IA qinersisartunik isumasiuinermi nutaami siuariaqisoq
Inatsisartunut aqagu qinersisoqartuuppat Inuit Ataqatigiit qinersisartut 38,4 procentiinit qinerneqarlutik partiini anginerpaanngussagaluarput.
Inatsisartuni inissani 31-usuni 13-it IA-meersunik inuttaqassagaluarput.
Tamanna ilisimatusaqatigiit ilaatigut Ilisimatusarfimmeersut qinersisartut isumaannik misissuineranni erserpoq.
Ilisimatuut qinersisartut isumaannik misissuisut
Rasmus Leander, Inuiaqatigiilerinermik ilisimatooq, Ilisimatusarfik.
Mette Bendixen, stipendiat, University of Colorado
Kelton Minor, Københavns Universitetimi P.hdinngorniaq
Jane Lund Plesner, Københavns Universitetemi naammassissutissamik allaaserinnittoq
Qinersisartut januaarimi isumasiorneqarput – tassa Demokraatit Naalakkersuisoqatigiinnit ataasinngormat tunuarnerat sioqqullugu.
Siumut qinersisartunik kingullermik isumasiornermut, decemberimi pisumut, sanilliullugu kingualaassapput. Inatsisartunut aqagu qinersigaluarutta, Siumut 29,4 procentinit qinerneqassagaluarpoq inatsisartunilu inissat qulingiluat pissarsiaralugit.
Siumut inatsisartuni qulinik maannakkut ilaasortaatitaqarpoq.
AAMMA ATUARUK Demokraatit naalakkersuisoqataajunnaartut
Demokraatit allatorujussuaq inissisimalissagaluarput. Taakkua aqagu qinersisoqartuuppat 11,3 procentinik qinerneqassagaluarput– Demokraaatillu tassa qinersisukilliartuinnarput.
Demokraatit Inatsisartunut 2018-mi qinersinermi 19,5 procentinit qinerneqarput.
Qinersisartut isumaannik misissuinermi paasisat sioqqanik atorluaasinnaaneq nunatsinnilu silap pissusiata allanngoriartornera pillugu ilisimatuussutsikkut misissuinermut, Carlsbergfondimit aningaasaliiffigineqartumut atatillugu katersugaapput.
Isumasiuinermi apeqqutigineqartunut ilaavoq: “ Aqagu qinersisoqartuuppat partii sorleq qinissagaluarpiuk” ?
Apeqqutit Kalaallit Nunaanni qinersisartunut taamungaannaq toqqakkanut 939-nut nassiunneqarput.
Takkualu 63 procentii akipput.
Qinersinissamik tusatsiakkat sukkasuumik siaruaattut
Qinersisartut isumaannik misissuisineq qinersinissamik tusatsiaganeruttortoq naammassineqarpoq. Naalakkersuisoqatigiit Siumumi ingammik Kuannersuarni aatsitassarsiornissamut suliaq pissutigalugu aalassassimaarnerup malitsigisaanik ajalusoorput, Demokraatit naalakkersuisoqatigiinnit ataasinngornermi tunuarmata.
Tassalu Siumut Nunatta Qitornaalu ikinnerussuteqarlutik naalakkersuisoqatigiilerput. Taakkua Inatsisartuni inissani 31-usuni aqqaniliinnarnik ilaasortaatitaqarput taamaalillutillu ikinnerussuteqangaatsiarlutik.
Kim Kielsen Naalakkersuisuni suli siulittaasuuvoq, Siumulli siulittaasortaava Erik Jensen naalakkersuisunut siulittaasoorusuppoq.
AAMMA ATUARUK Siumup siulittaasuata partiinut allanut isumaqatigiinniarnerit unitsippai
Erik Jensen taamaattumik nutaanik naalakkersuisoqatigiinnik pilersitseqatissarsiorluni partiinik allanik isumaqatiginninniarluni ulapippoq, tamannali iluatsinngilaq, partiit allat Erik Jensen suleqatigerusunngimmassuk.
Partiit arlaqartut taamaammat qinerseqqusipput.
Tamakkualu tamarmik marlunngorpat, Inatsisartut ukiukkut ataatsimiilerpata, oqallisaaqqilisapput. Tassanilu illuatungiliuttut Naalakkersuisunut tatigikkunnaarnermik nalunaaruteqarsinnaapput.
Kim Kielsen taamaalippat qinersisoqarnissaanik nalunaaruteqarsinnaavoq, siulittaasuuffilluunniit pinartorsiorani Erik Jensenimut tunniussinnaava.
