Ilisimatooq: Siumup qinersititsinissamik pinngitsoortitsiniarnerata iluatsinnissaa ilimananngilaq

Siumup qinersititsinissamik pinngitsoortitsiniarnerata iluatsinnissaa ilimananngilaq. Inuiaqatigiilerinermik ilisimatooq, Ilisimatusarfimmut attuumassuteqartoq, taama isumaqarpoq.
Inatsisartut ukiukkut ataatsimiinnerat marlunngornermi aallartissaaq. Assi © : KNR
Allattoq Ivik Kristiansen, Mathies Hvid Toft
februaarip 16-at 2021 04:23

- Siumup maannakkut qinersinissaq kissaatiginngikkaa paasineqarsinnaavoq. Erik Jensenip qinersinissaq periarfissaasinnaasoq oqaatigimisaareeraluaraa qinersinissap pinngitsoortinneqarnissaanut periarfissat arlallit tusagassiuutinut nalunaarummi saqqummiunneqarput, inuiaqatigiilerinermi ilisimatooq Ilisimatusarfimmut attuumassutilik, Birger Poppel oqarpoq.

Taassuma qinersisartunik isumasiuineq kingulleq innersuussutigaa.

Misissuineq taanna naapertorlugu Inuit Ataqatigiit qinersinermi ajugaassapput, nunattalu partiivini annerpaanngussalluni.

- Qinersinermi ajorsarnissamik annilaangagamik taama misiliinerat paasisinnaavara. Iluatsinnissaanulli periarfissaqanngingajappoq, Birger Poppel oqarpoq.

AAMMA ATUARUK Siumut: Timersortartulluunniit aallaqqusaanngitsut qinersinissammut piffissaanngilaq

Tatiginnikkunnaarnermik taasititsisoqassappat, Siumut taasititsinissaq pinngitsoortinniarlugu siunnersuuteqarniarpoq. Amerlanerussuteqartulli qinersititserusupput.

Siumup Inuit Ataqatigiit amerlanerussuteqartunik naalakkersuisoqatigiiliornissamut isumaqatigiinniarnissaannik aamma kaammattorpai. Aammali tamatuma qanoq iluatsissinnaasimanissaa takujuminaappoq.

- Amerlanerussuteqartummi assigiinngitsorujussuarnik isumaqarput isiginnittaaseqarlutillu, taakkualu piviusunngortinnissaannut tamanut ammasumik oqallinnissamut periarfissaqarnikuunngillat, Birger Poppel oqarpoq.

AAMMA ATUARUK Siunnersuut takkuteqaaq: Partiit sisamat qinersisitseqqusipput

Kuannersuarni aatsitassarsiorniarneq, mittarfissuit aalisarnerlu isumaqatigiinngissutaasutut assersuutigai.

Naalakkersuinikkullu suna siunnerfiusariaqarnersoq erseqqinnerulissappat innuttaasut qanoq isumaqarnersut paasiniarneqarsinnaasoq, Birger Poppel isumaqarpoq.

- Partiit sinnerisa oqaatigeriigaattut, taava erseqqissititsinissaq pisariaqarpoq. Qineqqusaarnermullu atatillugu isummanik arlalinnik misileraaneq erseqqissititsisinnaavoq, Birger Poppel oqarpoq.

AAMMA ATUARUK Siumut: Qinersinissamut piffissaanngilaq

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk