Demokraatit naalakkersuisoqatigiinnit aninerisa kingorna: Kielsen qinersinissamik suaaruteqanngitsoq
Siumut Nunatta Qitornai peqatigalugit naalakkersuisoqatigiinnik ingerlatsiinnassaaq.
Ikinnerussuteqarlutik naalakkersuisoqatigiilersut partiit marluupput.
Tamanna Naalakkersuisut siulittaasuata, Kim Kielsenip (S) Demokraatit naalakkersuisoqatigiinnit anineranit akunnerit marluk qaangiuttut tusagassiortunik katersortitsinermi oqaatigaa.
Steen Lynge, nunanut allanut nukissiuuteqarnermullu naalakkersuisoq.
Kim Kielsenip akisussaaffik tiguaa Naalakkersuisullu siulittaasuatut ingerlaannarluni.
Anna Wangenheim, peqqissutsimut naalakkersuisoq.
Martha Abelsen akisussaaffik tiguaa tamatuma saniatigut isumaginninnermut inatsiseqarnermullu naalakkersuisuunini ingerlatiinnarlugu.
Kiisalu Jens Frederik Nielsen, aatsitassanut inuussutissanullu naalakkersuisoq.
Vittus Qujaukitsup akisussaaffik tiguaa aningaasaqarnermullu naalakkersuisutut atuutiinnarluni.
- Taama inissinnerput uggornartorujussuuvoq. Neriuppugut tamanna annertuunik kingunerluuteqassanngitsoq. Naalakkersuisoqatigiinni isumaqatigiissutigineqarsimasoq ukiukkut ataatsimiinnerup sapaatip akunnerata tulliani aallartinnissaata tungaanut maanna ingerlateqqissavarput, Kim Kielsen oqarpoq.
Sooruna qinersinissaanik suaaruteqaannanngilasi?
- Maannakkut ikinnerussuteqarluta naalakkersuisuutitaqarpugut. Periarfissanik misissuivugut, Kim Kielsen oqarpoq.
AAMMA ATUARUK Demokraatit naalakkersuisoqataajunnaartut
Sapaatip akunnerata tulliani marlunngornermi - februaarip ulluisa 16-ianni Inatsisartuni ukiukkut ataatsimiinneq aallartissaaq. Inatsisartuni politikerit tamarmik tassani Nuummi naapissapput.
Taakku Kim Kielsenimut Siumumullu amerlanerussuteqarnissartik periarfissaraat. Taamaaliussagunillu Kim Kielsenip saqqummiussaata oqallisigineqarnerani pissalluni. Politikerit Kim Kielsenimut tatiginninnginnermik taasissagunik Inatsisartunilu amerlanerussuteqartut tatiginnikkunnaassagunik - qinersisoqassaaq.
Siumut Nunatta Qitornaalu maanna naalakkersuisoqatigiinniittut Inatsisartunit 31-nit aqqaneq marlunnik qinigaatitaqarput.
- Soorunami allat uatsinnut amerlanerussuteqarnissaat periarfissaavoq. Amerlanerussuteqartut naalakkersuisoqatigiinnut tatiginninnginnerannut maannakut nalunaaruteqartoqanngilaq, Kim Kielsen oqarpoq.
Demokraatit tunuarnissaannut Kuannersuit pissutaaqataasoq
Demokraatit naalakkersuisoqatigiinnit tunuarnissaannut pissutaasut ilaat ullut qulit matuma siorna aallartippoq - tassa Kuannersuarni aatsitassarsiornissamik suliniut.
Naalli Kuannersuarni aatsitassarsiornissamik suliniut ukiuni 14-ini suliarineqareeraluartoq maannakkut pisoqarfiungaatsiarpoq. Aatsitassarsiortoqarnissaanimi aatsitassarsiorfimmit uranimit pujoralaqarnissaa aatsitassarsiorfimmiillu eqqagassaq tasermiitsinneqartussat ernumagineqarnerat pissutigalugu - ilaatigut nunatta kujataani innuttaasunit akerliungaatsiartoqarpoq - aamma Siumup iluani.
AAMMA ATUARUK Siumut ataatsimiititsinissanik suli kinguartitseqqusivoq
Narsamit 6 kilometerinik ungasitsigisumi Kuannersuarni ammasumik aatsitassarsiorfiusinnaasumi aatsitassat qaqutigoortut uranilu piiarusunneqarput.
Aatsitassarsioqatigiiffik piiaanissamut suli akuersissuteqarfiunngilaq - innuttaasunullu ataatsimiititsinerit nunatta kujataani maanna ingerlanneqartut - akuersissuteqartoqarnissaanut alloriarnerungaatsiarpoq.
Innuttaasunik ataatsimiisitsinissaraluit taamaatinneqassasut kissaatigigini, Siumut innuttaasunik ataatsimiisitsinissat aallartinnissaannut sapaatit akunneriinnanngortoq nalunaarpoq.
Aatsitassarsiulersaarneq ingammik kujataamiunit akerlerineqarmat taamaaliorpoq.
Innuttaasunut ataatsimiititsisoqaleruttortoq
Innuttaasunilli ataatsimiisitsinissat kinguartinneqanngillat – massakkullu pileruttorlutik.
Innuttaasunik ataatsimiititsinerit maannakkutut itsillugit naammassineqarnissaat Demokraatit aalajangiusimavaat.
- Siumup Kuannersuarnut tunngatillugu sammivigiligaa nutaaq naalakkersuisoqataajunnaarnitsinnut pissutaasut ilagaat, Jens Frederik Nielsen Demokraatit Naalakkersuisunit tunuarneranik nalunaaruteqarnerani tusagassiortunik katersortitsinermi oqarpoq.
Siumulli iluani avissaartuuttoqarnera Demokraatit aamma naammagilersimavaat:
- Siumumi avissaartuuttoqarnera unammillernaannavippoq. Demokraatit Siumup iluani isumaqatigiinnginnerit qularutigilerpai, Demokraatit siulittaasuat oqarpoq.