oqarpoq.
AAMMA ATUARUK Der er plads til forbedringer
- Aningaasanik amigaateqarneq uppernarsarsinnaavara. Illersuisut tunngaviusumik ilinniartitaanerannik nutaamik aallartitsinissamut aningaasat pigivagut, ilinniarnerli taanna naammassippat illersuisunik amerlasuunik suli amigaateqassaagut, Finn Meinel taama oqarpoq.
Illersuisussat ikinnerpaamik 40-t amigaataasut
Nunatta Illersuisuuneqarfia ukiuni arlalissuarni kinguaattoorutigineqareerluni 2017-imi pilersinneqarpoq, inatsisilerituullu nunatsinni eqqartuussivinni pinerluttulerinermik suliani illersuisutut sulisinnaanngortillugit ilinniartinnissaannik, kiisalu illersuisut ukioq allortarlugu ilinniarteqqittarnissaanni siunertaqarluni.
Nunatsinni illersuisut akuerisat 20-nit ikinnerupput, Nunattalu Illersuisuuneqarfia naapertorlugu illersuisut ikinnerpaamik 60-it pisariaqartinneqarlutik - illersuisullu arlallit ukiut tamaasa suliunnaartarmata amerlanerusinnaapput.
AAMMA ATUARUK Illersuisutut akuerisatut allagartaqalersut nutaat
Aningaasaqarnerli ullumikkutut inissisimatillugu, illersuisunik taama amerlatigisunik ilinniartitsisinnaanissaq qanittumi pisinnaassanngilaq.
Nunatta Illersuisuuneqarfia naalagaaffimmit ukiumut aalajangersimasumik 2 millionit koruuninik aningaasaliiffigineqartarpoq. Danskit inatsisinik atuutsitsinermut ministereqarfia aningaasanut inatsimmi 2018-imit ukiunut tullernut pingasunut nunatsinni eqqartuussiveqarnermut katillugit 40 millionit koruuninik aningaasaliissuteqarpoq.
Aningaasaliissutinillu taakkunannga Nunatta Illersuisuuneqarfia 7,5 millionit koruuninik tunineqarpoq. Taamaattorli Finn Meinel ima isumaqarpoq:
- Uatsinnut aningaasaliissutigineqartut ukiunut sisamanut atugassiaapput, piffissamilu pineqartumi tassani illersuisussatut 20-t ilinniartissinnaavugut, piffissallu taassuma qaangiunnerani 20-t (illersuisut, aaqq.) suli amigaatigissavagut.
Amigaateqarneq sullissinermut sivitsorsaataasartoq
Illersuisut akuerisat ilinniarteqqinneqartarnissaat Nunatta Illersuisuuneqarfiata aamma suliassaraa. Tamatumunngalu aningaasartuutit maannakkorpiaq ukiumut 800.000 koruunit missaanniipput, tunngaviusumilli ilinniartut amerliartortillugit aningaasartuutit aamma amerliartussapput.
Illersuisunillu amigaateqarneq eqqaartuussivinni politiinilu ullumikkut kinguneqareerpoq. Illersuisutullu ilinniarsimasut naammatsinnissaasa tungaanut taamaaginnassasoq, Finn Meinel oqarpoq.
AAMMA ATUARUK Illersuisut amigaatigineqarnerat annertusissagunartoq
- Eqqartuussivinni sulianut sivitsorsaataassaaq, taamatuttaarlu aamma politiini, ilaatigut meeqqanut kannguttaatsuliornermik sulianut atatillugu videukkut killisiuisoqarneranik sulianut. Taamaammat ilungersunartumik kinguneqarpoq.
Nunatta Illersuisuuneqarfiata sulinissamut aningaasat pisariaqartut piginagit 2017-imi pilersinneqarnera Finn Meinelip folketingimullu ilaasortat nunatsinneersut isornartorsiorsimavaat. Taamaammat aningaasanik amerlanerusunik immikkoortitsinissamut Folketingimi politikkikkut piumassuseqartoqarnissaa Meinelip maanna neriuutigaa.
Nunatsinni illersuisuinik amigaateqarneq qaangerneqassappat - amigaataasulluunniit malunnaatilimmik ikilisinniarneqassappata - ikinnerpaamik 7,5 millionit koruunit ilassutissatut pisariaqartinneqarput.
- Ajornartorsiutaasumik saqqummiussannut paasinnittoqarsoraara, aamma inatsisinik atuutitsinermut ministereqarfimmi. Partiilli aningaasanut inatsisissaq pillugu isumaqatigiinniartut akornanni politikkikkut piumassuseqartoqarnissaa pisariaqarpoq, Finn Meinel oqarpoq.
