Immikkut ilisimasalik: Atuarfimmi inersimasut suleqatigiissinnaanngikkaangata meeqqat annaasaqaatigisarpaat

Ukioq atuarfiusoq naaqqajanngitsoq Ilinniartitsisut qulit atuartitsivimminniikkunnaarnerat malunnassaqaaq.

Tasiilami Alivarpimmi ilinniartitsisut 62-iusut akornanni qulit aggustimiit apriilip tungaanut qulit soraarput.

- Soorunami atuartunut sunniuteqartorujussuussaaq ilinniartitsisut pingajorarterutaat timelæreriuppata, ilinniarsimanngippata, meeqqat atuarfianni angusarinnerulernissamik ph.d-usoq, Mitdlarak Lennert oqarpoq.

Taassuma oqarnera naapertorlugu, atuarfimmi ilinniartitsisut taarseraatsillugit artuartitsinerup pitsaassusaa sunnerneqartarpoq.

- Meeqqat atuarfitsik naammassillugu ingerlariaqqinnissaannut kinguneqarsinnaavoq. Timelæreriinnarnik ilinniartitsisoqarsimagunik  pitsaassutsimut soorunami sunniuteqassaaq, ingerlariaqqinnissaannut ajortumik sunniuteqassaaq.

- Pisinnaatitaaffitsik malillugit atuartitsiffiusussat tiimit aalajangersimasut pisussaavaat aamma taanna inatsimmiippoq pitsaassuseq taanna atuartitsisssutigineqassasoq. Kisianni pitsaassuseq taanna pisimanngikkunikku karateriannullu sunniuteqarsimappat taava aperisoqarsinnaavoq kia taava taanna akisussaaffigivaa?

Atuarfimmi aqutsisut oqaluuserineqartut

Tasiilami Alivarpimmi pisortaq ulluni kingullerni pitsaanngitsumik oqaluuserineqarput.

Tasiiami Alivarpimmi pisortamut, Jørn Holbechimut, tunngatillugu misissuisoqarnerani atorfimminit suliunnaarsitaagallarpoq. Taanna ilinniartitsisuusimasunit aamma isornartorsiorneqangaatsiarpoq.

Tamanna aqutsisunit kommunimiillu oqaaseqarfigineqarusunngilaq.

AAMMA ATUARUK Nuka aamma Kirsten-Marie Tasiilami atuarfimmi ilinniartitsisuunikuupput – taakku atuarfiup pisortaa suliunnaarsinneqarallartoq isornartorsiungaatsiapaat

Tasiilami Alivarpimmi ilinniartitsisut sinniisuata oqarnera naapertorlugu, ilinniartitsisut aqutsisullu akornanni suleqatigiinniarneq piffissamik sivitsortumik pitsaanngilaq.

Ilinniartitsisut aqutsisullu suleqatigiinniarnermikkut aaqqiagiinngissuteqartartut, taanna oqaluttuarpoq.

Atuarfimmili taamaattoqartillugu atuartut ilikkagassaannik naammattumik tunniussisoqarsinnaanera kalluarneqartartoq, Mitdlarak Lennert oqarpoq.

- Pingaaruteqartorujussuuvoq atuarfiup pisortaat ilisimaarinninnissaa ikiorteqarnissaalu, arlaatigut nalorniffinni saaffissaqarsinnaanissaa immaqaluunniit qanoq iliorsinnaanermik paasiniaaffissaqarnissaa. Taamaanngippat aaqqiagiinnginnerit pilertarput ajornartorsiutinngorlutik.

Assi © : Mitdlarak Lennert

Mitdlarak Lennert ph.d-liani 2021-imi illersorlugu naammassivaa, taanna kalaallisut qallunaatullu nutserneqarnikuunngilaq imalu taaguuteqarpoq: "The administrative context of the Greenland primary and lower secondary school system - a governance system misaligned with learning".

- Ilinniartitsisut taarseraannerujussuat atuartunut toqqissisimannginnermik pilersitsisarpoq. Taarserneri tamaasa atuartitseriaaseq allaanerusoq eqqunneqartarpoq, taamaammat meeqqanut sunniuteqangaatsiartarpoq.

Inersimasut sinaakkusersuisussaapput

Tasiilami Alivarpimmi ilinniartitsisut 62-it pingajorarterutaat ilinniartitsisutut ilinniarsimanngillat. Tassa pingajorarterutai timelæreriupput.

Ilinniartitsisut ilinniarsimasut 22-t amigaatigineqarput, tamannalu ilinniartitsisunik ilinniarsimasunik avataaniit aallernissamik ajornartorsiornermik takutitsisoq, Mitdlarak Lennert isumaqarpoq.

Taamatut ingerlasoqartillugu atuartoq eqqornerlunneqartarpoq.

- Atuarfiup pisortaa akisussaaffeqarpoq, kommunip aamma akisussaaffigivaa atuarfiit ingerlalluassasut taakku ulluinnarni aqutsineq akisussaaffigivaat.

Kisianni Inatsisartut Iliniartitaanermullu Naalakkersuisoqarfik sinaakkutissanik aalajangiisarput. Pissutsit taamaatsillugit soorlu Tasiilami aamma  nunaqarfinni amerlasuuni takutippaat ilinniartitsisut ilinniarsimasunik naammattunik peqanngilaq, taava qanoq iliortoqassava. Pitsaassuseq atuarfinni taakkunani anguneqarsinnaanngilaq aali inatsisiniittoq, taava qanoq iliortoqassava?

Apeqqut taanna  Mitdlarak Lennertimit aamma akiuminaatsinneqarpoq.

Nunarpummi tamakkerlugu avinngarusimanerusuni ilinniartitsisussaaleqineq annertoqaaq. 2020-miit 2021 ilanngullugu sineriak tamakkerlugu ilinniartitsisut 900-t sinneqartunit 166-it ilinniarsimanngitsut ilinniartitsisutut sulisut, Mitdlarak Lennertip tikkuarpaa.

- Ilinniartitsisunik amigaateqarpugut avinngarusimasuni qanoq iliorluni tikisitsisarnissap oqaluuserineqarnissaa pingaaruteqarpoq.

Ilinniartitsisut amigaatigineqarput inissaqartinneqaratillu

Tikisitsiniarnermili aamma ajornartorsiutit sinerissamiittut taassuma eqqaavaa:

- Najugaqarfiit annermik ajornartorsiutaasarput, najugaqarfissat amigaatigineqarput.

- Kommunit assigiinngitsut arlaatigut aaqqiissuteqarniartaraluarput, soorlu akissarsiatigut. Kisianni najugaqarfissat ajornartorsiutaajuaannarput.

Kisianni taakkuinnaat ajornartorsiutaanngitsut taassuma naqissuserpaa, sumiiffimmiit sumiiffimmut ajornartorsiutit assigiinngittaqimmata aaqqiivigineqartussat arlaqarmata imaaliallaannaq aaqqinneqarsinnaanngitsut Mitdlarak Lennert oqarpoq. Taamaammallu tamakku qaqilerlugit eqqartorneqarnissaat pingaaruteqartoq taanna oqarpoq.