Borgmesterip isornartorsiuineq akissuteqarfigaa: - Kommuni ineriartorpoq

Innuttaasut 418-it.

Kommune Qeqertalik ukioq 2017-imi pilersinneqarmalli maannamut qimallugu nuuttut taama amerlissuseqarput.

Kommune Qeqertalimmilu innuttaasut 6.082-iinnanngorput, aatsaallu taama ikitsigipput.

Najugaq qimannagu ilinniarusunnerulerneq

Borgmester Ane Hansenip (IA) oqarnera naapertorlugu tamanna marlunnik pissuteqarluarpoq:

- Illoqarfiit minnerit sinerissamilu nunaqarfiit allat assigalugit nunatsinni sanaartorfiunerusunut Nuummut Ilulissanullu ullumikkut nutserartoqarpoq, Ane Hansen siullertut tunngavilersuivoq, Nunattalu Naatsorsueqqissaartarfianit kisitsisit innersuulllugit.

GUX-imi ilinniartoqassutsip Aasianni innuttaasut amerlassussaannik aappaattut sunniuteqarnerarpaa.

GUX-imi ilinniartut ukiuni kingullerni borgmesterip oqarnera naapertorlugu ikiliartuinnarsimapput, ilinniartullu inersimasut ukiuni marlunni piareersarluni ilinniaffinnik ingerlatsinertik digitalimik ingerlakkusunnerulersimallugu.  

- Ilaqutariit meerartallit Aasiannut nuukkajunnerusarput. Inoqarnerulersitsikkajuppullu. Angerlarsimaffinnili digitalimik ilinniarsinnaalernerup inoqassuseq sunnertarpaa, Ane Hansen oqarpoq.   

Taassuma nunatsinni politikerit Siumumeersut Ilulissani GUX-eqalernissaa kissaatigisaat aalajangiunneqassagaluarpat, Aasiaaat ilinniarfeqarfiit illoqarfiattut isigineqarunnaarsinnaanera inukinnerulersinnaaneralu ernummatigaa.

Siunissaq qaamavoq

Kommunimi aporfissaqaraluartoq siunissamilu inukinnerulersinnaagaluartoq, borgmesterip siunissaq suli qaamasuutut isigaa, siunissamilu qanittumi inoqarnerulissangatillugu.

- Aasianni Qasigiannguanilu erngup nukissiorfiliortoqalereerpoq, 100-nillu suliffissaqartitsisinnaalluni, Ane Hansen oqarpoq.

Inukinnerulernera ilutigalugu akileraarutitigut kommuni isertitakinnginnerulersimanngitsoq borgmesteri aamma oqaluttuarpoq:

- Kommunip akileraarutitigut isertitai 2018-imiit maannamut 33,5 milliuunit koruuninik amerleriarsimapput. Kommuni ineriartorfiuvoq, inuussutissarsiornikkullu ukiuni tulliuttuni inerisaanerorusoqaagut.

Aqutsineq illuatungiliuttunit isorineqarpoq

Borgmesterip tullersortaa, Siumumilu kommunalbestyrelsep gruppiata siulittaasuata Aqqa Samuelsenip kommunip aqunneqarnera pillugu qanittumi isorinnippoq.

Innuttaasut qanimut oqartussaatineqarlutik tusaaneqarnissaat kalaallillu ileqqui piorsarsimassusiilu neriorsuutigineqartutut naleqqussarfigineqarsimanngitsut innersuutigalugu.  

- Innuttaasut misigisimapput qanimut oqartussaaqataasoqanngitsoq. Kommunip innuttaasut tusarnaanngilai. Kommunimut saaffiginninnerit maalaaruteqarnerilluunniit akissuteqarfigineqarneq ajorput, qimataasutullu arlariitsigut misilersitsivoq, Aqqa Samuelsen oqarpoq.

Borgmesterilli tamanna ingasaassinerunerarpaa. Kommuni innuttaasunik peqataatitsinerarpaa:

- Kommuni tamakkerlugu suleqatigisagullu meeqqanut siunnersuisoqatigiiliorpugut. Kommunilu tamakkerlugu suleqatigisagullu aamma utoqqarnut siunnersuisoqatigiiliuleruttorpugut. Illoqarfinni tamani sumiiffimmi siunnersoqarpoq. Ukiumullu arlariarluni kommunalbestyrelsi tusarniaatitsisarpoq, taamaaliornikkut innuttaasut peqataatinneqarput, borgmesteri oqaluttuarpoq.   

Allaaaserisalli naammassineqannginnerani ilinniartut ikileriartornerat pillugu Aasianni borgmesterip oqaasii GUX-i uppernarsaanissaminut periarfissaqarsimanngilaq.