Ilisimatusarfik narrunarsaasumik pissusilersuuteqartut pillugit iliuuseqarniartoq
Atoqateqarniarneq siunertaralugu eqqunngitsuliorfigineqartarneq imaluunniit tiingaffigitittarneq nunami ilinniarfiit qaffasinnerpaartaanni Ilisimatusarfimmi inuit akornanni akuerineqarsinnaananilu akuersaarneqarsinnaanngilaq.
Rektori, Gitte Adler Reimer oqarpoq.
Nunatsinni tusagassiortut peqatigiiffiata, TP-p tusagassiortunngorniat akornanni tusagassiornermi suliffimmik misiliisut apersuiffigai. Apersuinerlu naapertorlugu suliffimmi misiliisut misiliisimasullu eqqunngitsuliorfigineqartarnermik nalaataqartarsimapput.
AAMMA ATUARUK Aki-Matilda Høegh-Dam: Hårdt, men vigtigt at stå frem om sexchikane
Tamanna pissutigalugu rektorip Ilisimatusarfimmi immikkoortut tamarmik kinguaassiuutitigut kanngusarnaalerit akuerineqarsinnaannginnerannik nalunaaruteqarfigai. Taamaammat ilinniartut tamarmik narrunarsarneqartutut kinguaassiuutitigulluunniit kanngunarsarneqartutut misigisimagunik qanoq iliornissaannik paasissutissiissuteqarfigineqartassapput.
Sullivimmi nikanarsagaalluni tiingaffigineqarneq suua?
- Tassaavoq inummit allamit allanilluunniit qaninngoorfigineqarneq suiaassutsimilluunniit tunngaveqartumik malersorneqarneq, ingammik sullivimmi.
- Nammineq kissaatiginngisamik attuualaarneqarnerusinnaavoq, oqaatsitigut pissusilersuutitigulluunniit tiinganiakujuffigineqarnerusinnaavoq, siuttup atorfimmik atornerluinerisinnaavaa imaluunniit toqqaannartumik pinngitsaaliilluni tiinganiakujunnerusinnaavoq.
Tusarfik: Den Store Danske.
- Ilisimatusarfittut akisussaafferujussuarmik nammataqarluta ilinniartut sungiusaammik suliffissaanukartittarpavut maani suliffeqarfinni assigiinngitsuni nunanilu allani. Taamaattumik naatsorsuutigiuaannarparput ilinniartut sulisullu pissuserissaartunit naapinneqarsimanissaat, qaqugumulluunniit inoqammut ataqqinnilluni pissuserissaarnissamik pingaartitsisunit, rektori, Gitte Adler Reimer tusagassiuutinut nalunaarummi oqarpoq.
- Kanngunarsaasutut pissusilersuutit pineqartunut kingunerluuteqangaarsiarsinnaapput, taavalu pissusilersornerit akuersaarneqarsinnaangillat, rektori oqarpoq.
Nunatsinni nalinginnaasumik ajornartorsiutaasoq
Nikanarsagaalluni tiingaffigineqartarneq narrunarsaanermiu pissusilersuuteqarneq tusagassiortunngorniat akornanni kisimi ajornartorsiutaanngilaq.
KNR-ip nunatsinni kommunini tallimani, Namminersorlutik Oqartussani Inatsisartunilu sulisut akornanni apersuivoq. Apersuinerup nikanarsaalluni tiingaffigineqartarneq suliffiup avataani suliffeqarfimmilu pisartoq takutippaa.
AAMMA ATUARUK Misissuineq: 71 procentit kinguaassiuutitigut innimiilliortarneq ajornartorsiutaaneraraat
Apersuinermi inuit 607-it akissuteqarput. Matumani 564-it nikanarsaalluni tiingaffigitinnerit inuiaqatigiinni nalinginnassumik ajornartorsiutaanerarpaat. Taama isumaqartut 71 procentiupput.
Kisitsillu taanna Nunatsinni naligiissitaanermut siunnersuisooqatigiit siulittaasuata, Kathrine Bødkerip maluginiarpaa.
- 25 procentit missananiittut suliffimmi 50 procentingajaallu suliffiup avataani narrunarsagaallutik tiingaffigitittut misigisimagunik inuiaqatigiinni annertuumik ajornartorsiuteqarnitsinnut tamanna takussutissaavoq, taann aoqarpoq.
