Ilisimatusarfik 40-liineranut atatillugu KNR-ip ilisimatusartut siulliit ilaat misigisalikkaartippaa
Tallimanngorneq septembarip ulluisa 27-ani Ilisimatusarfik 40-liinera nalliuttorsiutigaat.
Ph.d.-nngortut saniatigut kingumut qiviarneq aamma persuarsiutaanut ilaavoq.
KNR-i aamma kingumut qiviarpoq, ilisimatusarfimmi aallartittut ilaat misigisalikkaartippaa.
Bolethe Olsen ukiut 40-t matuma siorna Ilisimatusarfik atuutilermat ilinniarnertusartuni ilinnialeqqaartut quliusut ilagaat. Ilisimatusarfimmi februaarip aallaqqaataani 1984-imi ilinnialersimalluni oqaluttuarpoq:
- Nuanneq inuusuttuulluni taamanikkut periarfissatsialassuaq nunatsinni aallartittoq. Aamma soqutigisatsinnik sammisaqaramik oqaluttuarisaaneq taavalu ulluinnarni pissutsit, taavalu issittumi tunngasut oqaatsillu sammisarigatsigit taamanikkut.
Isumassarsiatsialammik Ilisimatusarfik pinngorpoq
Inuit Institut-ip pilersinneqarnissaa Lars-Emil Johansenimit Jonathan Modtzfeldtimiillu siunnersuutigineqarpoq.
Landsrådit 1974-imi ukiakkut ataatsimiinnneranni ilaasortanit tamanit akuerineqareersorlu ukiut qulit qaangiummata piviusunngortinneqarpoq.
Ilinniarfittaassarlu suli aallartinngittoq inuusuttut akornganni tusaamaneqalereersimavoq, Bolette Olsen oqaluttuarpoq:
- Taamanikkut 1982-imi HF-imi naammassigama utaqqivara Ilisimatusarfiup aallartinnissaa, nunatsinninngaanniit aallarusunnginnama soqutigalugulu una periarfissiisussaq, taanna oqarpoq.
Periarfissarlu utaqqisaa maanna inuuneranut sunniuteqarpoq, maannami ukiut 35-t atuagaatilerisutut Bolethe Olseni sulisimalereerpoq.
- Atuagaatilerisutut ilinniaqqissinnaaneq tassani periarfissani ilaammat taanna toqqarnikuuara, taanna oqaluttuarpoq.
Ilisimatusarfik ineriartorsimasoq
Taamanikkumiit maannamut pissutsit alaaqaat. Bolettep inuuneraniinnaanngitsoq.Ilisimatusarfik aammma ineriartorsimavoq.
Atugassarititaasut allanngorsimaqaat, kingorna Ilisimatusarfimmik taajuuteqalermat:
Sutortarfipput taamanikkut aajuna, inuit immaqa tallimat issiasinnaapput, nerriviusamilu aamma issiasoqarsinnaaluni, taanna oqarpoq.
Ilisimatusarfik aallarteqqaarami Nunatta Atuagaateqarfiata ilassutaani aallartippoq, taamanilu aamma kolligiarpassuaqanngimmat illuinnarmi ilinniartut ilaat inissinneqarsimapput, Bolette Olsen oqaluttuarpoq:
- Uffarfeqanngilaq anartarfik imaartagaavoq. Atukkat taamaattut ajorinngilagut. Anilluta kollegie eqqatsinniittumut uffariartarpugut, uffartoqaraangat utaqqeriarluta uffarunnaaraangata uffartarluta, panerseratalu aneqqitarluta najugaqarfitsinnukarluta. atukkat assigiinngillat kisianni inuususseruttornerup naliganiummat tamakkua soqutiginngilagut.
