Partiit amerlanerussuteqartut qinersititserusupput kikkulli iliuuseqaqqaassappat?
Demokraatit qinersisoqarnissaanut siulliullutik iliuuseqassanersut siulittaasoq aperineqarami ima akivoq.
- Taamaariaannaavoq. Uagut maannakkut aalajangiussaqanngilagut. Kisianni isumarput ersarippoq, Demokraatit siulittaasuat, Jens Frederik Nielsen, oqarpoq.
Tassalu partiip Naalakkersuisunut tatiginnikkunnaarnermik ukiukkut ataatsimiinnermi taasinissamut tunngaviusinnaasumik iliuuseqarnissamut isummernissani utaqqimaarpaa.
Suliap naatsumik oqaluttuarinera
Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.
Inatsisartuni amerlanerussuteqartut qinersititsinissamik maannakkut kissaateqarput.
Naalakkersuisut siulittaasuat nammineerluni tunuanngippat, qinersinissap sulissutigineqarnissaa partiit namminneerlutik aallartissinnaavaat.
Partii Naalakkersuisunut Naalakkersuisulluunniit siulittaasuannut tatiginnikkunnaarnermik ukiukkut ataatsimiinnermi taasititsippat qinersinissamut alloriartoqarsinnaavoq.
Naalakkersuisut siulittaasuat tunuarpat, Inatsisartut siulittaasumik nutaamik qinersissapput.
Siulittaasoq nutaaq naalakkersuisoqatigiinnit Inatsisartuni amerlanerussuteqartunit tapersersorneqartunik pilersitsissaaq.
Ukiukkut ataatsimiinneq marlunngorpat marsip ulluisa aappaanni aallartissaaq.
Tusarfiit: KNR taavalut Inatsisartut Allattoqarfiat
AAMMA ATUARUK Qinersilersaarneq: Inatsisartuni partiit ukiukkut ataatsimiinnerminni namminneq qulakkeersinnaavaat
Demokraatit Inatsisartunik qinersititsinissamik kissaateqartuni kisimiinngillat. Partiilu alla tatiginnikkunnaarnermik taasititsinermik siunnersuuteqassappat, Demokraatit tapersiiniarput.
- Uaguinnaanngilaq. Partiit arlallit oqariartuutaat ersarittoq isumaqarpunga. Amerlanerussuteqartut naalakkersuinikkut maannakkut ingerlatsineq unitsikkusukkaat ersarippoq, qinersisoqarnissaalu kaammattuutigineqarluni, Jens Frederik Nielsen oqarpoq.
Atassut utaqqimaartoq
Inuit Ataqatigiit, Demokraatit Atassullu qinersinissamik kissaateqarlutik erseqqissumik nalunaarutigereerpaat. Naalakkersuisoqatigiit Inatsisartuni qinikkani 31-usuni aqqanilinnik qinigaateqarlutik ataasinngormat ikinnerussuteqalermata, tamanna paasinarsivoq.
Atassutimmit qanoq pisoqassanersoq takoqqaarusuppaat. Tatiginnikkunnaarnermilli taasinissaq ukiukkut ataatsimiinnermi sammineqassasoq siulittaasup Aqqalu Jerimiassenip naatsorsuutigaa.
- Avaqqunneqarsinnaanngitsutut isikkoqartoq takusinnaareerparput. Partiit allat illuatungiliuttut eqqarsaatigissagaanni tatiginninnginnermik taasititsinissaq qulequttami sorlermiugaluarnersoq qaqinneqartussaassasoq ilimanaateqarluinnarpoq.
Aqqalu Jerimiassen taama oqarpoq, Atassullu tatiginnikkunnaarnermik taasititsinissamik siunnersuuteqartoqarpat tapersersuiumaartoq oqarluni.
IA: Periarfissaq suunersut misissorpagut
Illuatungiliuttuni partiit annersaat Inuit Ataqatigiit tatiginnikkunnaarnermik taasititsinissamut tunngaviusinnaasumik ukiukkut ataatsimiinnermi siunnersuuteqarniarnersut siulittaasup Múte Bourup Egedep oqaatigerusunngilaa.
Kisianni:
- Amerlanerussuteqartut taama oqariartormata, qinersinissap suaarutigineqarnissaanut suleqataassalluta piareersimavugut, Múte B. Egede oqarpoq.
AAMMA ATUARUK IA: Erik Jensen Siumullu naalakkersuisoqatigilissanngilagut
Partiillu allat qinersinissamik kissaateqartut kissaatertik aalajangiusimanissaat pisariaqartoq ilanngullugu oqarpoq.
Partii Naleraq: Uatsinneernavianngilaq
Partii Naleqqami Naalakkersuisunut tatiginnikkunnaarnermik taasinissamut tunngaviusinnaasumik siunnersuuteqarnissamik pilersaaruteqanngillat.
- Naalakkersuinikkut silaannap salinneqarnissanik kaammattuuteqarnikuuvugut, kingusinnerpaamilli 2022-mi taamaattoqartussaavoq, Pele Broberg KNR-imut mailikkut akissuteqarpoq.
Naalakkersuisut siulittaasuata 2022-mi qinersinissamik nalunaaruteqartussaasoq taassuma innersuussutigaa.
- Siumup iluminni ajornartorsiornerat pissutigalugu tatiginninnginnermik taasititsinissaq qinersinissamilluunniit piumasaqarneq politikkikkut pimoorussilluni sulinermut tunngaviusinnaanngilaq, Pele Broberg allappoq.