Erik Jensen isumaqatiginninniartoq: Siulittaasunngortiinnarneqassava imaluunniit qinersisoqassava?
Erik Jensen Nuummut tikippoq. Siumut siulittaasortaavata naalakkersuisooqatigiit partiivi Demokraatit Nunattalu Qitornai Nuummiinnermini isumaqatiginiartussaavai.
Erik Jensenillu ataatsimeeqateqarnermini naalakkersuisut siulittaasunngornissamut taperserneqarnissani qulakkeersinnaavaa.
Ilisimatusarfimmi inuiaqatigiilerinermi ilisimasallit, Rasmus Leander aamma Birger Poppel taama isumaqarput.
Taamaammallu Erik Jensenip naalakkersuisut siulittaasunngornissaminut oqariartuuteqarnera tupaallannartuunngitsoq, taakku isumaqarput.
AAMMA ATUARUK Erik Jensen: Naalakkersuisunut piffissami qaninnermi siulittaasunngornissara naatsorsuutigilluinnarpara
- Siumut siulittaasuattut novembarip naalernerani qinigaanerata kingorna, erserpoq siulittaasunngornissaminik anguniagaqartoq. Maannalu taamaaliornissaa piffissatsialaanngissoraara, Nunatsinnili politiki eqqarsaatigissagaanni apeqquterujussuulluni: Qaqugu qanorlu taanna siulittaasunngortinneqassanersoq, Rasmus Leander oqarpoq.
Birger Poppelip tamanna isumaqataaffigaa.
- Eqqumiigisassaanngilaq. Siusinnerusukkut Siumumi ilaasortanit nalaanneqarnikuuvoq, tassalu, Jonathan Motzfeldt, naalakkersuisut siulittaasuusoq, Lars Emil Johansen, partiimi Siumumi siulittaasuunikuuvoq ukiuni arlalinni. Kisianni siumumi politikkikkut malinneqartut naalakkersuisoqatigiinni ersersinneqarnissaa naliginnaasuunerpaassaaq.
Kommunemut qinersineq inuillu isumaasa paasiniarneri
Inatsisartut ukiaanerani februaarimi ataatsimiilerpata siulittaasumik taarsiisoqanngippat, ullormiluunniit ataatsimik immikkut ittumik ataatsimiigiaqqusisoqanngippat, ilisimatuut naapertorlugit taava marlunnik periarfissaqarpoq.
Kim Kielsen naalakkersuisut siulittaasuuinnanngippat tassalu qinersinissamik suaaruteqartoqarnissaa.
Tamannalu kommunimut upernaaru qinersisoqarnerata nalaaniusinnaavoq.
- Erik Jensenip nammineerluni oqariartuutiginikuuaa, sapinngisamik qinersinissamik suaaruteqartoqannginnissaa. Siullertut kommunimut apriilip ulluisa arferngani qinersisoqartussaavoq, aappaattullu coronap ajornartorsiutaanera, kingullertulli inatsisartunut qinerseqqittoqarnissaannut ukioq ataasiinnanngornera aamma peqqutigalugu, Birger Poppel oqarpoq.
AAMMA ATUARUK Naalakkersuisoqataasut Erik Jensen tupaallaatigigaat
Naalakkersuisoqataasullumi aamma qinersisoqarnissaanik kissaateqanngitsut, taanna naliliivoq.
- Inuit isumaannik paasiniaaneq saqqummiunneqaqqammertoq aallaavigalugu, Demokraatit Nunattalu Qitornai, naalakkersuisoqatigiinni ilaaginnarnissaminnut naammattunik qinersisoqarnissaa ilimanaateqarpallaanngilaq. Taamaammat maannatut ingerlaannarnissaa pitsaaneruvoq. Isumaqarpunga qinersisoqarnissaa kissaatigineqanngitsoq.
Isumaqatigiinniarnermilu aalajangiussassat annertupput.
- Siumut iluani, naalakkersuisoqatigiillu iluanni naatsorsuutigisat naaperiutigineqarnissaat qanoq inerneqassanersoq aalajangiisussaassaaq. Taamaammat nunatsinni politikikkut susoqassanersoq sapaatit akunnerini tulliuttuni pissanganassaaq, Ilisimatusarfimmi adjunkti, Rasmus Leander oqarpoq.