Siumup inuusuttai: Kinguaassiutitigut innimiilliorsimaneranik tusagaqanngilavut
Siumup Inuusuttunut Suliniaqatigiiffiata siulittaasua, Inuk Kielsen Fleischer, ilaassortanit, Siumup allattaatsigisimasaanit, Mikael Petersenimit kinguaassiutitigut innimiilliorfigineqarsimaneragaasunit saaffigineqarsimanngilaq.
Inuk Kielsen Fleischer KNR-imut taama ilisimatitsivoq.
Arnat qulit Mikael Petersen kinguaassiutitigut innimiilliorsimanerareeraallu Siumup inuusuttaanni siulittaasoq taama nalunaaruteqarpoq. Arnat taakkua allakkatigut siulersuisuunernut nassiunneqareersuni taama nassuiaapput.
AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat
Sermitsiaq.ag, arnat allagaannik tigumminnittuusoq, naapertorlugu allakkanik nassiussisut ilaatigut partiip allaffeqarfiani siornatigut sulisimapput, kajumissutsiminnik suliaqarsimapput, Siumup inuusuttaanni ilaasortaapput polikeriullutilluunniit.
Inuk Kielsen Fleischerip suliat inunnut ataasiakkaanut tunngasut oqaaseqarfigerusunnagit ilanngullugu oqaatigaa, immikkoortortaqarfimminnili taama pisoqarsimanesinnaanera aamma ilisarisinnaanngilaa.
Kalaallit Politiivisa Mikael Petersen pillugu unnerluussivigineqarsimanerlutik uppernarsarsinnaanngilaat. Politeeqarfinni pisortaq Kalaallit Politiivineersoq, Svend Foldager, KNR-imut taama ilisimatitsivoq.
Allakkat assammik allagaasut
Arnat Siumup allatsigisimasaa, Mikael Petersen kinguaassiutitigut tulleriiaartumik qasseeriarlumillu allakkani qulini innimiilliorsimanerarpaat.
Arnat allattut ilaat atiminnik saqqummiussipput, nassiussisulli amerlanerit kinaassutsiminnik isertuussipput. Sermitsiaq.ag-lli arnat taakku kikkuuneri ilisimavaa.
Sermitsiaq.ag-ip allaaserisaa naapertorlugu tamanna Siumup siulersuisuunerisa marlunngormat kingullermik ataatsimiinnerminni Mikael Petersenimik sulisussaajunnaarsitsinerannut pissutaavoq.
Mikael Petersen partiimi atorfimminit tamatuma kingorna nammineerluni soraarpoq.
Sermitsiaq.ag-p Mikael Petersen oqaloqatigaa taassumalu unnerluussissutaasut ilisarinngilai.
- Unnerluussissutigineqartut ilisarisinnaanngilluinnarpakka, Mikael Petersen oqarpoq.
Partiip allatsigisimasaa KNR-ip sisamanngornermi saaffiginnissutaanut qisuarianngilaq.
