IA: Erik Jensen Siumullu naalakkersuisoqatigilissanngilagut

Siumut siulittaasortaava, Erik Jensen nutaanik suleqatissarsiorpoq.

Maannakutulli isikkoqartillugu illuatungiliuttut partiiata, Inuit Ataqatigiit naalakkersuisoqatigiinnut ilanngunnianngilaq.

Inuit Ataqatigiit siulittaasuat, Múte B. Egedep marlunngornermi tusagassiortunik katersortitsinermi nalunaaruteqarpoq.

Inuit Ataqatigiit Siumup iluani akerleriittoqarnera pissutigalugu Naalakkersuisunut ilanngunnianngilaq. IA-p silaannap salinneqarnissaa kissaatigaa - Inuit Ataqatigiit oqarnerat naapertorlugu Siumut iluani sammiviit marluk pissaaneqarniuupput.

AAMMA ATUARUK Erik Jensen tunuani apersuisoq: Aap, Inuit Ataqatigiit partiillu allat isumaqatiginiarpagut

Demokraatit naalakkersuisoqatigiinnit tunuarnertik ippassaq nalunaarutigaat - taakku partiitut aamma ikorfartortaanianngillat.

Nunatta Qitornai Siumullu maannakkut naalakkersuisoqatigiipput, taakkulu aqqanilinnik Inatsisartunut 31-usunut qinigaatitaqarput.

Taamaammat Inuit Ataqatigiit arfineq-pingasunik qinigaatitaqarneratigut Inatsisartuni amerlanerussuteqarnissamut tallimanik amigaateqarput.

Partii Naleqqap Siumut naalakkersuisoqatigiinni nutaani aamma suleqatigerusunngilaa.

Naalakkersuisut siulittaasuata, Kim Kielsenip Siumullu siulittaasuata akornanni isumaqatigiinnginnerit annertuallaartut, Pele Broberg isumaqarpoq.