Siumut: Qinersinissamut piffissaanngilaq

Inatsisartut ukiukkut ataatsimiinngitsiartut Siumut eqqissisaavoq. Partiip ilumini ajornartorsiornera qinersinermik kinguneqartariaqanngitsoq, Siumut isumaqarpoq.
Siumumi partiip ataatsip iluani ajornartorsiutit kisiisa tunngavigalugit ikerinnakkut qinersititsinissaq orniginagu, Erik Jensen oqarpoq. Assi © : KNR / Malik Brøns
februaarip 15-at 2021 07:08

Inatsisartuni partiit amerlanerussuteqartut qinersisoqarnissaanik kissaateqaraluartut, Siumut allamik kissaateqarpoq.

Siumut siulittaasuata Erik Jensenip piffissaanngitsumik qinersisoqarnissaa kissaatiginngikkini ippassaq sapaammi unnukkut tusagassiuutinut nalunaarummi allappoq.

AAMMA ATUARUK Siumup siulittaasuata partiinut allanut isumaqatigiinniarnerit unitsippai

- Siumumi partiip ataatsip iluani ajornartorsiutit kisiisa tunngavigalugit ikerinnakkut qinersititsinissaq orniginartinngilarput, Erik Jensen Siumullu inatsisartut gruppiani siulittaasoq Hermann Berthelsen taama allapput.

Suliap naatsumik oqaluttuarinera


Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.

 

Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.

 

Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.

 

Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.

 

Inatsisartuni amerlanerussuteqartut qinersititsinissamik maannakkut kissaateqarput.

 

Naalakkersuisut siulittaasuat nammineerluni tunuanngippat, qinersinissap sulissutigineqarnissaa partiit namminneerlutik aallartissinnaavaat. 

 

Partii Naalakkersuisunut Naalakkersuisulluunniit siulittaasuannut tatiginnikkunnaarnermik ukiukkut ataatsimiinnermi taasititsippat qinersinissamut alloriartoqarsinnaavoq.

 

Naalakkersuisut siulittaasuat tunuarpat, Inatsisartut siulittaasumik nutaamik qinersissapput.

 

Siulittaasoq nutaaq naalakkersuisoqatigiinnit Inatsisartuni amerlanerussuteqartunit tapersersorneqartunik pilersitsissaaq.

 

Ukiukkut ataatsimiinneq marlunngorpat marsip ulluisa aappaanni aallartissaaq.

 

Tusarfiit: KNR taavalut Inatsisartut Allattoqarfiat

-  Taamaattumik tatiginninnginnermik taasititsisoqassappat Siumumit pinngitsoortitsinissamik siunnersuuteqassaagut, suliat ingerlanneqartut unittuunnginnissaat  aallaavigalugit.

Erik Jensen partiimi siulersuisuunerit Siumullu inatsisartuni gruppiannit taperserneqarluni tusagassiuutinut nalunaarummi allappoq.

AAMMA ATUARUK IA qinersisartunik isumasiuinermi nutaami siuariaqisoq

Naalakkersuisooqataasimasut Demokraatit sapaatit akunnera ataaseq qaangiuppoq naalakkersuisoqatigiinniit animmata, taamanili Siumut Nunattalu Qitornai ikinnerussuteqarlutik naalakkersuisoqatigiipput.

Tassalu Siumut Nunatta Qitornaalu ikinnerussuteqarlutik naalakkersuisoqatigiilerput. Taakkua Inatsisartuni inissani 31-usuni aqqaniliinnarnik ilaasortaatitaqarput taamaalillutillu ikinnerussuteqangaatsiarlutik.

Siumut siulittaasortaavata Erik Jensenip, Kim Kielsenip Naalakkersuisunut siulittaasuuffia tigorusuppaa. Taamaammallu partiit allat suleqatigisinnaanerlugit isumaqatiginninniarfigai.

Sapaatillu akunnerata siuliani isumaqatiginninniarnermini, iluatsitsinani isumaqatiginninniarnini taamaatippai. Tassa nutaanik naalakkersuisoqatigiinnik pilersitsiniarneq iluatsinngilaq.

Partiit arlaqartut taamaammat qinerseqqusipput.

Tamakkualu tamarmik marlunngorpat, Inatsisartut ukiukkut ataatsimiilerpata, oqallisaaqqilisapput. Tassanilu illuatungiliuttut Naalakkersuisunut tatiginnikkunnaarnermik nalunaaruteqarsinnaapput.

Inatsisartunullu aqagu qinersisoqartuuppat Inuit Ataqatigiit partiini anginerpaanngussagaluartut, qinersisartut isumaannik sapaatit akunnerata siuliani misissuinermi erserpoq.