Aningaasaqarnermut inatsisissatut siunnersuut: Ilinniarfik nutaaq qulimiguulimmillu Tasiilamut angallassineq pitsaanerusoq

Tasiilami innuttaasut 600-t politikkikkut immikkoortinneqarnertik pillugu akerliussutsimik siorna takutitsipput.

Tunumi innuttaasut angallannerup ajornerulernera pillugu naammagittaalliortarnerat ukiuni kingullerni allaaserineqartarpoq. 

Icelandair Kulusummut angallassisarnini ukiaanerani upernaakkullu unitsinnikuuaa.

Tamanna Hotel Kulusuup sulisuminik aasaanerani ulapaarfiujunnaaraangat soraarsitsisariaqartarneranik ilaatigut kinguneqarpoq.

-Tunumi takornariaqarnermut attaveqaasersuutinullu pitsaanerusumik malitassaqalernissaa neriuutigaarput, taamaalilluta ukioq kaajallallugu akunnittarfimmik neqerooruteqarsinnaaleqqillutalu ukioq kaajallallugu sulisoqarsinnaaleqqissaagut, pisortaq Mike Nicolaisen tusagassiuutitigut juulimi nalunaarummi oqarpoq.

Nunatsinnilu ilinniarfiit tamarmik kitaaniinnerat aamma isornartorsiorneqarsimavoq. 

Aningaasaqarnermut naalakkersuisup Aqqaluaq B. Egedep (IA) naalakkersuisut aningaasaqarnermut inatsisissatut siunnersuutaata saqqummiunneqarnerani, Tunumi aningaasaliinerit eqqartorpai. 

Naalakkersuisut Tasiilami ilinniarfeqalernissaanut 10,8 millionit koruuninik immikkoortitsinissaq maanna siunnersuutigaat.  Assi © : Markus Valentin / KNR

Ilinniarfik

Naalakkersuisut siulii Tasiilami ilinniarfimmik pilersitsinissamut 1 millionit koruuninik 2022-mi immikkoortitsipput.

Tamanna inuusuttut kitaanut Danmarkimulluunniit ilinniariartorlutik nuuttarnerisa ajornartorsiutaaneranut iluaqutaassaaq.

Ilinniarfilli suna pilersinneqassanersoq inissinneqanngilaq.

Tamatuma kingorna Ilulissani ilinniarnertuunngorniarfimmik aamma pilersitsisoqartariaqarnersoq politikkikkut oqallisaangaatsiarpoq.

2023-mili nassuiaateqarnerup Ilulissani ilinniarnertuunngorniarfimmik nutaamik pilersitsinissaq naapertuunnanilu Aasianni GUX-imut innarliissutaassasoq inerniliissutigaa, ilinniartussatummi tunngaviusussat ikippallaarput.

Ilinniartitaanermut naalakkersuisup Nivi Olsenip (D) naak nassuiaateqarnermi innersuussutigineqanngikkaluartoq Ilulissani ilinniarnertuunngorniarfimmik nutaamik - inuussutissarsiornermi ilinniarfinnut periarfissaqartumik pilersitsisoqarnissaa kissaatigigaluarpaa. Naalakkersuisut inuussutissarsiornermik ilinniarfimmik nutaamik ingerlatsinissamut 20,5 millionit koruunit immikkoortinneqarnissaat maanna siunnersuutigaat. Assi © : Sikkersoq Rosing Karlsen

Ilinniartitaanermut naalakkersuisup, Nivi Olsenip (D) Ilulissani atuarfimmik nutaamik ilinniarnertuunngorniarfimmik inuussutissarsiornermillu ilinniarfimmik ilaqartumik pilersitsinissaq sulissutiginiarlugu KNR-imut siorna oqaatigaa.

Saqqummiussat tamakku Tunumit ilinniarfeqarnissamik periarfissanik amigaateqartunit isornartorsiorneqarput.

Aqqaluaq B. Egedep naalakkersuisut Ilulissani inuussutissarsiornermik ilinniarnermut tunngassuteqartumik atuarfimmik nutaamik ingerlatsinissamut 20,5 millionit koruuninik immikkoortitsiniartut sisamanngornermi saqqummiuppaa.

Saniatigut Tasiilami ilinniartunut illumik pilersitsinissaq pillugu aappaagumut 10,8 millionit koruunit immikkoortinneqarnissaat siunnersuutigineqarpoq. Naalakkersuisut tamatuma saniatigut Pilersitsiviit Majoriarlu pillugit suliniutit salliunniarpaat. 

Tamanna ajornartorsiutip annertuffigisaani inuusuttunik ilinniagaqanngitsunik suliffeqanngitsunillu ikilisaataaqataassaaq. Tamanna aningaasanut inatsisissatut siunnersuummi allassimavoq. 

- Tunumi ilinniartitaanerup sammineqarnera naammanngitsoq nalilerparput, Aqqaluaq B. Egede oqarpoq.

Naalakkersuisut Tasiilami pisariaqartitsinermik misissueqqissaarniarlutillu ilinniarnissamut neqeroorutinik ineriartortitsineq pillugu nalunaarusiorniarput. Tassani aningaasalersuineq aamma misissorneqassaaq.

Tasiilap, Kulusuup nunaqarfiillu allat akornanni qulimiguulik teknikkikkut ajoquteqarneq pissutigalugu ataaseq sapaatit akunnerini arlalinni atorneqarsinnaasimanngitsoq KNR-ip ukioq manna siusinnerusukkut allaaseraa. Innuttaasut timmisartuussinerup inuiaqatigiinnut kingunerluuteqangaatsiarnera oqariartuutigaat. Assi © : KNR / Hanna Hviid

Qulimiguulik

Aqqaluaq B. Egede (IA) aningaasaqarnermut naalakkersuisunngunnginnermini ineqarnermut, attaveqaasersuutinut isorliunerusunullu naalakkersuisuuvoq.

Lars Poulsenip (S) Nuup Kulusuullu akornanni ukioq kaajallallugu assartuinissamut periarfissaqarfiusumik timmisartuussinissamut kiffartuussinissamik isumaqatigiissuteqarnissamut inatsisitigut tunngavissaqanngitsoq §37-mut akissummi oqaatigaa.

- Tunumi ajornartorsiutaasut maluginiarpagut, innuttaasullu ukiuni arlalinni tunumiittarnitsinni qisuariaateqartarput, Aqqaluaq B. Egede aningaasanut inatsisissatut siunnersuutip saqqummiunneqarnerani oqarpoq.

Naalakkersuisut nunatta kujataani Tunumilu qulimiguulimmik angallassinermut 20 millionit koruuninik immikkoortitsinissaq maanna siunnersuutigaat.

- Attaveqaatit, angallassineq, allallu innuttaasut oqaatigisaat naalakkersuisunit tusaavagut.

 - Taamaammat ilungersunarnerpaanut aningaasanik immikkoortitsinissaq ukkatariniarparput, Aqqaluaq B. Egede oqarpoq.