Siumut: Timersortartulluunniit aallaqqusaanngitsut qinersinissammut piffissaanngilaq
Qinersisoqarnissaanut maannakkut piffissaanngilaq.
Nunatsinni partiit annersaat Siumut Ukiukkut ataatsimiinnerup aallartinnissaanut ulluinnanngortoq taama nalunaaruteqarpoq.
Siumut taamaalilluni nunatsinni politikkikkut aalassassimaartoqarneranut aaqqiiniarsarivoq.
Suliap naatsumik oqaluttuarinera
Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.
Inatsisartuni amerlanerussuteqartut qinersititsinissamik maannakkut kissaateqarput.
Naalakkersuisut siulittaasuat nammineerluni tunuanngippat, qinersinissap sulissutigineqarnissaa partiit namminneerlutik aallartissinnaavaat.
Partii Naalakkersuisunut Naalakkersuisulluunniit siulittaasuannut tatiginnikkunnaarnermik ukiukkut ataatsimiinnermi taasititsippat qinersinissamut alloriartoqarsinnaavoq.
Naalakkersuisut siulittaasuat tunuarpat, Inatsisartut siulittaasumik nutaamik qinersissapput.
Siulittaasoq nutaaq naalakkersuisoqatigiinnit Inatsisartuni amerlanerussuteqartunit tapersersorneqartunik pilersitsissaaq.
Ukiukkut ataatsimiinneq marlunngorpat marsip ulluisa aappaanni aallartissaaq.
Tusarfiit: KNR taavalut Inatsisartut Allattoqarfiat
Siumut iluminni avissaartuuttoqannginneranik ersersitserusullunilu partiip maannakkut qinersisoqarnissaa kissaatiginngikkaa erseqqarissumik takutinniarpaa.
- Corona pillugu killilersuineqarlunilu kommunimut qinersisoqartussaavoq – kommunimullu qinersineq Inatsisartunut qinersinermit malunnarnerulersinnaavoq, Siumup siulittaasua, Erik Jensen KNR-imut oqarpoq.
AAMMA ATUARUK Siumut: Qinersinissamut piffissaanngilaq
Apriilip ulluisa arfernanni kommunimut qinersisoqarsinnaavoq, coronalu pillugu killilersuinerit naapertorlugit inuit amerlanerpaamik 100-t illup iluani katersuussinnaapput.
Timersortartut kommuninut allanut angalaqqusaanngillat
Corona pillugu malittarisassat aamma timersortartut kommunimit kommunimut allamut aaqqissuussinernut peqataajartorsinnaannginnerannik isumaqarput. Politikerilli taamaaliorsinnaapput.
- Timersortartulluunniit kommunimit kommunimut allamut unammisaqattaariartorsinnaanngillat. Politikerit kommunimit kommunimut angalallutik qineqqusaariaqattaarnissaat naleqqutinngilaq. Tamanna ataqatigiinngilaq. Coronap nunatsinnut angunnissaa pinaveersaartittussaavarput, aamma kommunimut qinersineq tunulliunneqassaaq, taamaammat kingusinnerulaartukkut qinersititsisoqartariaqarpoq, Erik Jensen oqarpoq.
Inatsisartuni amerlanerussuteqartut Naalakkersuisunut tatiginninnginnermik nalunaaruteqarnissaannut Siumut pinngitsoortitsiniarnissamut piareersimavoq. SIumulli kisimiilluni pinngitsoortitsisinnaanngilaq – taamaakkaluarpammi taakkununnga amerlanerussuteqartut amerlanerungaatsiassapput.
Demokraatit tunuartut
Demokraatit Naalakkersuisunit tunuarmata politikkikkut pisoqangaatsialerpoq. Tamatuma kingornalu Erik Jensen naalakkersuisoqatigiinnik nutaanik pilersitsinialerpoq. Tamannali maannamut suli periarfissaalinngilaq.
Siumut Nunatta Qitornaalu taamaalillutik maanna ikinnerussuteqarlutik naalakkersuisoqatigiipput. Taakku Inatsisartunut qinigaatitaasunit 31-nit aqqaniliinnarnik qinigaatitaqarput – taamaammat naalakkersuisoqatigiit maanna ikinnerussuteqangaatsiarput.
AAMMA ATUARUK Partiit amerlanerussuteqartut qinersititserusupput kikkulli iliuuseqaqqaassappat?
Kim Kielsen (S) Naalakkersuisunut suli siulittaasuuvoq, Siumulli siulittaasortaavata Erik Jensenip taanna atuuffigilerusuppaa.
Taamaammat nutaanik naalakkersuisoqatigiinnik pilersitsisinnaanerluni partiit allat matoqqasumik isumaqatigiinniarfigalugit ulapputigaa – tamannali iluatsinngilaq, partiimmi allat peqataarusunngillat.
Partiit qassiiusut maannakkut qinersisoqartariaqarsoraat. Taakku Erik Jensen suleqatigerusunngilaat, Siumummi iluani isumaqatigiinngitsoqarpallaarsoraat.
Tamarmik siulittaasutut taperserpaannga
Partiilu naalakkersuisoqatigiissitsisoq tamatumanik maanna naqqiiniarpoq:
- Kikkut tamarmik Siumut paatsuungassutigaat. Siumumi sammiviit marluusut imaluunniit siulittaasut marluusut isumaqarput. Tamarmik siulittaasumut tapersiisut maanna nalunaarutiginiarparput. Siulittaasoq ataasiinnaavoq – marluunatik, Erik Jensen oqarpoq.
- Siumumi siulittaasutut aamma taperserneqarpunga. Gruppi tamarmi tapersiivoq. Inatsisartuni Naalakkersuisunilu ilaasortat tamarmik siulitttaasutut tapersersorlunga nalunaarutigaat, Erik Jensen oqarpoq.
Qanoq aqagu pisoqassasoriviuk?
- Pissanganarpoq. Naalakkersuisut siulittaasuat Inatsisartut siulittaasuallu aammaasussaapput – taava susoqassanersoq takussavarput. Pissangalluta utaqqivugut.
AAMMA ATUARUK IA qinersisartunik isumasiuinermi nutaami siuariaqisoq
Qinersisartunut isumasiuineq naapertorlugu maannakkut qinersisoqaraluarpat Inuit Ataqatigiit siariaqqassapput Siumullu ataatsimik ikinnerussuteqarluni.
Inuit Ataqatigiit Inatsisartuni qinigaaffinnit 31-nit 13-inik qinigaatitaqassagaluarpoq.
Siumullu qulingiluannik qinigaatitaqarluni – Siumut ullumikkut qulinik qinigaatitaqarfeqarpoq.
