Inuit Qeqertalimmiit aallakaasut: - Annertuumik kingunerluuteqarsinnaavoq
Sunaana pillugu inuit Kommune Qeqertalimmiit noorartut?
Sooruna Kommune Qeqertalimmut nuuttoqarusunngitsoq?
Kommunalbestyrelsimi illuatungiliuttuni, Siumup gruppiani siulittaasoq, Aqqa Samuelsen kommunimi innuttaasoqassutsip ikileriangaatsiarnerata kingorna taama apeqquteqarpoq.
Qeqertalimmi innuttaasut maanna 6.082-iupput, innuttaasullu taama ikitsiginikuunngisaannarput.
Kommunip 2017-imi pilersinneqarnerani innuttaasut 418-inik tassa 6,5 procentiisa missaannik ikilipput.
Taassumali taama ineriartortoqarneranut suna pissutaasoraa?
- Kommune Qeqertalik aqutsinikkut nutaaliorfiusoq, allaffissornikkut pisariitsoq, innuttaasunut qanilaartoq peqataatitsisoq, saaffigiuminartorlu, kalaallit ileqqutsinnut, kulturitsinnut inooriaasitsinnullu naleqquttussatut siunnerfigisaq isumaqarpunga tamanna piviusunngortinneqanngitsoq, Aqqa Samuelsen KNR-imut oqarpoq.
Kommunip suliassaq kivinngikkaa
Taassuma naalakkersuisoqatigiit IA-p siulittaasuuffigisaasa innuttaasut tusaaniarnissaannik aamma kalaallit ileqquinut kulturiannullu naleqqussagaasunik inuit sunniuteqaqataanissaannut neriorsuutitit eqquutsissimanngikkaat innersuussutigaa.
- Inuit ataasiakkaat qanimut sunniuteqarsinnaasutut misigisimanngillat. Kommunip innuttaasut tusarnaanngilai. Kommunimut saaffiginnikkaanni naammagittaalliuteqaraanniluunniit akisoqarneq akorpoq, taamaammat sorpassuartigut qimarratigisaasutut misigisimasoqarpoq, taanna oqarpoq.
Inuit kommunimit noorartut ernumanarluinnarpoq. Kommunimi naggaterpaani akiliuteqartussaassasoq, Aqqa Samuelsen isumaqarpoq.
- Inuit inuiaqatigiinni nukiit ingerlatseqataasussat aammalu isumalluutivut tassa amigaatigineqalersinnaanerat taanna aarlerinartutut oqaatigisariaqarpoq. Kommune innuttaasunik amigaateqaliinnarani akileraartartunit isertitanik aamma amigaateqalissaaq. Kommunilu taamaalilluni isumalluutinik nukinnillu inuiaqatigiit ingerlanissaannut aamma amigaateqalissalluni.
Kommune Kujallermi innuttaasut aamma ikiliartorput. Ukiut arfinillit ingerlaneranni innuttaasut 7 procentit missaannik ikilipput.
Kommuneqarfik Sermersuumili innuttaasut piffissami tassani 6 procentimik tassa 1.500-it missaannik amerlillutik.
