Qulaajaasut Ilulissani GUX-iliortoqannginnissaanik inassuteqartut

Ilulissani GUX-imik annermik pilersitsineq Aasianni GUX-ip matuneqarneranik kinguneqarsinnaavoq. Minnermik pilersitsisoqarpat, aamma Aasianniitoq minnerulersinneqartariaqassaaq. Perorsaanermik ilinniarfiup illuutaanik atuineq perorsaanermik ilinniarfimmut innarliissaaq.

Periarfissat taakku pingasut ilinniartitaanermik pitsaanerulersitsinissaat ilimananngilaq. Ajornerulersitsisinnaappulli.

Qulaajaanermut 2023-mit nassuiaammi tamanna atuarneqarsinnaavoq, tassanilu ersarissumik inassuteqartoqarpoq:

- Isumaliutissiissutit tamakkua tunuliaqutaralugit Ilulissani GUX-imik pilersitsisinnaanerup malersoqqinnissaa inassutigineqanngilaq, allaqqavoq.

Ilulissani GUX-imik pilersitsinissaq siullermik oqallisigineqalinngilaq. Nunami sulisunik ilinniagaqarsimasunik pisariaqartitsiffiusumi inuusuttut amerlanerit ilinniartariaqartut, nunattalu illoqarfiisa annersaat pingajuanni GUX-eqalerpat tamatumunnga iluaqutaassasoq pilersitsinissamik kissaatillit tunngavilersuutigaat. Ingammik mittarfissuaq ammarpat, illoqarfillu tikinneqarfigiuminarnerulerpat.

Pilersitsineq akisussasoq, 100 kilometerinillu ungasitsigisumi Aasianni GUX-eqareertoq, akerliusut tunngavilersuutigaat.

Naalakkersuisut Avannaata Kommunialu attaveqaqatigiittut

Naleqqameersup Jens Napaattuup ilinniartitaanermut naalakkersuisumut apeqquteqaateqarnera oqallitsitseqqilerpoq.

Nivi Olsenip akissutaa naalakkersuinikkut isummernerunngitsoq akissummi allaqqavoq. Aamma politikkikkut isummertoqassappat, misissueqqissaarnerit nutaat, pilersaarusiornerit teknikkikkullu naatsorsuusiornerit suliarineqaqqaartariaqartut.

Naalakkersuisulli Avannaata Kommunialu attaveqaqatigiittut aamma allaqqavoq.

Tamanna Kommune Qeqertalimmi borgmesterimut Simigaq Heilmannimut ernumalersitsivoq.

- Ukua illoqarfiit imminnut qanitariikkamik aammalu Ilulissanit maannga ilinniariartoqartarmat, Aasianni ilinnialerrtartut ikinneruleratarsinnanerat takorlooruminarpoq. Taannalu naalakkersuinikkut eqqumaffiginiarneqassasoq kissaatigeqaara, aamma aningaasatigut kommunitsinnut kinguneqartussaammat, Simigaq Heilmann KNR-imut oqarpoq.

Jens Napaattuup Nivi Olsenimut apeqquteqaataa Ilulissani GUX-iliornissap qanoq akeqarnissaanut tunnganeruvoq.

GUX anneq 800 millionit koruuninik minnerlu 300 millionit koruuninik akeqassasoq Nivi Olsen 2020-mit misissuinermut innersuussilluni allappoq.

Inuit ikippallaartut

Akia unammillernassasoq, 2023-mi qulaajaasut allapput. Tamannali pingaarnerpaajunngilaq.

Inuimmi Ilulissani Aasiannilu annernik GUX-eqarnissaanut ikippallaartut, qulaajaanermi nassuiaasiami allaqqavoq.

- Ilinniagaqartartut nukiillu atorneqartartut agguarnerisigut ilinniartunut ilikkagassatigut – fagitigut avatangiisinut periarfissakinnerulissasoq ilimanarpoq. Tamanna ilinniartitsinerup pitsaassusianik ajornerulersitsisinnaavoq, ilinniarnertuunngorniartunullu ilassutitut fagitigut ilinniarnertunngoreernermi pikkorissaqqinnissamik pisariaqartitsisalersinnaassalluni.

Tamanna aamma naalakkersuisut ilinniartitsinermut 2024-mit 2030-mut periusissiaanni nalunaarsorneqarpoq.

Suliniutit kommuninut allanut iluaqutaasussat Kommuni Qeqertalimmulli akornutaasussat sammineqaraangata, kommunini illersortuassallugu Simigaq Heilmannip nassuerutigaa. Suliarli tamanna paasiuminaatsillugu oqarpoq.

- Ilinniarusullutik qinnuteqartartut ima amerlatigisimagunik allaat Aasianni inissaqaratik taamatut pilersaaruteqarneq paasilluarsimasinnaassagaluarpara. Kisianni pissutsit massakkut allaapput, borgmesteri oqarpoq.

Nunatinni ilinniarnertuunngorniarfinni sisamani ilinniarlutik aallartittut 580-iusinnaasut nassuiaammi allaqqavoq. 2014-illi 2020-llu akornanni aallartittut taama amerlatigineq ajortut allaqqavoq. Taamaammat maanna inissat naammattut inerniliunneqarpoq.

Aamma ilinniarnertuunngorniarfinni najuullutik ilinniarniarlutik qinnuteqartut ungasianit atuartitsisarnerup periarfissaalerneranit ikilisimasut, Simigaq Heilmannip erseqqissaatigaa.

Aasianni GUX 2011-imi allilerneqarpoq, Simigaq Heilmannillu 2019-imi nutaanik kollegialiortoqarnera eqqaasitsissutigaa. Tamanna siunissamut aningaasaliinertut paasivaa.

- Naalakkersuisut Aasianni GUX-ip siunissami ingerlaannarnissaanut ineriartortinnissaanullu pilersaaruteqarsimassasut isumaqarpunga, Simigaq Heilmann oqarpoq.