Ilinniarnertuunngorniat pikkorinnerusariaqartut

Inuusuttut ilinniarnertuunngorniarfinnut pigaangamik tikilluaqquneqarnertik ilassilluartarpaat. Ilinniagasserinissamulli eqiasuivinneq ajorput. Ingammik matematikkimi qallunaatoornermilu ingerlanerluttarput.

Ilinniarnertuunngorniarfinni rektorit marluk KNR-imut taamak oqaluttuarput.

- Matematikki ilinniarnerni initukkajuttarpoq, taamaammallu piginnaasaqarfiginissaa pingaaruteqarluni. Qalunaat oqaasii ilinniarnermi inituvoq, tassami atuakkat ilinniutit amerlanerpaat qallunaatuujupput, Steffen Lund, Campus Kujallermi rektori, oqarpoq.

Meeqqat atuarfiini naammassisartut 30 procentiinnaat ilinniarnertuunngorniarfittut ittunut ingerlaqqittarput. Ilinniarnertuunngorniarfiillu angusarinnerpaat, tassa ingerlariaqqinnissamut piumasaqaatinut naammassinnittut, kisiisa tigusaraluaraat ilinniartut amerlasuut fagini oqaatsinut tunngasuni ajornartorsiukkajuttarput.

Aasianni GUX-imi rektori oqaluttuarpoq ilinniartutik kalaallisut pikkorissuusut. Akerlianilli qallunaatut piginnaasakilliartortut. Tamannalu ilinniarnertuunngorniarfimmi atuarnerminnik naammassinninniarnerannut ajornakusoortitsisartoq.

- Ilinniartitsisut amerlanerit qallunaajupput, tamannalu ajornartorsiutaakkajuppoq. Taamaammallu ilinniartut ilinnialeqqaarneranni piffissarujusuq atorlugu qallunaatut oqalussinnaaneq attaveqatigiinnissarlu ilinniartitsissutigisariaqartarparput.

Soormi ilinniartitsisunik kalaallinik atorfinitsitsiinnanngilisi?

- Taamaaliorusukkaluaqaagut. Maanili ilinniartitsisuuniaraanni ilisimatusarfimmi kandidatitut allagartaqartariaqarpoq. Kalaallillu taama qaffasitsigisumik ilinniagallik allanik suliffittaakkajupput, Flemming Guntofte Nielsen, Aasianni GUX-imi rektori KNR-imut oqarpoq.

Taanna ilinniarnertuunngorniarfinni aallartittut sungiuttariaqagaannik pingaarutilimmik tikkuaavoq.

- Sungiunniagassaat tassaavoq, ilinniagasserisarnissaat piumasarigatsigu, tamanna sungiusimasarpasinngilaat,  Flemming Guntofte Nielsen oqarpoq.

Campus Kujallermit aamma taamatukanneq oqariartuuteqarpoq.

Inuusuttut ilinniarnertuunngorniarnissamut piareersarluarneqarnissaat Steffen Lundip kissaatigaa.

- Maani qanoq piumasaqaateqartigisugut ilinniartutta paasigaangamikku tupaallaattarput. Tamannalumi takornartaagunanngilaq, Campus Kujallermi rektori naggasiivoq.