Tunumi timmisartuussisarnerup killilerneqarnera inissaaleqinerlu: Politikerit apersorneqarumanngitsut

Ineqarnermut, attaveqarnermut isorliunerusunullu naalakkersuisup Aqqaluaq B. Egedep (IA) qaammat kingulleq akissutaa, Tunumi uissuummissutigineqarpoq.

Icelandairip Kulusummut timmisartuussisarnera ukiaaneraniit upernarnissaanut maanna unitsinneqarmat, naalakkersuisut qanoq iliuuseqassanersut Lars Poulsenip (S) apeqqutigaa.

Aammattaaq inissaqartitsiniarnerup qanoq pitsanngorsarniarneqarnera Siumumi politikerip apeqqutigaa.

Annerusumik iliuuseqartoqarsinnaanngitsoq

Angallaffiup imminut akilersinnaannginnera Icelandairip ukiuunerani timmisartuussisarunnaarneranut peqqutaavoq.

Tamanna Aqqaluaq B. Egedemit §37-kkut akissutigineqarpoq.  

Naak angalaffissaq naalakkersuisunit pingaaruteqartinneqaraluartoq, naalakkersuisup annerusumik iliuuseqartoqarsinnaannginnerarpaa.

- Nuup aamma Kulusuup akornanni ukioq tamaat timmisartuussisoqartarmat, tassunga aamma usinik angallassisoqarsinnaammat, ilaatigut inuussutissanik, kiffartuussinissamik isumaqatigiissusiortoqarnissaa inatsisitigut tunngavissaqanngilaq, Aqqaluaq B. Egede ilisimatitsivoq.

Icelandair nassuiaateqartinniarlugu kiisalu timmisartuussinerup ukioq tamaat ingerlaannarnissaanut periarfissat oqaloqatigiissutiginiarlugit Naalakkersuisunit attaveqarfigineqarumaartoq, Aqqaluaq B. Egede nangilluni oqarpoq. Naallu matusineq aningaasatigut pissuteqartoq oqaatigereeraluarlugu.

KNR-ip Tunumi pissutsit pillugit Aqqaluaq B. Egede itinerusumik apersorumavaa.

Naalakkersuisoq Qanoruumiikkumalluni piumasaqarpoq, taamaanngippallu oqaaseqarusunnani. Politikerit KNR-ip qanoq tusagassiortarneranik aalajangiisinnaannginnerat pissutigalugu kissaatigisaa malillugu iliunngilagut.

Inissaaleqineq

Lars Poulsenip timmisartukkut attaveqaatit pillugit apeqqutit saniatigut naalakkersuisut ineqarnermut tunngatillugu qanoq iliorniarnersut aamma apeqqutigaa.

Namminersorlutik Oqartussat inissialiornissamik pilersaaruteqarnersut tassani aperivoq.

2025-mut aningaasanut inatsimmi Tasiilami inuusuttunut inissialiornissamut aningaasaliisoqarsimaneranik, Aqqaluaq B. Egede akissuteqarpoq.

- Taamaattoq inissiaqarfissatut pilersaarutigineqartumi sanaartorfissagissaarnerup Kommuneqarfik Sermersuumit naammassineqarnissaa, kiisalu tamatumunnga aningaasartuutissat, Namminersorlutik Oqartussanit akilerneqartussat, paasinarsisinneqarnissaat suliassami utaqqimaarneqarput. 

Tasiilami inissianik nutaanik sanaartortoqassasoq, kommunilu inissiat amerlineqarnissaannik sulissuteqartoq, Kommuneqarfik Sermersuumi borgmesteri Avaaraq Olsen (IA) tusagassiuutinut nalunaarummi ilisimatitsivoq.

Kommunip Tunumi suliniutai pilersaarutaalu pillugit KNR-ip aamma borgmesteri apersorniarlugu saaffigaa.

Apeqqutit nassiunneqareernissaat kommunip piumasaraa. KNR-ili apeqqutinik nassiussereernissamik itigartitsereermalli tusagaqaqqinngilagut.