Siunnersuut takkuteqaaq: Partiit sisamat qinersisitseqqusipput
Partiit sisamat immikkut ittumik qinersisoqassasoq Inatsisartunut siunnersuutigaat.
Partiini illuatungiliuttuni annerpaaq, Inuit Ataqatigiit, tusagassiuutinut taama nalunaarpoq.
- Inatsisartunut immikkut ittumik qinersineq pillugu Inatsisartut inatsisissaattut siunnersuut Inuit Ataqatigiit, Demokraatit, Partii Naleraq Atassullu sinnerlugit matumuuna saqqummiutissavara, siunnersuut pillugu nalunaarummi allaqqavoq.
- Nunatta inuisa ataatsimoornerulernissartik pisariaqartippaat, maannalu pissutsit attanneqarsinaanngitsumi inissisimaleqqapput, tamannalu tunngavigalugu inatsisissatut siunnersuut maanna saqqummiupparput. Politikkikkut pissutsit attanneqarsinaanngitsumik maanna inissisimanerat peqqutigalugu qinersinissaq avaqqunneqarsinnaanngilaq.
* Siunnersuutinik suliassanngortitsissagaanni, taanna sapaatit akunnnerinik tallimanik siusitsigisumik nassiuttariaqarpoq. Taamaammat taama ittumik oqaluuserisassanngortitsisoqassappat, Inatsisartut siulittaasoqarfiat immikkut akuersissuteqartariaqarpoq.
Tusarfik: Inatsisartut Allattoqarfiat
Inatsisartut inatsisissaattut siunnersuut Inatsisartut Siulittaasoqarfiata nalilertussanngorlugulu Inatsisartut ukiukkut aqagu ullaap tungaaniit ataatsimiilerneranni qaqugu oqaluuserineqassanersoq eqqartussavaat. Inatsisartut Siulittaasoqarfiatalu partiit taakku siunnersuutaat isummerfigisussanngorpaa.
Partiit: Oqaluttarfik qineqqusaarfiginagu
Apeqqut tamanna Naalakkersuisut tunuliaqutaat Inatsisartuni 31-usuni aqqaniliinnanngorlutik sapaatit akunnerata siuliani ikinnerussuteqalereersullu soqutiginarsivoq. Demokraatit naalakkersuisoqataajunnaarlutik ataasinngormat nalunaarput.
Partiit illuatungiliuttut qinersinissaq tamatuma kingorna kajumissaarutigaat, arlaannaalluunniilli ullumi ulloq nallertinnagu iliuuseqarani.
* Siumut: 10
* IA: 8
* Demokraatit: 6
* Partii Naleraq: 3
* Atassut: 2
* Suleqatigiissitsisut: 1
* Nunatta Qitornai: 1
- Pisut partiillu Inatsisartuni amerlanerussuteqarluartut qinersinissamik kissaateqarlutik naqissuseereernerisa kingunerisaanik oqaluuserisassamik qinnuteqaateqarpugut, partiit tusagassiuutinut nalunaarutaanni naatsumi allaqqavoq.
- Oqaluuserisassani siullertut oqaluuserineqarnissaa qinnutigaarput. Inatsisartullu oqaluttarfiat taamaalilluni qineqqusaarfittut atorneqarnissaa pinngitsoortikkumallugu.
Qinersinissaq oqaluuserineqassappat tatiginnikkunnaarnermik taasisoqarsinnaasoq
Inatsisartut ataatsimiinneranni oqaluuserisassanngortitsisoqarpat, illuatungiliuttut allarluinnarmik periarfissaqalissapput. Tassa imaappoq, Inatsisartuni ilaasortat Naalakkersuisut siulittaasuannut, Naalakkersuisunut tamanut imaluunniit Naalakkersuisuni ilaasortanut ataasiakkaanut tatiginnikkunnaarnermik taasisoqarnissaanik tunngaviusumik siunnersuuteqarsinnaapput.
Naalakkersuisunut tatiginnikkunnaarlutik suaaruteqartut amerlanerussuteqarpata, Inatsisartut Allattoqarfiata qanoq iliortoqarsinnaaneranik saqqummiussissaaq:
- Naalakkersuisut siulittaasuannut Naalakkersuisunulluunniit tamanut tatiginnikkunnaarnermik taasisoqarnissaanut siunnersuut akuerineqarpat, Naalakkersuisut tamarmiullutik tunuassapput.
- Taakkuli naalakkersuisunik nutaanik qinersisoqareernissaata tungaanut naalakkersuisuugallassapput.
- Tatiginnikkunnaarnermik taasisoqarnissaanut siunnersuut akuerineqarpat, naalakkersuisut siulittaasuat Inatsisartunut aamma qinersisitsisinnaavoq.
- Naalakkersuisut siulittaasuata nutaanik naalakkersuisoqatigiiliornermut akisussaaffik Inatsisartuni ilaasortamut allamut tunniussinnissaq kingullertut periarfissaraa.
Naalakkersuisunut tatiginnikkunnaarnermik taasisitsisoqassappat tamatuminnga pinngitsoortitserusulluni, Siumut ippassaq sapaammi unnukkut nalunaarpoq.
Partiilli sisamat illuatungiliuttut siunnersuuteqarlutillu qinersititseqqusisuusut Inatsisartuni amerlanerussuteqarput.
