Aki-Matilda Høegh-Dam: Mikael Petersenimit inniminniilliorfiusunut ilaavunga

- Uanga, Aki-Matilda, Siumup allattaaneraniit kanngutsaatsuliorfigineqarama misigisaqarsimasut qulingattut allataqartunut ilaavunga.

Folketingimut ilaasortap, Siumumeersup, Aki-Matilda Høegh-Damip Facebookikkut allakkani takisooq taama aallarnerpaa.

Taamaalilluni Sermitsiaq.AG-p sapaatip-akunnerani matumani allaaserisaanut siullermeerluni oqaaseqarpoq.

Arnammi Siumumut atassuteqartut qulit Siumup allattaanera, Mikael Petersen kinguaassiutitigut inniminniilliorsimasutut unnerluutigaat. Sermitsiaq.AG-p allaaserisaa naapertorlugu unnerluutiginninnerit Siumup siulersuisuunerisa marlunngormat kingullermik ataatsimiinnerminni partiip allattaaneranik suliunnaarsitsinerannut pissutaapput.

Tamatuma kingorna allattaaneq nammineerluni partiimi atorfimminit soraarpoq.

Siumup siulersuisuisa Mikael Petersenip atorfimminit soraarnera uppernarsarpaat, taamaalilluni taanna partiimut atassuteqarunnaarluni.

Mikael Petersenip Aki-Matilda Høegh-Damip oqaaseqarnera oqaaseqarfigerusunngilaa. Taassuma eqqartuussissuserisuni danskeq innersuuppaa, taassumali KNR-ip sianernera aamma tigunagu.

Aki-Mathilda: Pissaaneqartumit aqunneqassanngilanga

Aki-Matilda Høegh-Damip allakkamini, Facebookikkut saqqummersitamini 17-inik ukioqarluni misigisimasani ilaatigut oqaluttuaraa, tassalu nujani Mikael Petersenimit illukartinneqariarlutik qungasiatigut itisuumik anersarfigitilluni naamaarneqarsimariarluni nuluni tigutissimanerarpai.

23-nilli ukiullip politikerip pisimasup oqaluttuarinissaa annilaangaginikuusimavaa 

AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat

- Uanga nammineerlunga misigisaqapilunnikuuvunga Siumup allattaaneraniit. Sivisuumik ersineq pigalugu oqaaseqarneq ajulersimavunga. Oqarfigitittaramami inuttaa pissaaneqangaarmat ataqqineqangaarmallu oqaaseqaruma upperineqarnavianngitsunga aamma inuunera sequtserumaaraa, Aki-Matilda Høegh-Dam Facebookikkut allappoq.

Arnalli allat tassunga assingusumik misigisaqarsimanerat tusareerlugu Siumut siulersuisuuneranut allagaqarpoq.

- Takusinnaallugu arnat eqqugaasut amerliartuinnartut isiginngitsuusaaginnarsinnaajunnaarakku nammineq allagaqarpunga, qujanartumillu ikinngutikka tatigisakka oqaluttuukkakkit paasivara kisimiinnanga. Aammagooq nammineq allanik eqqugaasimasunik nalunngisaqarput taamaasillutalu arnat quliusugut allataqariasaarpugut, folketingimut ilaasortaq Facebookikkut allappoq. 

AAMMA ATUARUK Siumup inuusuttai: Kinguaassiutitigut innimiilliorsimaneranik tusagaqanngilavut

Aki-Matilda Høegh-Damip allagaa tamakkiisoq uani ataani atuarsinnaavat: 
 ”Killiliisariaqalerama qisuariarpunga!

Uanga sutigut tamatigut ilanngunneqarama oqaaseqartariaqalersimasutut misigivunga. Uanga, Aki-Matilda, Siumup allattaaneraniit kanngutsaatsuliorfigineqarama misigisaqarsimasunut qulingattut allataqartunut ilaavunga.

Qaammatip aallartinnerani Siumup Inuusuttaaneeqqatimma Ulrikkap sapiissuseqarluni aviisit saqqaanniilluni ilaatigut kanngutsaatsuliornerit soqutigineqartannginneri pillugit oqaaseqarmat nukissanik arnarpassuillu tunineqarpugut. Ilaatigut taassuma oqaaseqarnissannut assut sapiissuseqalersippaanga.

Uanga nammineerlunga misigisaqapilunnikuuvunga siumup allattaaneraniik. Sivisuumik ersineq pigalugu oqaaseqarneq ajulersimavunga. Oqarfigitittaramami inuttaa pissaaneqangaarmat ataqqineqangaarmallu oqaaseqaruma upperineqarnavianngitsunga aamma inuunera sequtserumaaraa.

Taamaammat nalusimanngilara maannakkut qisuariarnera inuttut eqqugaassutigiumaarlugu, nuanninngikkaluartorlu tupigusunngilanga sallu sakkoralugu tusagassiutikkooqattaalermat.

Tamannali soqutiginngilara. Takusinnaallugu arnat eqqugaasut amerliartuinnartut isiginngitsuusaaginnarsinnaajunnaarakku nammineq allagaqarpunga, qujanartumillu ikinngutikka tatigisakka oqaluttuukkakkit paasivara kisimiinnanga. Aammagooq nammineq allanik eqqugaasimasunik nalunngisaqarput taamaasillutalu arnat quliusugut allataqariasaarpugut. Allakkat allaannarlugilluunniit misigissutsit qaffakaasut, ersisaarneqarsimanerit allallu qaffakaalersarput aqunneqarsinnaanngitsumik, uangali aalajangernikuugama ersinermiit aqunneqarusunnanga angummiillu sanngiittutut taaneqaqqinngisaannassallunga arnat allat assinganik misigisaqaqqinnginniassammata arnat quliusugut sinnerluta allakkat oqartussaasunut ingerlateqqippakka. Siulersuisut allattaanerisamasaalu aalajangiipput. Uanga iliuusaannut aalajangiissutinngilakka.

Susoqanngiinnalernera naammatsiffigalugu kanngutsaatsuliornerit naammatsiffigalugit arnat pineqartullu ataatsimut allataqarpugut. Uanga arnat qulingiluat allassutinngilakka namminneerlutik assamminnik allapput. Taamaammat eqqumiigilluinnarpara Sermitsiaq.AG-mi tusagassiortoq Jørgen Schultz Nielsen-imiit allaaserineqarnera. Taanna angut allatami sioqqullugu uannut sianeriasaarpoq, nassuiaappaangalu naalallugu killissat sinnerlugit oqaaseqanngikkumagooq taamatorpiaq massakkut allatamisut allanniarporooq, tassa uangagooq pisuutinniarpaanga pissaaneqarniuunnermut uffa oqaraluartunga taamaattoqanngitsoq akiperluppoq “jo!” tusaajumananga. Uangali aalajangernikuugama angummiit pissaaneqarniaannartumiit sallu atorlugu killissakka qaangerlugit naalakkerneqaqqissananga, taamaammat siorasaarisoq kusanaattumillu telefonikkut oqaluttoq sianeqattaarmat tigunngilara.

Immaqa arnat naammatsittunik killiliisunik tusartanngingaaramik tusagassiortup angutip taassuma allatat takugamit soqutaatissimanngiivippai?

Arnaqatikka ullumikkut ersiornerput tamaanga killeqarpoq! Ersinata ikorfartoqatigiillutali killissanik qaangiiffigineqarnigut suaartaatigissagigut.

Aamma angutit allallu kaammattorpassi taamaasiorsimagussi inuttut ajuallassutiginagu akuerisassaanngitsutut tigusiuk.

Paasillugulu kukkunerusoq ajortuusorlu paquminartumik attuineq kanngutsaatsuliornerlu.

Niperput annipparput aamma nipangersimaannartoqarnavianngilaq. Inuiaqatigiittut arnat, aamma angutit inuusuttut, meeqqat, takunnittullu ajortoqarpat siorasaarneqalereernata anngussisinnaasariaqarpugut. #killiliisa.”