Perngaammik: Ilisimatusarfik misilitsinnermi oqalutseqartitsisoq - angusilluaataanerusinnaavorlu

Eqqumiiginarsinnaavoq, kisianni tassa taamaappoq.

Nunatsinni ilinniaqqikkusuttut qanorluunniit piukkunnartigigaluarlutik piumassuseqartigigaluarlutilluunniit qallunaatoorluarsinnaasariaqarput. Ilinniagartuunngornialli oqaatsit ilitsoqqussatik misilitsinnerminni atoraangamikkit angusilluarnerusarput. Ilisimatusarfik taamaammat tamatuminnga periarfissiivoq. 

Ilisimatusarfiummi immikkoortortaata ilaanni ilinngiagartuunngorniat ilinniartitsinermi ataatsimi misilitsinneranni perngaammik misiliilluni oqalutseqartitsisoqaqqammerpoq. Taakku oqaatsit ilitsoqqussatik atorlugit misilitsikkusullutik saaffiginnissimasortaqaalummata taamaaliortoqarpoq.

Tamanna misilitsitsissutaasussani allani aamma oqalutseqartitsisalernissamik Ilisimatusarfiup suliniutigileruttugaani aallaaviuvoq.

- Pissanganalaarpoq

Tassa misilitsinnermi oqalutseqartitsineq isumaginninnermi siunnersortinngornianut misiliutigeqqaaritsik, Ilisimatusarfiup rektoria Gitte Adler Reimer oqarpoq. 

- Ilinniagartuunngorniat taakkorpiaat misilitsinerni tullerni oqalutseqartitseqqinnissarput kissaatigaat. Oqaatsimmi ilitsoqqussatik atorlugit misilitsinnertik iluarisimaarpaat, taanna oqarpoq.

Mátârak Olsen tamatumunnga uppernarsaavoq. Taanna oqalutseqartitsinertalimmik misilitsittunut katillutik arfiniliusunut ilaavoq.  

Oqaatsivut atorlugit misilitsilluni iluaqisoq, taanna oqarpoq.

- Qallunaatummi ilinniartinneqarlutalu atuagarsortaratta oqaatsivut atorlugit misilitsilluni pissanganalaarpoq, Mátârak Olsen oqarpoq nangillunilu: 

- Oqalutseqartoq puigortoorlugu qallunaatut appittoortaarpunga. Oqalutsili oqaaseqaraangat kalaallisut oqaluinnarsinnaallunga eqqaasarpara. Iluarpoq.

Soraarummeertartut amerlissangatikkai

Bonnie Jensenip Mátârak Olsen isumaqatigaa. Taanna Ilisimatusarfiup isumaginninnermik sulianut immikkoortortaani adjunktiullunilu Mátârak Olsenimut misilitsitsisuuvoq. 

Misilitsinermimi oqalutseqartitsisarneq ilinniagartuunngorniat angusilluarnerunissaannut iluaqutaassasoq, taanna isumaqarpoq. 

- Ilinniagartuunngorniat ilaat kalaallisut oqallorikkaluaqalutik qallunaatut nattaqqallisaartaramik misilitsinnermi angusilluanngitsoorsinnaasortaqartarput. Tamannali qanoq piginnaasaqartiginermik ersersitsisuusanngilaq, Bonnie Jensen oqarpoq erseqqissaatigalugulu misilitsitsisut taakkuummata oqalutseqartitaasussat, tassa ilinniagartuunngorniat pinnatik.

Rektori, Gitte Adler Reimer, tamatumunnga isumaqataavoq. 

Oqalutseqartitsinermut aningaasartuutit

Ilisimatusarfimmi ilinniartut tamarmik oqaatsivut atorlugit misilitsinnissamik periarfissaqartinneqalernissaat qanoq pingaartiginersoq, Gitte Adler Reimer aperigatsinni ima akivoq:

- Ilisimatusarfimmi soraarummeertartut amerlissangatippakka. Ilisimatusarfimmi ilinniartunngornissamik qinnuteqartut aamma amerlerataannapput. Taakkuli tamarmik oqaatsivut atorlugit misilitsissinnaanissaat pingaarnerpaavoq. Taamaattoqalernissaa sulissutigaarput, Gitte Adler Reimer oqarpoq. 

Mátârak Olsen aamma Bonnie Jensen tamatumunnga isumaqataapput.

Oqalutseqarneq akisullunilu piffissartornartoq, Bonnnie Jensenip nalunngilaa. Ilisimatusarfimmili ilinniartut tamarmik oqaatsit ilitsoqqussatik atorlugit misilitsissinnaasalernissaannut aningaasat qanoq amerlatigisut immikkoortittariaqassanersut suli ilisimaneqanngilaq. 

Tamanna pillugu massakkorpiaq oqaaseqarsinnaanani, rektori oqarpoq.

Suliniummi taanna aatsaat allartippoq.