Naalakkersuisooqataasut isumaqatigiissutertik attatiinnarusukkaat
Siumup siulittaasua allanngorpoq, taannalu siulersuisuunerni ilasortaqatinilu naalakkersuisoqatigiinnermik isumaqatigiissummik allanngortitsisinnaapput.
Naalakkersuisoqataasulli Demokraatit Nunattalu Qitornai naalakkersuisoqatigiinnissamut isumaqatigiissut maanna atuuttoq, attatiinnarusuppaat.
- Soorunami neriuppugut attatiinnarsinnaassagipput. Eqqumiissanngilarli siulittaasoq nutaaq aqqut nutaaq eqqarsaatigalugu qinigaasimassappat, Aatsitassanut inuussutissarsiornermullu naalakkersuisuusoq, Demokraatit siulittaasuat Jens Frederik Nielsen, oqarpoq.
- Unalu tunngavigiinnartariaqarparput, maannakkut isumaqatigiissuterput partiit akornanni attanneqassasoq. Taannali aamma kaammattuutigerusunnarpoq. Kisianni taamaassanngippat, soorunami oqaloqataanissatsinnut - isumaqatiginninniarnernilu nutaani piareersimavugut, taanna itisiliivoq.
Demokraatit pingasunik nalakkersuisuutitaqarput.
Naalakkersuisooqataasut: Suliagut naammasseqqaartigit
Nunatta Qitornai aamma naalakkersuisooqataapput. Taakku siulittaasuat Vittus Qujaukitsoq Siumumi siulittaasup siulersuisuunerillu taarserneqarnerat naalakkersuisoqatigiinnut kalluaassanersoq pissanngatigaa.
- Pissanganarpoq, soorunami Siumut siulittaasortaaginnarnani, kisianni siulersuisuunertaarpoq nutaanik. Taavalu ataatsimeersuarnerminni oqariartuutigiumaagassaat taakku naalakkersuisooqatigiinnermut qanoq kalluissanersoq, taanna piffissami aggersumi nalilersugassani ilaasussaammat pissanganarpoq, aningaasaqarnermut naalakkersuisoq, Vittus Qujaukitsoq oqarpoq.
AAMMA ATUARUK Erik Jensen Siumumi siulittaasunngortoq: Tulluusimaarpunga
Naalakkersuisoqatigiit 2022-p tungaanut isumaqatigiissuteqarput.
Taassumalu ilaatigut imarisaasa angisuut ilaat Nunatta Qitornaasa angorusuppaat.
- Suliaq ilaannakortoq imaluunniit naammassinngitsoq iparaannassallugu taanna kissaatiginanngilaq.
Nunatta Qitornai ataatsimik naalakkersuisuutitaqarput, Siumukkut arfinilinnik naalakkersuisuutitaqartut.
Erik Jensenip Naalakkersuisoqatigiit tatigalugit KNR-imut oqaatigaa.
Qinersisoqarnissaa naatsorsuutiginngikkaa
Kielsen Siumumi siulittaasutut uppisinneqaraluarluni naalakkersuisuni suli siulittaasuussaaq.
Taamaammat pingasunik pisoqarsinnaavoq: Kim Kielsen Naalakkersuisut siulittaasuatut tunuarsinnaavoq atuuffillu Erik Jensenimullu tunniullugu. Taamaattoqassappallu Erik Jensen partiinit tapersersuisunit taperserneqarniarsarissaaq.
Kielsenili naalakkersuisut siulittaasuatut aamma atuutiinnarsinnaavoq. Kiisalu qinersisoqarnissaanik suaaruteqarsinnaalluni.
AAMMA ATUARUK Immikkut ilisimasalik: Taamaammat Kim Kielsen Erik Jensenimut ajorsarpoq
Qanorli pisoqassanersoq ilisimaneqanngilaq. Siumumili siulittaasunngorlaap, Erik Jensenip naalakkersuisooqatigiit maanna atuuttut tatigai:
- Nassuerutigissavara qinersisoqarnissaata pisariaqalernissaa naatsorsuutiginnginnakku. Pitsaasumik isumatusaartumillu aaqqiissuteqartoqarnissaa naatsorsuutigissavarput, siulittaasoq Qanoruumut ataasinngornermi unnukkut oqarpoq.
