Qinersilersaarneq: Inatsisartuni partiit ukiukkut ataatsimiinnerminni namminneq qulakkeersinnaavaat

Demokraatit Naalakkersuisunit ataasinngormat tunuarneratigut Siumut Nunatta Qitornaalu ikinnerussuteqarlutik naalakkersuisoqatigiilerput.

Taakkua aqqaniliinnaasut Siumumit Nunatta Qitornaanillu Inatsisartuni ilaasortat katillutik 31-usunut ilaapput.

Siumulli siulittaasuata, Erik Jensenip, Kim Kielsen Naalakkersuisuni siulittaasutut taarserusuppaa.

Ajornartorsiutaaginnarporli illuatungiliuttut partiivisa Siumup siulittaasua nutaanik Naalakkersuisoqatigiiliornermi siuttoriumanngimmassuk. Qinersisoqartariaqartoq partiit arlallit taamaammat isumaqarput. Illuatungiliuttulli partiivi qinersisoqarnissaanut aamma sunniuteqarsinnaapput. Naalakkersuisunummi Naalakkersuisulluunniit siulittaasuannut tatiginnikkunnaanermik taasisoqarnissaanut siunnersuuteqarsinnaapput. Illuatungiliuttullu amerlanerussuteqaleqqammertut taamaaliorsinnaanngorput. 

AAMMA ATUARUK Siumup siulittaasuata partiinut allanut isumaqatigiinniarnerit unitsippai

Inatsisartuni politikerit ukiukkut sapaatit akunnerata tulliani aallartillutik ataatsimiilernissaanni Naalakkersuisunut qanoq tatiginnikkunnaarnermik nalunaaruteqartoqassanersoq qanimut misissuataagassaqqippoq.

Tamanna Inatsisartut Allattoqarfiannut apeqqutigaarput.

Ilaasortat tamarmik tatiginnikkunnaarnermik taasisoqarnissaanik siunnersuuteqarsinnaasut

Taakku mailikkut akissutaanni ilaatigut ima allassimavoq: 

- Inatsisartuni ilaasortanit Naalakkersuisut siulittaasuannut, Naalakkersuisunut tamanut imaluunniit Naalakkersuisuni ilaasortanut ataasiakkaanut tatiginnikkunnaarnermik taasisoqarnissaanut tunngaviusumik siunnersuuteqartoqarsinnaavoq.

- Tatiginnikkunnaarnermik taasisoqarnissaanut siunnersuut aatsaat oqaluuserisamik, tatiginnikkunnaarnermut pissusissamisoortumik tunngappat saqqummiunneqarsinnaavoq.

Assersuutigalugu illuatungiliuttut naalakkersuisut siulittaasuannut Kim Kielsenimut nipisattassiissutinut tunngatillugu Inatsisartut upernaakkut oktobarip qaammataani ataatsimiinneranni tatiginnikkunnaarutik suaaruteqarmata taama pisoqarpoq.

Tatiginnikkunnarnissamilli taasisoqarnissaa amerlanerussuteqalaartumik pingitsoortinneqarpoq - 14-it tatiginnittutut, 13-it tatiginninngitsutut taasimmata, marlullu taasinatik. 

Taamaammat Naalakkersuisut taamaalillutik naalakkersuisuuginnarput. 

Tunngavissatut siunnersuutit akuerisaasimasariaqartut

Ukiukkulli ataatsimiinnermi oqaluuserisassaareersut Naalakkersuisunut tamanut tatiginnikkunnaarnermik taasisoqarnissaanut tunngaviusinnaanngillat. Inatsisartut allattoqarfiat taama paasissutissiivoq.

Ilaasortarli partiiluunniit tatiginnikkunnaarnermik taasisoqarnissaanut tunngaviusinnaasumik ullormut oqaluuserisassanngortitsinissamut suli periarfissaqarpoq.

Assersuutigalugu qinersisoqarnissaa nunatsinni maannakkut pisariaqarnersoq pillugu apeqquteqaat aallaavigalugu oqallittoqarnissaanut siunnersuuteqartoqarsinnaasoq, Inatsisartut allattoqarfianniit oqarput. 

AAMMA ATUARUK IA: Erik Jensen Siumullu naalakkersuisoqatigilissanngilagut

Siunnersuutinilli suliassanngortitsissagaanni, taanna sapaatit akunnnerinik tallimanik siusitsigisumik nassiuttariaqarpoq.

Taamaammat taama ittumik oqaluuserisassanngortitsisoqassappat, Inatsisartut siulittaasoqarfiat immikkut akuersissuteqartariaqarpoq.

Nalorninartoqartoq

Naalakkersuisunut tatiginnikkunnaarlutik suaaruteqartut amerlanerussuteqarpata, tatiginnikkunnaarnermik taasisoqarnissaanut tunngaviusinnaasumik oqaluuserisassanngortitsisoqarpat imaattoqassaaq:

- Naalakkersuisut siulittaasuannut Naalakkersuisunulluunniit tamanut tatiginnikkunnaarnermik taasisoqarnissaanut siunnersuut akuerineqarpat, Naalakkersuisut tamarmiullutik tunuassapput.

- Taakkuli naalakkersuisunik nutaanik qinersisoqareernissaata tungaanut naalakkersuisuugallassapput.

- Tatiginnikkunnaarnermik taasisoqarnissaanut siunnersuut akuerineqarpat, naalakkersuisut siulittaasuat Inatsisartunut aamma qinersisitsisinnaavoq.