Siumup siulittaasuata partiinut allanut isumaqatigiinniarnerit unitsippai

Nunatta polikkiani ullumi aamma pisoqarfiuvoq.

Demokraatit Naalakkersuisooqatigiinnit ippassaq tunuarput, ikorfartuinerminnillu unitsitsillutik.

Kim Kielsen Naalakkersuisunut suli siulittaasuuvoq, Siumulli siulittaasortaavata taanna aamma inissiffigerusuppaa.

Taamaammat partiit allat naalakkkersuisoqatigiinnik nutaanik pilersitseqatigisinnaanerlugit paasiniarlugu isumaqatiginiarlugit ulapippoq - tamannali iluatsinniglaq.

Tamanna Erik Jensenip tusagassiortunik katersortitsinermi naammasseqqammersumik nammineq oqaatigaa. Tusagassiortunik katersortitsineq taanna siulittaasup tullia, Vivian Motzfeldt peqatigalugu ingerlappaa.

- Assamik isaassinigut tiguneqanngillat, Erik Jensen oqarpoq.

- Uggornartorujussuuvoq. Partiilli tamarmik oqaloqatiginerisa killffiat tassaavoq taakku peqataarusunngimmata.

- Tamanna pissutigalugu ikinnerussuteqarluta naalakkersuisuutitaqarneq ingerlaannassaaq.

Marlunngorpat qinersineq?

Siumut Nunatta Qitornaalu kiserngorullutik ippassaq naalakkersuisoqatigiilerput. Taakku Inatsisartuni inissanit 31-nit aqqaniliinnarnik qinigaatitaqarput - naalakkersuisoqatigiit taamaalillutik ikinnerussuteqarnerungaatsiarlutik.

Erik Jensenilli naalakkersuisuni nutaani kikkut suleqatigerusunneraat takuniarlugu ajornakusoorpoq, partiimmi tamarmik Atassut minillugu suleqatiginnikkumanngillat. 

Kim Kielsen Naalakkersuisut siulittaasuatut - ukiukkut ataatsimiinnissap marlunngorpat aallartinnissaata tungaanuugallartoq atuukkallassaaq.

Inatsisartunimi politikerit tamarmik Nuummi katersuutissapput. 

Tamanna pissanganassaaq Kim Kielsenimi eqqissisimasumik tunuarsinnaavoq, siulittaasuuffinilu allamut ingerlateqqillugu. Inatsisartunili amerlanerussuteqartut aamma tatiginninnginnermik nalunaaruteqarsinnaapput – taamaattoqassappallu qinersisoqassalluni.

Susoqassanersoq suli ilisimaneqanngilaq.

Erik Jensenillu "Inatsisartut apeqqutaaginnalersut" kisimi oqaatigisinnaavaa.

- Qinersisoqassappalli tamanna pillugu ernumassuteqanngilagut, Erik Jensen oqarpoq.

Demokraatit aamma IA: Siumut iluani isumaqatigiinngitsoqarpallaarpoq

Erik Jensenillu ernumassuteqannginnera pitsaasuuvoq.

Taanna Siumumi Kielsen taarserlugu novembarimi siulittaasunngorpoq. Siulittaasorlu nutaaq, siulittaasup tullersortaa nutaat siulersuisuunerillu nutaat partiimi Kuannersuarni aatsitassarsiortoqarsinnaaneranut atatillugu allaanerusumik sammiveqarput.

Siumumili isumaqatigiinngittoqarneranik Kim Kielsenip KNR-imut ippassaq oqarnera Erik Jensenip eqqunnginnerarpaa.

Illuatungiliuttulli partiiat Inuit Ataqatigiit naapertorlugit Siumumi sammivinnik unammisoqarpoq, tamannalu IA-p Siumumik naalakkersuisuni suleqatiginnikkusunnginneranut pissutaasut ilagigaat, IA-p siulittaasuata, Múte B. Egedep ullumi siusinnerusukkut oqaatigaa.

Siumumi isumaqatigiinngittoqarnera Demokraatit naalakkersuisoqatigiinnit ippassaq tunuarneranut tunngavilersuutit aamma ilagaat.

Naalakkersuisut siulittaasuata Kim Kielsenip Siumumilu siulittaasut akornanni isumaqatigiinnginnerit annertuallaartut, Pele Broberg isumaqarpoq.