Erik Jensen: Naalakkersuisunut piffissami qaninnermi siulittaasunngornissara naatsorsuutigilluinnarpara

- Oqaloqatigiinnerit qanoq inississanersut apeqqutaaginnarpoq, qanorlu aaqqiissanersugut qaqugorpiaassanersorlu, taanna siumoorlugu oqaatigisinnaanngilara.

- Kisianni tassa Naalakkersuisunut siulittaasunngornissara siunissami qaninnermi piumaartoq naatsorsuutigilluinnarpara, Erik Jensen KNR-imut oqarpoq.

Siumut novembari naasoq nutaamik siulittaasortaarmalli naalakkersuinikkut susoqassanersoq inuiaqatigiinni oqallisaaqaaq.

Tassalu partiit annersaanni, aamma naalakkersuisoqatigiinni annersaasumi, siulittaasoq Naalakkersuisut siuttuattut ilumut inississanersoq, taamaassappallu tamanna qaqugu pissanersoq, maannamut ilisimaneqarsinngilaq.

Tassalu maanna susoqassanersoq paasinarsivoq. Partiimut siulittaasoq, Erik Jensen, ataasinngorpat Nuummukassaaq. Naalakkersuisunullu siulittaasunngornissani naatsorsuutigilluinnarlugu.

Oqaloqatigiinnerit partiip anguniagaanut tunngassasut

Siumut nuna tamakkerlugu novembari naasoq ataatsimeersuarmat siumukkormiut 70-it missaanniittut peqataapput. Peqataasut anguniagassatut siunnissaat Erik Jensenip Nuummi oqaloqatiginninnermini qitiutinniarpai.

- Siumup ataatsimeersuarnerani anguniakkat nutaat aalajangerneqarsimasut, taakkua pillugit oqaloqatigiinnerit ingerlanniarpagut, Erik Jensen oqarpoq.

AAMMA ATUARUK Erik Jensen juullisioriartoq: Ukiortaareerpat aatsaat ataatsimeeqqissasut

Taassuma maanna naalakkersuisoqatigiit talerperlertut ingerlavallaarnerarlugit, Siumumut siulittaasunngunnginnermini isornartorsiortarpai. Taakkuali suleqatigiittut ingerlaannarnissaat maanna qanillattulerpaa.

- Naapinnissaat ingerlaqqissinnaanissaallu pillugit Nuummukartussaavunnga, illuatungiliuttunik oqaloqateqarnissannik isumaqatigiissuteqanngilanga, Erik Jensen oqarpoq.

Taassuma corona virusip ajornartoortitsinerani maanaannaq qinersisoqarnissaa perusunngilaa.