Isornartorsiuineq taamaatitsinerlu: Peter Olsen oqallinnermi Siumumit naveerneqartoq

Ilinniartitaanermut naalakkersuisoq, Peter Olsen (IA) Doris J. Jensenimit (S) illuatungiliuttunillu naveersippoq.

Inatsisartut ataatsimiittarfianni pingasunngornermi ualikkut oqallinneq sakkortulaarpoq. Allaat illuatungiliuttunit ilinniartitaanermut naalakkersuisumut tatiginnikkunnaartoqangersaarlluni. Taamaattoqanngilarli.

Inatsisartut Siumumit siunnersuut oqallisigaat. Siunnersuut Aasianni ilinniarnertuunngorniarfik sunnerneqarani Ilulissani ilinniarnertuunngorniarfeqalernissaanut qanoq iliortoqarsinnaaneranut Naalakkersuisunit misissuisoqarnissaanut tunngavoq.

Siunnersuut ilinniartitaanermut ataatsimiititaliamut suliassanngortinneqarnissaa partiit tamarmik isumaqatigiissutigaat.

Ilinniartitaanermut naalakkersuisulli Aasianneersup, Peter Olsenip Ilulissani campuseqalersikkusunngilaa. Taassuma siunnersuut itigartikkusunneruaa.

Nammineq aningaasassarsiussaasi

Ilulissani campusimik pilersitsinissaq akisuallaassasoq Peter Olsenip oqaaseqartarfimmit nassuiaatigaa:

- Ilulissani GUX-eqassagaluarpat kollegiallu atuarfillu tamaat ataatsimut sananeqarnerani milliardit affaanik minnerpaamik akeqartussaavoq, aningaasarparparujussuit soorunami nassaarisariaqarpasi, neriuppungalu ilissi Inatsisartut taanna ilissinniippoq akisussaaffik, taamaliorniarussi milliardit affaanik aamma nassaarisariaqarpasi. Taassuma saniatigut soorunami aamma eqqarsaatigisariaqarparsi Qaqortoq mittarfittaartikkusupparsi, taanna akuersaarnikuuvarsi nalunngilaralu minnerpaamik 414 millioninik minnerpaamik nassaarniartussaallusi, neriuppungalu taakkua soorunami nassaariumaarisi, 414 millionit minnerpaamik.

- Taassuma saniatigut naluneqanngitsutut Nuummi aamma Ilulissani mittarfissualiornermut atatillugu minnerpaamik 900 millioninik sippuisoqartussaavoq. Taavalu Qasigiannguani, Aasianni Nuummilu erngup nukingani tunngatillugu annertusaanissamut sanaartornissaq taanna milliardippaalunnik naleqartussaavoq.

- Kissaateqartoqarporlu Saviminilerinermik Ilinniarfiup Nuumminngaanniit Sisimiunut nuunneqarnissaa, aningaasarpassuarnik nalilinnik. Taamaattumik soorunami neriuppunga tamakku tamarmik takorluukkat sinnattullu tamarmik piviusunngorsinnaasut aamma ilissi aningaasanik tikkuussisinnaasariaqarpusi suminngaanniit taakku aaneqassanersut.

Siumumit Vivian Motzfeldtip Peter Olsen tupigusuutigaa, ingatsippallaarsoralugulu.

- Paatsuungasorujussuuvunga maani inatsisartut aalajangiisarneri aallaavigalugit Naalakkersuisut sulisussaammata, massakkut qulequttamut oqallitsigiiinnitsinni isumaqarpunga oqallinneq naapeqatigiiffissarsiortumik ingerlanneqassasoq Inatsisartut iluani. Massakkut naalakkersuisutut akissuteqarputit qulequttat naalakkersuisuuffiginngisatit allaat tamaasa ilanngullugit tikkuartorluta imaaliortariaqarluta. Taanna isumaqarpunga pissusissamisuunngittoq, Vivian Motzfeldt oqarpoq.

Peter Olsenip tamanna qanoq oqaaseqarfigissanerlugu nalullugu akivaa. Taassumami kommunit ilinniarfeqarfiillu qulangiinnarlugit aalajangiisoqarsinnaanngitsoq akisuallaassasorlu erseqqissaatigiinnarsoraa.

Siulittaasup tulliata Peter Olsen unitsinniaraluaraa

Nivi Olsen tamatuma kingorna Peter Olsenimut oqaaseqaateqarpoq.

- Aallaanngiivikkami suna tamaat aporfilersorit. Aamma tupigilaarpara taanna oqarnerit aningaasat suminngaanniit piniarnerigut, eqqaarmaqqissaarakku oqarnikuusutit Inatsisartutut inissisimallutit Naalakkersuisut taanna niaqorluutigissarivaat.

Tamanna Peter Olsenip narrutsassimasumik akissuteqarfigaa:

- Illit oqaaseqaatinnut Aasiammiuluarneq Aasiammiuluarpalaartumik Aasiaat illoqarfik pikkunaatsoq nuanniitsoq taanna pillugu oqariartorneq taanna akuersaannginnakku.

Taassuma Nivi Olsenip ilinniartut Aasianni ilinniarnatik Ilulissani ilinniarusunnerunerannik oqallinnermi siusinnerusumi oqaaseqarsimanera innersuussutigaa.

Inatsisartuni siulittaasup tullia ataatsimiinnermilu aqutsisup, Jess Svanep Peter Olsen oqaluttoq unitsinniaraluarpaa. Naalli Jess Svane sianimik sianertitsilluni uneqqusigaluartoq Peter Olsen uninngilaq.

Naalakkersuisup oqalukkunnaannginnermini oqaatiginiakkani naaqqaarpaa.

- Oqallinnermi akiniaasaqattaarneq pissanngilaq, oqallinnermi apeqqutigineqarpoq uani aattaannguaq oqaaseqarfigissagit. Taanna uani oqaaseqartumik oqaatigineqanngilaq, Jess Svane oqarpoq.

Peter Olsen utoqqatserpoq oqaatsinilu uterteqqillugit.

Jess Svanep tamanna unikkallarnissamut pissutissaliisoraa.

Doris J. Jensen naveersisoq

Unikkallarnerup kingorna Doris J. Jensen oqaaseqartarfimmit Peter Olsenimut isornartorsiuivoq:

- Illuatungiliuttuni maani killissamik qaangeerujussuartut naalakkersuisoq isigivarput. Tamannalu tamatta akuerisinnaanngilluinnarparput.

- Eqqunngittumik paasissutissiisoqarpoq ataasiinnaangitsumik, aamma ataqqinninngittumik Inatsisartunut pissusilersortoqarpoq, kisianni illuatungiliuttuni pissuserissaarusuppugut, aamma isumaqanngilagut maannakkut uppisitsissalluta, kisianni kissaatigivarput, sakkortuumik ataqqeqatigiilluta maani sulineq ingerlateqqissagipput aamma ataatsimiitsitaliami.

- Taamaammat illuatungiliuttuninngaanniit qingaliivugut takisoorujummik.