Avannaata Kommuniani IA-p Peter Olsen akerlileraat: Pissusilersuutit paasisinnaanngilarput

Aasianni ilinniarnertuunngorniarfik sunnerneqarani Ilulissani ilinniarnertuunngorniarfeqalersinnaava?

Apeqqut taanna Siumumit Doris J. Jensenip Naalakkrsuisunit misissortikkusuppaa.

Inatsisartuni partiit tamarmik siunnersuutip ilinniartitaanermut ataatsimiititaliamut ingerlateqqinneqarnissaa isumaqatigiissutigaat.

Avannaata Kommuniani kommunalbestyrelsini Inuit Ataqatigiit ilaasortaat pissanngallutik malinnaapput.

IA-miimmi Bendt B. Kristiansenip Ilulissani ilinniarnertuunngorniarfeqalernissaa isumatsialaasoraa.

- Ilulissani Inuit Ataqatigiit Ilulissani GUX-imik pilersitsinissamut piareersarneq pissusissamisuuginnartutut isumaqarfigaarput, pingaartumik Aasianni GUX-ip pitsaassusaanut tinguneqarnissamullu toqqammavissanut allannguutaanngitsumik qulaajaanissamik siunertaqarmat, Bendt B. Kristiansen tusagassiuutinut nalunaarummi oqarpoq.

- Siunnersuut Iluliarmiorpassuarnit ukiuni arlalinni kissaatigineqartoq ataatsimiitialiamut suliarineqartussanngortinneqarmat qujassutingaarput, neriulluinnarpugullu kiisami Ilulissani GUX-mik pilersitsisinnaanermut alloriarnerit siulliit kiisami pilersut.

AAMMA ATUARUK Isornartorsiuineq taamaatitsinerlu: Peter Olsen oqallinnermi Siumumit naveerneqartoq

Bendt B. Kristiansenip parteeqatini ilinniartitaanermullu naalakkersuisoq, Peter Olsen aamma isornartorsiorpaa. Taassuma Peter Olsenip pingasunngornermi sammisamut tunngatillugu oqallinnermi oqaatigisai oqaaseqarfigisariaqarsorai, Bendt B. Kristiansen oqarpoq.

- Siullermik Naalakkersuisoq Peter Olsenip oqaluttarfimmiinnermini inatsisartunut pissusilersornera paasiuminaappoq, pissusissamisuuginnarlunilu Inatsisartut Siulittaasuanit inissinneqarmat.

Naalakkersuisup illuatungiliuttullu akornanni oqallinneq sakkortooq

Siunnersuummi pillugu pingasunngornermi oqallittoqarmat oqallinneq sakkortusivoq.

Ilinniartitaanermut naalakkersuisummi siunnersuut itigartitsissutigineqartariaqarsoraa.

Peter Olsenip (IA) Aasianni ilinniarnertuunngorniarfimmut tamanna kingunerluuteqangaatsiassasoralugulu ilinniarnertuunngorniarfiullu saniatigut ilinniartut ineqarfiinik sanaartornissat akisuallaassasoralugit.

Taassuma tamanna minnerpaamik milliardit affaanik akeqassasoq nalilerpaa.

Naalakkersuisullu Avannaata Kommunia ilinniarfeqarfillu qulangerlugit aamma aalajangeerusunngitsut oqaatigaa. Ilulissani GUX-eqassanersoq taakku namminneq pilersitsillutik aalajangiissasut, Peter Olsen isumaqarpoq.

Inatsisartut pilersitsinissamut namminneq aamma aningaasassarsiussasut aamma isumaqarpoq.

Nivi Olsenip tamanna annertuallaalersoraa, Peter Olsenillu siunnersuummut akornutaasinnaasut kisiisa ujartorarai isumaqarpoq, Peter Olsen tamatuma kingorna kamaammerpoq, akeqqillunilu:

- Illit oqaaseqaatinnut Aasiammiuluarneq Aasiammiuluarpalaartumik Aasiaat illoqarfik pikkunaatsoq nuanniitsoq taanna pillugu oqariartorneq taanna akuersaannginnakku.

Inatsisartuni siulittaasup tullia, Jess Svane tamatuma kingorna unitsitsivoq.

Sammisamik eqqartuineq Siumumit Doris J. Jensenip ilinniartitaanermut naalakkersuisumut, Peter Olsenimut qingaliineranik inerneqarpoq. 

- Eqqunngittumik paasissutissiisoqarpoq ataasiinnaangitsumik, aamma ataqqinninngittumik Inatsisartunut pissusilersortoqarpoq, kisianni illuatungiliuttuni pissuserissaarusuppugut, aamma isumaqanngilagut maannakkut uppisitsissalluta, kisianni kissaatigivarput, sakkortuumik ataqqeqatigiilluta maani sulineq ingerlateqqissagipput aamma ataatsimiitsitaliami.

- Taamaammat illuatungiliuttuninngaanniit qingaliivugut takisoorujummik.