Misissuineq: 71 procentit kinguaassiuutitigut innimiilliortarneq ajornartorsiutaaneraraat
Suliffimmi pisortamit atoqatigiumaneqarneq, timikkut attuualaarneqarneq, suliffeqarfinni sulisut juullilernerani nereqatigiinneranni qulliunerusuni atorfilinnit kinguaassiuutitigut innimiilliorfigineqarnerat.
KNR-ip misissuinerani paasineqartut tamakkua ilagaat.
Kinguaassiuutitigut innimiilliortarneq pillugu KNR misissuivoq.
Ima iliorpugut:
KNR nittartakkakkut apersuinermi immersugassaq atorlugu misissuivoq.
Kommuninut tamanut, Namminersorlutik Oqartussanut Inatsisartoqarfimmullu apeqqutit nassiunneqarput.
Apersuinermi immersugassaq inunnit 5500-it missaanniittunit tiguneqarpoq.
Taakkunannga akissutit 607-it KNR-p pissarsiarai.
Misissuineq tamakkiisumik misissuinerunngilaq pineqartorli ajornartorsiutaasoq erserpoq.
Kommunini tamani, Inatsisartoqarfimmi Namminersorlutillu Oqartussat ataanni sulisunut immersugassat akiortorneqarnerisigut paasiniaasoqarpoq. Kinguaassiuutitigut innimiilliortarneq nunatsinni ajornartorsiuterujussuusoq erserpoq.
Ajornartorsiutaasorujussuaq
Sulinnginnermi kinguaassiuutitigut innimiilliorfigineqarsimasut sulinermi misillertitaasunit amerlanerupput.
Sulinnginnemi innimiilliorfigineqarsimanermut apeqqummi inuit 582-it akipput, taakkualu 43,5 procentii innimiilliorfigineqarsimanerarput.
Sulinermi kinguaassiuutitigut innimiilliorfigineqarsimanermik apeqqummi inuit 603-it akipput. Taakkua 27,3 procentii innimiilliorfigineqarsimanerarput.
Suliffimmi kinguaassiutitigut innimiilliorneq suua?
Taassaavoq inuk ataaseq arlallilluunniit ingasattumik arlaleriartumilluunniit inuit allat pissusilersorfigippatigit, pissusilersorfigineqartunit nakkarsaataasutut misigisaannik. Kinguaassiutit tungaatigut narrutsannartuliornerit tassaapput kinguaassiutit tungasunik malugititsinerit suulluunniit kissaataanngitsut tamarmik.
Tusarfik: Den Store Danske.
- 25 procentit missaat sulinerminni 50 procentillu missaat sulinermik avataasigut kinguaassiuutitigut innimiilliorfigineqarsimallutik misigisimapput. Tamanna inuiaqatigiinni ajornartorsiuterujussuusoq isumaqarpunga, Kalaallit Nunaanni Naligiissitaanissamut Siunnersuisoqatigiit siulittaasuat, Kathrine Bødker KNR-imut oqarpoq nangillunilu:
- Eqqartornissaa paqumigineqarpoq, paqumigineqarunnaarnissaa amigaatigaarput. Ajornartorsiut pillugu oqallittariaqarpugut, Kathrine Bødker oqarpoq.
Innimiilliorneq tusartaraa
Kinguaassiuutitigut innimiilliortarneq nunatsinni ajornartorsiuterujussuunersoq apeqqummi inuit 564-it akipput. Taakkua 71 procentii ajornartorsiuterujussuartut naliliipput.
- Angutit kinguaassiuutitigut innimiilliorfigineqartartut ulluinnarni tusartarpara, amerlanerilli ajoraluartumik arnaapput. Taamaattumik inuiaqatigiinni ajornartorsiuterujussuartut isigineqarnera kisitsisillu tupaallaatiginngilakka, Kathrine Bødker oqarpoq.
Naalakkersuisup suaassutsikkut immikkoortitaaneq misigisimagaa
Suiaassutsikkut immikkoortitaaneq kinguaassiuutitigullu innimiilliorneq nunatsinni atuuttut peqqissutsimut naalakkersuisup, Anna Wangenheimip qaammatip uuma aallartinnerani oqaatigaa.
- Nunami naligiissitaanermut suliassaqarfimmi angutinut arnanullu atugassanut toqqissisimanartunut naligiissunullu qanilliartorsinnaassagutta, ulluinnarni suiaassutsikkut immikkoortitsisarnerup akuerisaaginnarnera ajugaaffiginiarlugu sammisaq paqumigisaasoq oqallisigineqartassaaq, taanna allappoq.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Aamma nunatsinni politikerit akornanni kinguaassiuutitigut innimiilliortoqartarnera februaarip qaammataani sammineqangaatsiarpoq.