Illersuisut amigaatigineqarnerat annertusissagunartoq

Sermitsiaq.AG taama allaaserisaqarpoq.

Nunatsinni illersuisutut akuerisatut ilinniartitaanermut nutaamut aningaasat immikkoortinneqartut ikippallaarneri Nunatta illersuisuunerata Finn Meinelip sapaatit akunnerata siuliani mianersoqqussutigaa.

AAMMA ATUARUK Der er plads til forbedringer

Ilinniartitaaneq upernaaru aallartittussaagaluarpoq, aningaasassaqartinneqannginnerali pissutigalugu tamanna pinngitsoortussanngorunarluni.

Danskit naalakkersuisui 2018-imut aningaasanut inatsisissatut siunnersuutiminni Nunatsinni eqqartuussiveqarnerup ukiuni tullerni sisamani ukiumut 10 millionit koruuninik nukittorsarneqarnissaa siunnersuutigigaluarpaat. Illersuisutulli ilinniartitaanermut aningaasartuutissat taakkuninnga matussuserneqarsinnaagunanngillat.

AAMMA ATUARUK Eqqartuussiveqarfiit 40 mio. koruuninik aningaasaliiffigineqarput

Aningaasammi immikkoortinneqartut Nunatsinni eqqartuussiveqarnerup iluani kinguaattooruteqarfiusunut atugassaapput, illersuisutullu ilinniartitaaneq nutaaq 6 millionit koruunit missaannik akeqartussaassalluni, Finn Meinel Sermitsiaq.AG-mut taama oqarpoq.

Inatsisinik atuutitsinermut ministeri Søren Pape Poulsen Folketingimi ilaasortamut Aaja Chemnitz Larsenimut akissutimini ima allappoq:

- Aningaasat eqqartuussiveqarnermut immikkoortinneqartut sumut atorneqarnissaat Namminersorlutik Oqartussat suleqatigalugit pissaaq, taamaaliornikkut Kalaallit Nunaanni inatsisinik atuutsitsinermi suliassat suut pingaarnerunersut siulliullugillu suliarinissaannik tulleriiaarinissaq qulakkeerneqassammat.

AAMMA ATUARUK Eqqartuussiveqarnermut aningaasaliissutit ikippallaartut