Tasiilami ilinniartitsisut soraarrannerat ataatsimiititaliamit ilungersunartumik isigaa
Ilungersunartoq ernumanartorlu
Kommuneqarfik Sermersuumi meeqqanut atuarfeqarnermullu ataatsimiititami siulittaasup, Juaaka Lyberthip Tasiilami Alivarpimmi ilinniartitsisunik amigaateqarneq pillugu taama oqaasertaliivoq.
Tasiilami Alivarpimmi ilinniartitsisut qulit aggustimiit apriilip tungaanuinnaq soraarput, ilinniartitsisunilli amigaateqarneq kisimi ajornartorsiutaanngilaq.
Tasiiami Alivarpimmi pisortamut, Jørn Holbechimut, tunngatillugu misissuisoqarnerani atorfimminit suliunnaarsitaagallarpoq. Taanna ilinniartitsisuusimasunit aamma isornartorsiorneqangaatsiarpoq.
AAMMA ATUARUK Immikkut ilisimasalik: Atuarfimmi inersimasut suleqatigiissinnaanngikkaangata meeqqat annaasaqaatigisarpaat
Tamanna aqutsisunit kommunimiillu oqaaseqarfigineqarusunngilaq.
- Tasiilami Alivarpimmi ajornartorsiutit soorunami ilungersunartorujussuarmik isumaqarfigivarput, Kommuneqarfik Sermersuumi meeqqanut atuarfeqarnermullu ataatsimiititami siulittaasoq, Juaaka Lyberth (IA) oqarpoq.
Atuartut ilikkagassatik ilikkarsimaneraat ernummatigaajuk?
- Taamaattumik aamma ilungersorluta suliniuteqarpugut immikkoortortaqarfik suleqatigalugu, massakkorpiaq aaqqiissutaasinnaasunik, ukiup atuarfiup naanissaata tungaanut.
Tasiilami Alivarpimmi ilinniartitsinermi sinaakkutit atuartitsinermi atorneqartussat pitsaasumik tunniunneqartartut isumaqarpit?
Tasiilami Alivarpimmi ilinniartitsisussaaleqineq
- Tasiilami Alivarpimmi sulisut 62-iupput taakku pingajorarterutaat timelæreriupput.
- Tassa imaappoq, Tasiilami Alivarpimmi sulisut pingajorarterutaat ilinniartitsisutut ilinniarsimanngillat, pingajorarterutaallu Danmarkiminngaaneersuullutik.
- Tasiilami Alivarpimmi ilinniartitsisut ilinniarsimasut 22-t amigaatigineqarput.
- Soorunami uggornarpoq ajornartorsiutaavoq Tasiilami ilinniartitsisussaaleqinerup ilinniartitsisullu soraartut peqqutigalugit atuartut naammattumik ilinniagassaminnik pissarsisinnaasimassanngippata.
Tasiilami ilinniartitsisussaaleqineq eqqarsaatigalugu pisortaq, aqutsisut, atuarfiup siulersuisui kommunimilu atuarfeqarnermi ingerlatsivillu ilinniartitsisussaaleqineq oqaloqatigiissutigisariaqaraat, meeqqanut atuarfeqarnermullu ataatsimiititaq isumaqarpoq.
AAMMA ATUARUK Tasiilami Alivarpimmi pisortaq suliunnaarsinneqarallartoq
- Immitsinnut uparuartuinnaraluarutta ukua ajortorsuarmik iliorput, ukua ajorput, taava angusaqarnavianngilagut avissaaraluttuinnassaagut. Oqaloqatigiikkutta paaseqatigiinnissaq siunertaralugu taava aatsaat angusaqarsinnaavugut alloriaqqillutalu, Juaaka Lyberth oqarpoq.
Piffissaq ungasinnerusoq isigalugu atuarfimmi ilinniartitsisussaaleqinerup aaqqiivigineqarnissaa aamma ataatsimiititap eqqumaffiginiarpaa.
Assersuutigalugu Tasiilami najugaq qimannagu ilinniartitsisunngorniarsinnaanerup periarfissaalernissaa. Taamaattoqassappallu naalakkersuisut tamanna aalajangiiffigeqaartussaavaat.
Meeqqat atuarfii pillugit ilisimasalik Mitdlaraq Lennertip KNR-imit apersorneqarluni nunarput tamakkerlugu ilinniartitsisussaaleqineq ajornartorsiutaasoq oqaatigaa.
Tamanna ilaatigut inissanik amigaateqartoqartarnera immaqaluunniit inissanik pitsaanngitsunik pissaqartitsisoqartarnera ajornartorsiutip annerup ilagigaa. Tamannali Tasiilami ajornartorsiutaanngitsoq, Juaaka Lyberth ilisimatitsivoq.
- Tasiilaq eqqarsaatigissagutsigu ilisarnanngilaq. Tasiilami ilinniartitsisut tamarluinnangajaqqeqqinnaamik inissaqartinneqarput inissiat pitsaasut kitaaninngaanniit ajornerunngitsut Tasiilami inissiaatigineqarput. Inissaaleqineq eqqaassagutsigu Tasiilami eqqaanilu taanna ajornartorsiutit annerpaartarinngilaat.
