Immikkut ilisimasalik: Taamaammat Kim Kielsen Erik Jensenimut ajorsarpoq
Partiip Siumup iluani avataanilu pisut oqallisaasimaqisut pissutigalugit Kim Kielsenip partiimi siulittaasuujunnaarneranik kinguneqarpoq. Inuiaqatigiilerinermik, Aningaasaqarnermik Tusagassiornermillu Ilisimatusarfimmi adjunkti, Rasmus Leander Nielsen, taama naliliivoq.
Erik Jensen 39-nik qinerneqarluni siulittaasuusimasorlu 32-nik qinerneqarluni, taamaalilluni Siumumi ippassaq sapaammi qinersisoqarmat siulittaasunngorpoq.
Adjunktili qaammatip ataatsip sioqqullugu siulittuutigigaluarpaa Kim Kielsen qinigaaqqissasoq.
- Isumaqaqqaaraluarpunga Kim Kielsen pisarnermisut ingerlaqqissasoq. Ajornartorsioraluaraangamiluunniit puttallarluni ingerlariaqqittuaannarmat, adjunkti oqarpoq.
Siumulli siulittaasussaanik qinersinngitsiarneranni qineqqusaartitsinermi oqalugiartut tusarnaarlugit Erik Jensenip ajugaanissaa ilimanarsilluinnarpoq.
Siulittaasuusimasullu oqallisaangaatsiartartunik pisoqartarsimanerata kingunerisaanik siulittaasuuffini qimakkaa, Rasmus Leander Nielsen nassuiaavoq.
- Nipisattassiissutinut tunngasoq oqallisaangaatsiarnikuuvoq, biilimillu aaqqissortinneranut aningaasarpassuarnik atuivoq. Oqallisaangaatsiartunik pisoqartarnikooqaaq. Taava aamma partii inatsisartuni ilungersunartorsiortarsimavioq. Aallaqqaammut ikinnerussuteqarlutik naalakkeersuisuunermikkut, tamannalu partiimut nungullarsaatasimavoq.
Sineriak peqataatinneqarnerussaaq
Partiip Siumup iluani nunarput tamakkerlugu akerleriinnerit naammagittaalliornerillu sorussunikuua.
- Siumup nunarput tamakkerlugu attaveqarneq immikkoortoqarfippassuaqarnerlu iluaqutigaa. Oqalugiarnerit ilaanni erserpoq, soorluuna Kim Kielsenip avannaani borgmesterit ataatsimeeqatigisarsimanngikkai, Rasmus Leander Nielsen oqarpoq.
Erik Jensen siulittaasussatut sassarami partiip ataatsimoorfioqqilernissaa ilaatigut qineqqusaarutigaa.
-Kim Kielsen ilaasortaminut attaveqartarnera isornartorsiorneqangaatsiarpoq. Tamannalu Erik Jensenip allanngortikkusuppaa Siumullu alaatsimoorfiunissaa taassuma siuttuuffigerusullugu.
Jensen sorusuppa?
Erik Jensenip suna anguniarnerlugu ersarissumik oqaasertaliisimanngitsoq, Rasmus Leander Nielsen isumaqarpoq.
- Anguniakkani pingaarnerit qineqqusaarnermini ersarissumik saqqummiunnikuunngilai, taassumali matup tunuani ulapputigisimavai.
Siulittaasutut suut pingaarnertut taassuma suliassarai?
- Siullertut Siumup iluani avissaartuuffiusumi ilumut ataatsimoortitsinnaanerluni takutitsissaaq. Naalakkersuisunilu qaqugu siulittaasunngussanersoq suli naluarput. Kim Kielsen nutaamik qinersisoqaqqinnissaanut ukiut aappaata affaanni issiaannarsinnaanersoq isumaliutersuutigineqalaarnikuuvoq. Taamaassasorinngilara.
Ukiarulu inatsisartut februaarimi ataatsimeeqqilerpata Kimip siulittaasuuffini tunniutissaneraa immaqaluunniit qinersisoqassanersoq paasinarsiumaarpoq.
AAMMA ATUARUK Kim Kielsen siulittaasunngunngitsoq: Oqiliallannaq
Kim Kielsen naalakkersuisunut siulittaasuuinnarnissaa sooruna ilimaginngikkit?
- Siumumi allannguisitserusukkaanni taava kina ornitassaava?
- Isumaqatigiinniarnerit pingaartut tamarmik Kielsen aqqutigisassavaat. Illuatungaanilu Kimip allanngortikkusuinngisaanik peqarpoq, tassalu aalisarneq, aamma angallannermut tunngasut, Rasmus Leander Nielsen oqarpoq.
Taassuma ilanngullugu oqaatigaa Kielsen nutaamik qinersisoqaqqinnissaata tungaanut issiaannarsinnaanersoq, kisianni:
- Erik Jensen naalakkersuisuunermi nalaani aqutseriaatsimik isumaqataanani naalakkersuisutut tunuarnikuuvoq. Taamaammat taakku marluk qanimut suleqatigiissinnaanerat ajornakusoorsinnaavoq.
