Aviisi: Ilisimatusarfimmi nikanarsaalluni tiingaffiginnittoqartartoq assigiinngisitsisoqartartorlu maalaartut
Nuummi Ilisimatusarfik 2021-miilli aqqanileriarluni maalaarfigineqarpoq. Sermitsiaq.AG sisamanngornermi taama allappoq.
Sullivinnik Nakkutilliisoqarfik naapertorlugu Ilisimatusarfik sullivimmi nalilersuinermut piumasaqaatinik nutarterisimanngitsoq aviisip allagaatinik takunnikkumanermigut pissarsiarisaani takuneqarsinnaavoq.
Sermitsiaq.AG naapertorlugu immikkoortortaqarfimmi ataatsimi 2022-miinnaq suliani marluusuni sulisunik pingasunik soraarsitsisoqarsimavoq.
Pisut katillugit aqqanillit 2021-miilli saaffiginnissutigineqarsimapput, ilaatigut sulisut pingasut suleqatiminnit imaluuniit aqutsisuminnit nikanarsarneqarsimallutik maalaaruteqarsimasut aviisi allappoq.
Taassuma saniatigut suliat arlallit nikanarsaalluni tiingaffiginninnermut assigiinngisitsinermullu tunngasuteqarsimapput.
- Suliffeqarfinnut allanut sanilliullugit allaanerusoqarnersoq naluara, Ilisimatusarfimmi rektori Gitte Adler Reimer 2021-miilli maalaarutit amerlassusaat pillugit oqarpoq.
Ilisimatusarfimmi nikanarsaalluni tiingaffiginnittarnerit akuerineqarsinnaanngitsut Gitte Adler Reimer immikkoortortaqarfinnut tamanut 2020-mi nalunaaruteqarpoq. Taamaammat ilinniartut tamarmik nikanarsaalluni tiingaffigineqarsimasutut misigisimagunik qanoq iliornissaannik paasissutissiissuteqarfigineqartassasut taanna tusagassiuutinut nalunaarummi taamani oqarpoq.
