- Inuiaqatigiit ukiortaareerpat aatsaat ersarissumik tusarumaarput, Erik Jensen oqarpoq. Assi: KNR / Malik Brøns

Erik Jensen juullisioriartoq: Ukiortaareerpat aatsaat ataatsimeeqqissasut

Siumumi siulersuisuungorlaat naalakkersuisoqatigiinni susoqassanera pillugu suli inerniliussaqanngillat. Siulittaasunngorlaaq Sisimiunut juullisioriarpoq.

Kim Kielsen naalakkersuisut siulittaasutut attatiinnarnissaa, Siumup iluani suli aalajangiisoqanngilaq. Ukioq manna aalajangiisoqarnissaa naatsorsuutigineqassanngilaq.

Inatsisartuni inuerukkiartorpoq,  Inatsisartullu ukiakkut ataatsimiinnerisa naammassivaat. Siumup ataatsimeersuarnera aamma sapaatiummat naammassineqarluni.

Siumumi siulittaasunngorlaaq, Erik Jensen Sisimiunut angerlarsimavoq. Juullisiornissaq manna piffissanngortoq, taassuma oqaatigaa.

- Inuiaqatigiit ukiortaareerpat aatsaat ersarissumik tusarumaarput.

- Siulersuisuunerni oqaluuserisassagut ukioq nutaaq aallartereerpat nangeqqissallutigit naatsorsuutigaarput. Suli inerniliussaqannginnatta aammalu inississugassagut suli arlaqarmata, Erik Jensen KNR-imut oqarpoq.

AAMMA ATUARUK Naalakkersuisooqataasut isumaqatigiissutertik attatiinnarusukkaat

Erik Jensenip Nuummiinnissani sivitsorpaa. Taaanna Sisimiunut marlunngormalli aallartussaagaluarpoq, "siulersuisuunernili ataatsimiinnissat pingaaruteqartut" pissutigalugit Nuummiinnerulaarpoq. Taannali Sisimiunut sisamanngornermi aallarpoq.

Siulersuisuunerit sinneri aamma juullisioriartorput.

Siumup ataatsimeersuarnera sapaatiummat qaangiummat siulersuisuunerit Erik Jensenillu akornanni qassiiusunik ataatsimiittoqaraluarput. Erik Jensenilli ataatsimiinnerni suut oqaluuserineqarsimanersut suulluunniit anguneqarsimanersut KNR-ip sisamanngornermi ullaap-tungaani naapikkamiuk oqaaseqarfigiumanngilai.

Siulersuisuunerit Siumup Inatsisartut gruppiat ukiup sinnerani pisoqaqqissanngitsoq aamma ilisimatitsissutigaa.

Ilisimatooq naliliivoq: Pisinnaasut pingasut

Erik Jensenip Siumumi siulittaasuunera Kim Kielsenillu Naalakkersuisuni siulittaasuusoq ataannarsinnaanngitsoq, ilisimatusarfimmi inuiaqatigiilerinermut ilisimatooq, Rasmus Leander Nielsen Siumumi siulittaasut nikinneratigut Kim Kielsenip siulittaasuujunnaarnerata kingorna taama naliliivoq.

AAMMA ATUARUK Erik Jensenip qinersinissaq kissaatiginngikkaa

Pingasunik pisoqarsinnaasoq Ramus Leander Nielsenip nalilerpaa: Kim Kielsen Naalakkersuisut siulittaasuatut tunuarsinnaavoq atuuffillu Erik Jensenimullu tunniullugu. Taamaattoqassappallu Erik Jensen partiinit tapersersuisunit taperserneqarniarsarissaaq.

Kielsenili naalakkersuisut siulittaasuatut aamma atuutiinnarsinnaavoq. Kiisalu qinersisoqarnissaanik suaaruteqarsinnaalluni.

Kielsenip ataatsimeeqatiginera

Pisoqartariaqarnerali Erik Jensenip naatsorsuutiginngilaa:

- Nassuerutigissavara qinersisoqarnissaata pisariaqalernissaa naatsorsuutiginnginnakku. Pitsaasumik isumatusaartumillu aaqqiissuteqartoqarnissaa naatsorsuutigissavarput, siulittaasoq Qanoruumut ataasinngornermi unnukkut oqarpoq.

Erik Jensenip Kim Kielsenillu Siumumi siulersuisuunerit nutaat partiip sammivissaannik ingerlatsisussaammata tusarnaarniarlugit oqaatigaat.

Siumumi siulittaasup nutaap siulittaasuusimasup namminerlu akornimminni ajornartorsiuteqanngitsoq erseqqissaatigaa.

- Kimilu soorunami ajornartorsiuteqanngilagut, Inatsisartuni ilaasortani, borgmesterini immikkoortortaqarfiillu sinnerini partiinilu aamma ajornartorsiuteqanngilaq. Oqaluuserineqartut assigiinngitsut qanoq inerneqarneri ulluni qaninnerni takulaariartigit, Erik Jensen ataasinngornermi oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl