Ilinniartitsisussaaleqingaatsiartoqareersoq: Ataatsimiititaliap siulittaasua Tasiilamukalersoq
Qaqugu aallassanersoq suli ullulerneqanngilaq.
Kommuneqarfik Sermersuumi Sermersuumi meeqqanut atuarfeqarnermullu ataatsimiititaliami, siulittaasoq, Juaakka Lyberth (IA), Tasiilami Alivarpimmi ilinniartitsisut aqutsisullu atugai pillugit oqaloqatiginnikkiartorluni Tasiilaliassaaq.
Tamaani ilinniartitsisut aggustimiit piffissap sivikitsuinnaap iluani soraakaapput.
Ilinniartitsisut ilinniarsimasut 22-t amigaatigineqarput.
Tasiilami Alivarpimmi ilinniartitsisussaaleqineq
- Tasiilami Alivarpimmi sulisut 62-iupput taakku pingajorarterutaat timelæreriupput.
- Tassa imaappoq, Tasiilami Alivarpimmi sulisut pingajorarterutaat ilinniartitsisutut ilinniarsimanngillat, pingajorarterutaallu Danmarkiminngaaneersuullutik.
- Tasiilami Alivarpimmi ilinniartitsisut ilinniarsimasut 22-t amigaatigineqarput.
Tasiilami Alivarpimmi ilinniartitsisut aqutsisullu suleqatigiinniarnermikkut sivitsortumik aaqqiiagiinngissuteqartut, Tasiilami Alivarpimmi ilinniartitsisut sinniisuata oqaatigaa.
Tasiilami Alivarpimmi pisortaq, Jørn Holbech, maannakkorpiaq atorfimminit suliunnaarsitaagallarpoq, atuarfimmilu misissuisoqarluni.
Sunarpiarlu misissorneqarnersoq, pisortamiit, kommunimiillu KNR-imut oqaatigineqarusunngilaq.
Siunissarli taartuinnaanngilaq, ataatsimiititaliami siulittaasoq, Juaaka Lyberth Tasiilamut tusarniaajartortussanngorpoq.
- Tasiilaliassasunga, kommunitta ingerlatsiviani atuarfeqarnermut immikkoortortamut pisortaq peqatigalugu. Tasiilami Aliarpimmi pisortaqatigiit, ilinniartitsisut aamma atuarfiup siulersuisuisa, minnerunngitsumillu angajoqqaat atuartuutillit qanoq MAA-mut uummammiuminnik oqariartuuteqarumaarnissaat toqqaannartumik tusarusunnaqimmata.
Oqaatsimik ersarissaasoq
Sapaatit akunnerata siuliani Juaaka Lyberth KNR-imiit apersorneqarluni Tasiilami ilinniartitsisussaaleqinerup pequutaasa ilaat imatut nassuiaateqartippaa:
- Oqaatigaara Tasiilami Aliarpimmiit ilinniartitsisut soraartarnerinut - ukiuni arlalinni aalaakkaasumik atorfeqartannginnerinut - peqqutaanerpaasartoq ilinniartitsisut kitaaneersut ilaquttamik kitaani najugaqartut qanittuini najugaqarusuttarneri.
AAMMA ATUARUK Udvalgsformand om lærerflugt fra Tasiilaq: Det er alvorligt
Taannali tusagassiuutinut nalunaaruteqarluni ilinniartitsisunik soraartartunut peqqutaatinneqartartut aamma allat erseqqissaassutigai, tassalu:
- Peqqutigineqartartut allat taasinnaasavut tassaapput atuarfimmi pisortamik, suleqatinilluunniit, suleqatikkuminaatsitsisarneq. Aamma tunngavilersuutigineqarsinnaasarput suliat inunnut tunngasut oqimaappallaartutut misigisimaneqalertarneri, timelærerillu eqqarsaatigalugit akisussaaffimmik annertuallaamik tuniorarneqartutut misigisimasarneri.
