Naalakkersuisoqataasut Erik Jensen tupaallaatigigaat

Siumup siulittaasuata, Erik Jensenip, Naalakkersuisunut aquttunngorusunnera parteeqataata, Karl-Kristian Krusep uparuareeraalu naalakkersuisoqataasut Demokraatit, Erik Jensenip taama oqarnera tupaallaatigaat.

- Siullermik oqaatigissavara tupaallaatigilaarsimallugu taama ersaritsigisumik oqariartuuteqarmat. Tamannami sioqqullugu oqaloqatiginikuunngilarput, Jens Frederik Nielsen KNR-imut oqarpoq.

AAMMA ATUARUK Oqaannarluni Naalakkersuisunut siulittaasunngortoqarsinnaanngilaq

Taassuma Inatsisartunut qinigaaffik aappaagu naasussaq naalereertoq, suliallu naalakkersuisoqatigiit isumaqatigiissutaanniittut suliarineqalereerneranni naalakkersuinikkut allanngortoqarnissaa imaaliallaannaq pisinnaannginnerarpaa.

- Taannalu allanngortissappat oqaloqatigiinnerit isumaqatigiinniarnerillu soorunami ingerlanneqaqqaartariaqarput, Jens Frederik Nielsen oqarpoq.

Ataatsimeeqatigiissasut

Erik Jensen Siumumut siulittaasunngorniarnermini Naalakkersuisut talerperliuallaarnerarpai. Demokraatit Siumup siulittaasua naalakkersuisoqatigiinnerminni siulittaasorissallugu takorlooruminaatsippaat.

- Erik Jensen Naalakkersuisoqatigiit isumaqatigiissutaannik allanngortitaqarani inginnissaa takorlooruminaatsittorujussuuara, Jens Frederik Nielsen oqarpoq.

AAMMA ATUARUK Erik Jensen: Naalakkersuisunut piffissami qaninnermi siulittaasunngornissara naatsorsuutigilluinnarpara

Taassuma Erik Jensen sapaatit akunnerata tulliani naapissallugu oqarpoq.

Naalakkersuisoqatigiillu isumaqatigiissutaanni suut allanngortikkusunnerai tusarnissaa qilanaaralugu.

- Naalakkersuisoqatigiinnermut isumaqatigiissut Demokraatit peqatigalugit allanngortinneqassappat akikinnavianngilaq, Jens Frederik Nielsen oqarpoq.

KNR-imit naalakkersuisoqataasut Nunatta Qitornaasa siulittaasuat, Vittus Qujaukitsoq apersorniaraluarparput, saaffiginnissuterpulli suli qisuariarfiginngilaa.