Tasiilami ilinniarfissaqalernissaa - Eino Taunajiip qilanaaraa
Tasiilami ilinniaqqiffiusinnaasumik pilersaarusiortoqarnissaanut tunngatillugu inatsaisartut siunnersuutaat akuerineqarnikuuvoq. Tamannalu 1 millionit koruuninik aningaasaliiffigineqartoq aningaasanut inatsisissatut siunnersuummi atuarneqarsinnaavoq.
Ilinniarfiusinnaasorli qanoq ittorpiaassanersoq suli ilusilersorneqanngilaq, najugallillu suleqataatinneqassasut ilinniartitaanermut naalakkersuisoq oqarpoq.
Tasiilami ilinniarfiusinnaasumik pilersitsisoqarnissaanut 1 millionit koruunit inatsisartut akuersissutiginikuuaat.
Ilinniarniarfiusinnaasorli sorpiaassanersoq maanna ilusilersorneqarnissaa, ilinniartitaanermut naalakkersuisup, inississussallugu siunniuppaa.
AAMMA ATUARUK Aningaasanut inatsisissaq sukannerfiusorujussuussaaq – meeqqalli inuusuttullu qitiutinneqassapput
- Siorna uku naalakkersuisooqatigiit nutaat pilersinneqarmata, Tasiilami arlaatigut ilinniariaqqiffiusinnaasumik pilersitsisoqartariaqarnera qinnutigineqarlunilu ujartorneqartoq takusinnaavarput. Taamaammat suleqatigiissitamik pilersitsinikuuvugut, Peter Olsen oqarpoq.
- Aamma pingaartipparput Tasiilarmiut peqataatinneqarnissaat taamaalilluta suliap ingerlaqqinnissaanut aamma taakku ilaatinneqassapput.
Ilinniarfiusinnaasorli sorpiaassanersoq inatsisartuni ilaasortat naalakkersuisullu assigiinngitsunik isummerfigaat.
Efterskoleqalernissaa siunnersuutigineqartoq
Tunumeersut inatsisartunut ilaasortat, Inuit Ataqatigiinneersup Harald Biancop, aamma Siumumeersup Mala Høy Kukop, aningaasat Tasiilami efterskoleliortoqarnissaanut atorneqarnissaat siunnersuutigaat.
Naalakkersuisorli aamma allamik siunertaqarpoq.
- Efterskole ilinniaqqiffiunnginnamik, Inatsisartut aalajangernerat ataqqivagut kisianni naalakkersuisuniit pingaartipparput Tasiilami ilinniaqqiffiusinnaasumik pilersitsisoqarnissaa.
AAMMA ATUARUK Illuatungiliuttut: Aningaasanut inatsissatut siunnersuummi nutaaliortoqanngilaq
- Taamaattumik taakku assigiinngitsut marluk suliat ingerlatissavagut, ilinniartitaanermut naalakkersusoq, Peter Olsen oqarpoq.
Tamanna ersarinnerusumik inernilerniarlugu suleqatigiissitat suliaat aallaavigalugit qanorpiaq suliassaq isikkunikkumaassanersoq paasinarsissasoq naalakkersuisoq ilisimatitsivoq.
Eino pingasoriarluni Tasiilamut utiinnarnikuusoq
Oqartussat Tasiilami ilinniaqqiffiusinnaasunik sulissuteqalernerat inuusuttunut neriulersitsivoq.
- Tusarluarnaqaaq, qilanaarnaqaaq aamma neriuuteqarnaqaaq, Eino Taunajik, piviusulersaarummik Tsumumi suleqataasutut ilisarisimasarput KNR-imut oqarpoq.
Taanna nammineerluni Qeqqani ilinniarnertuunngorniarfimmi pingasoriarluni aallartittaraluarpoq, nunagisanilu qimaqqangaarsinnaannginnamiuk unitsitsiinnartarpoq.
- Imminut assersuutigissaguma tarnikkut peqqissusera aallaavigissagukku aallaqattaarani, kulturit allat naapeqattaarnagit ilinniarsinnaalluni iluarunaqaaq.
Assi: Eino Taunajik
Eino Taunajiip Tasiilami inuusuttoqatini ilisarisimalluaramigit, ilinniarnissap tungaatigut periarfissaqalernissaa aamma qujamasuutigeqaa.
- Eqqarsaatigisinnaasakka amerlapput, kisianni inuusuttut ilinniaqqiffigisinnaasaanni, assersuutigalugu Tasiilami/tunumi takornariat tikerartartut ukiumut amerlasaqaat, taava immaqa takornarialerinerup iluani ilinniarfiliortoqarsinnaavoq.
- Kisianni sunaluunniit ilinniaqqiffiusinnaasoq piulerpat iluassaqaaq. Taamaalillutik inuusuttut ilinniaqqissinnaalerlutik, piumassusineqqillutik iluaqutigissagaluaqaat.
