Illuatungiliuttut: Aningaasanut inatsissatut siunnersuummi nutaaliortoqanngilaq
- Ersarissumik nutaaliortoqanngilaq. Pissusitoqqat nalunngisagut ilaatigut iluaqutaavallaangitsut ingerlatiinnarniarneqarput, Naleqqap siulittaasua Pele Broberg aningaasanut inatsisissatut siunnersuut pillugu oqarpoq.
Aningaasaqarnermut naalakkersuisup Inuit Ataqatigiinneersup, Naaja H. Nathanielsenip, Naalakkersuisut aningaasanut aappaagumut inatsisissatut siunnersuutaat ippassaq marlunngornermi saqqummiuppaa.
Siunnersuut millioninik 71-nik aappaagu amigartooruteqarfiusussatut missingersorneqarpoq.
AAMMA ATUARUK Aningaasanut inatsisissaq sukannerfiusorujussuussaaq – meeqqalli inuusuttullu qitiutinneqassapput
Tamanna Demokraatit siulittaasuata nakeriallaatigaa.
- Amigartooruteqartoq taanna imminermini ajorpoq. Pingaartumik eqqarsaatigigaanni siumut isigisumik politikkikkut nutaaliornermik imaqannginnera, Jens-Frederik Nielsen oqarpoq.
Namminneq tikkuussissasut
Nunatta karsia ima aningaasameertigaaq Inatsisartuni partiit kissaataannut angisuunut aningaasaliinissaq Naalakkersuisunit annikinnerpaaffianiitinneqarusulluni.
Naalakkersuisoqatigiinnersullu Siumukkormiut tamanna nalunngilaat. Siumukkormiulli isumaqatigiinniarnissanut piumasaqanngitsuunngillat. Nunattami inuisa ilaat akileraarutitigut aaqqiivigineqarnissaat kissaatigaat.
Inuit Ataqatigiit Siumukkormiullu aningaasanut inatsisissatut siunnersuummut ilanngukkusutaat ilaatigut makkuupput:
Kikkunnulluunniit oqarasuaatikkut siunnersuisarfik Tusaannga ulloq unnuarlu ammasalissasoq. Taamaaliorneq 2,9 millionit koruuninik akeqassasoq missiliorpaat.
Naalakkersuisut aningaasanik meeqqanut inuusuttunullu tarnikkut nappaatilinnut katsorsaavimmik immikkoortortaqalernissamut aamma immikkoortitserusupput. Tamatuma ingerlanneqarnissaata ukiumut 8,7 millionit koruuninik akeqartassasoq missiliorpaat.
Tasiilami inuusuttunut nutaamik ilinniarfiliornissamut 1 millionit koruuninik immikkoortitsiniarput.
- Sulisartut akissaatikinnerit taavalu akunnattumik akissarsiallit, taakku malunnaatilimmik akileraartarnermut aaqqissuusseqqinneq aqqutigalugu aaqqiivigineqarnissaat kissaatigaarput, Hans Peter Poulsen KNR-imut ippassaq marlunngornermi oqarpoq.
Nunatta inuisa ilaat soorlu inoqutigiit inersimasortaat tamarmik aalajangersimasumik suliffeqaraluarlutik isertitakippallaarnertik peqqutigalugu pissakilliortuusut, ataasiannarani uppernarsarneqareerpoq.
Nunatta aningaasaqarnera sukannerfiusorujussuussagaluarpalluunniit aningaasarpaalunnik nikisitsisoqarsinnaasoq, Hans Peter Poulsen isumaqarpoq. Taamaaliornissamulli piumassuseqarnissaq pisariaqartoq, taanna KNR-imut ippassaq marlunngornermi oqarpoq.
Taamaaliornissamullu ilumut piumassuseqarnersut nalunarpoq. Partiimmi allannguutissatut siunnersuusiulerpata aningaasartassaat suminngaanniissanersut ilanngullugit tikkuassagaat, aningaasaqarnermut naalakkersuisoq siumoortumik ilisimatitsivoq.
Tikkuagassaaleqisut
Demokraatit nunatsinni inuuneq suliffeqarfiuteqarnerlu akikinnerussasoq isumaqatigiinniutigilersaarpaat. Aningaasartaalli suminngaanniissanersut ersarissumik nassuiarnagu.
- Sipaarniartariaqarpugut. Aningaasartuutigut 7 milliardit koruunit missaanniittut sipaarniarfigisariaqarpagut susassaqarfiit assigiinngitsut, Jens-Frederik Nielsen oqarpoq.
AAMMA ATUARUK Siumukkormiut aningaasanut inatsisissamut pingaarnertut kissaataat pingasuusut
Naleqqap inunnut sunniuteqarnerusut isummaminnut naapertuunnerusunngortikkusullugit allanngortinnissaat anguniarniarpaat. Sorpiaalli allanngortikkusunnerlugit qanorlu aningaasalerneqassanersut tiguussaasumik aamma oqaatigisinnaanagu.
- Maannakkut suna tamaat qaqissinnaanngilara qularnannginnami Inatsisartut ataatsimiilluta aallartikkutta ataqatigiissareerutsigit saqqummiussinnaanerussagigut, Pele Broberg oqarpoq.
Inuit Ataqatigiit Siumullu siunnersuutertik piffissami nalorniffiusumi akisussaassuseqarneq eqqarsarluarnermillu qulequtserpaat.