Erik Jensen tunuani apersuisoq: Aap, Inuit Ataqatigiit partiillu allat isumaqatiginiarpagut
Demokraatit naalakkersuisoqatigiinni suleqatigiinnerminnit tunuarput. Siumut Nunatta Qitornaatalu kisimiilerlutik Naalakkersuisuni ikinnerussuteqalinnaratik – Demokraatit Naalakkersuisunut partiitut aamma ikorfartortaanianngillat.
Siumup Naalakkersuisuni nutaanik suleqatissarsiorneranik tamanna isumaqarpoq. Illuatungiliuttullu partiivinit partii annerpaaq tassa Inuit Ataqatigiit taakku ilagaat.
AAMMA ATUARUK Demokraatit naalakkersuisoqatigiinnit aninerisa kingorna: Kielsen qinersinissamik suaaruteqanngitsoq
- Oqaloqatigiinnernik aallartitsivugut, Inuit Ataqatigiit siulittaasuat, Múte B. Egede oqarpoq.
- Oqaloqatigiinnissamut qaaqquneqarpugut. Tusarnaarpugut. Oqaloqatigiissutigisattalu nalilersornissaat maanna aallartissavarput.
Naalakkersuisoqatigiit nutaanik ikinngutitaartariaqartut
Siumut Nunatta Qitornaalu Inatsisartuni 31-nit 11-nik maanna qinigaatitaqarput.
Amerlanerussuteqarnissamut qinigaatitat 16-it pisariaqarput.
Steen Lynge, nunanut allanut nukissiuuteqarnermullu naalakkersuisoq.
Kim Kielsenip akisussaaffik tiguaa Naalakkersuisullu siulittaasuatut ingerlaannarluni.
Anna Wangenheim, peqqissutsimut naalakkersuisoq.
Martha Abelsen akisussaaffik tiguaa tamatuma saniatigut isumaginninnermut inatsiseqarnermullu naalakkersuisuunini ingerlatiinnarlugu.
Kiisalu Jens Frederik Nielsen, aatsitassanut inuussutissanullu naalakkersuisoq.
Vittus Qujaukitsup akisussaaffik tiguaa aningaasaqarnermullu naalakkersuisutut atuutiinnarluni.
Taamaalillutik naalakkersuisoqatigiit Inatsisartuni amerlanerussuteqarnissamut tallimanik amigaateqarput – Inuit Ataqatigiit arfineq-pingasunik qinigaatitaqarput. Siumulli Inuit Ataqatigiinnit taperserneqarniarnissaat amerlanerussuteqarnissamillu qulakkiiniarnissaat ajornaatsuunavianngilaq.
Illuatungiliuttummi partiiata nunatta kujataani innuttaasunut ataatsimiititsissutigineqartoq tassa Kuannersuarni aatsitassarsiornissamik suliniut annertooq akerleraat.
Aatsitassarsioqatigiiffik Greenland Minerals piiaanissamut akuersissuteqarfiunngilaq – akuersissuteqartoqarnissaanulli innuttaasunut ataatsimiititsisoqarnera alloriarnermi pingaaruteqarpoq.
Greenland Mineralsimut piiaanissamut akuersissuteqartoqassappat aatsitassat qaqutigoortut 30.000 tonsit ukiumut piiarneqartassapput.
Uran piiakkat sunneruttut ilaatut ukiumut 517 tonsiusoq piiarneqartassaaq.
AAMMA ATUARUK Demokraatit naalakkersuisoqataajunnaartut
Taamaammat partiit annerpaat marluk tassa Inuit Ataqatigiit Siumullu suliniut – nunatsinni aningaasanik isaatitsinermi pingaaruteqarnerpaanngorsinnaasoq pillugu isumaqatigiinngilluinnarlutik qanoq ilillutik naalakkersuisoqatigiilersinnaappat?
- Inuit Ataqatigiit tunngaviusumik pingaartitamik soorunami illersuissaaq. Kalaallilli inuiaqatigiit inuiaqatigiinnik qitiutitsisussamik politikkikkut siuttoqarnissaat pingaarnerpaavoq. Ullumikkut politikkikkut aqutseriaaseq ullumikkutut ittoq naammaqaaq, Múte B. Egede oqarpoq.
Siumut siulersuisui nutaat
Erik Jensen Siumumi maanna siulittaasuuvoq. Taanna Kim Kielsenimut ajugagamili novembarimili siulittaasuulerpoq.
Kim Kielsenili Naalakkersuisunut suli siulittaasuuvoq, naalakkersuisoqatigiillu Demokraatit ullumikkut tunuariataarneratigut ikinnerussuteqalerput.
Erik Jensen taamaammat Naalakkersuisut tunuanni sukangasumik apersuivoq – Naalakkersuisunullu siulittaasunngoriataarnissaminut suleqatissaminik nutaanik ujartuilluni KNR-imut uppernarsarpaa:
- Partiit tamarmik oqaloqatigivagut, isumaqatigiinniarnerit ingerlalluarisa saniatigut allamik oqaaseqarsinnaanngilanga. Naalakkersuisoqatigiinnik sapinngisamik siammasinnerpaanik kissaateqarpunga, taanna oqarpoq itisiliinanilu.
AAMMA ATUARUK Erik Jensen isumaqatiginninniartoq: Siulittaasunngortiinnarneqassava imaluunniit qinersisoqassava?
Inatsisartut ukiukkut ataatsimiinnerat sapaatip akunnerata tulliani marlunngornermi februaarip ulluisa 16-ianni aallartissaaq. Inatsisartuni politikerit tamarmik tassani Nuummi naapissapput.
Erik Jensen Naalakkersusiunut siulittaasunngussanersoq Kielsenilu tassani uppisissaneraa ilisimaneqanngilaq.
Qinersisoqarsinnaavorlu. Inatsisartummi Kim Kielsenimut Siumumullu amerlanerussuteqarlutik taama periarfissaqarput.
Amerlanerussuteqartut Kim Kielsenimut tatiginninngikkunik – Inatsisartunilu amerlanerussuteqarfiuguni – qinersisoqassaaq. Erik Jensenilu Naalakkersuisut siulittaasuata issiavianut ingissinnaalluni.
