Siumukkormiut aningaasanut inatsisissamut pingaarnertut kissaataat pingasuusut

Aningaasanut 2023-mut inatsisissatut siunnersuut allanngortinneqangaarsinnaanngilaq.

Aningaasaqarnermut naligiissitaanermullu naalakkersuisoq, Naaja Nathanielsen (IA), Naalakkersuisut aningaasanut 2023-mut inatsisissatut siunnersuutaannik ippassaq ataasinngornermi saqqummiussinnginnermini taama erseqqissaavoq.

Nunatta aningaasaqarnera sukannersorujussuarmik aqunneqartariaqarpoq, taamaammat Naalakkersuisut partiit allallu isumaqateqatigiinniarnerminni aamma tukkuittariaqarput.

Siumukkormiullu tukkuittoqartariaqarneranut paasinnittut, Inatsisartut Aningaasaqarnermut Akileraartarnermullu Ataatsimiititaliaanni siulittaasoq Siumumeersoq, Hans Peter Poulsen, oqarpoq.

- Siullertut, mianersortumik aallaaveqarpasinnera, soorunami tupinnanngitsumik nunarsuatsinni pisut taakku aallaavigineqarneri, taanna paasilluarsinnaavarput. 

Siumut: Akileraarutitigut aaqqiisoqarli

Siumukkormiulli isumaqatigiinniarnissanut piumasaqanngitsuunngillat. Nunattami inuisa ilaat akileraarutitigut aaqqiivigineqarnissaat kissaatigaat.

- Sulisartut akissaatikinnerit taavalu akunnattumik akissarsiallit, taakku malunnaatilimmik akileraartarnermut aaqqissuusseqqinneq aqqutigalugu aaqqiivigineqarnissaat kissaatigaarput. Imaanngitsoq akileraarutinut tunngassuteqartut ilanngaatillu ataasiakkaannguit kisiisa aallaaviginagit. Tamakkiisumik ersarissumik malunnaatilimmik aaqqiivigineqarnissaat kissaatigaarput, Hans Peter Poulsen oqarpoq.

Nunatta inuisa ilaat soorlu inoqutigiit inersimasortaat tamarmik aalajangersimasumik suliffeqaraluarlutik isertitakippallaarnertik peqqutigalugu pissakilliortuusut, ataasiannarani uppernarsarneqareerpoq.

AAMMA ATUARUK Aningaasanut inatsisissaq sukannerfiusorujussuussaaq – meeqqalli inuusuttullu qitiutinneqassapput

Naaja Nathanielsenip oqarnera naapertorlugu aningaasanut 2023-mut inatsisissatut siunnersuut akileraarutitigut aaqqiinissamut tunngasortaqanngilaq. Naalakkersuisulli upernaaru saqqummiunniakkaminnik akileraarutitigut aaqqissuusseqqinnialersaarput.

Angajoqqaalli ingammik kisermaat meeraqarnermut tapiissutisinerusalernissaannut meeraqarnermut tapiissutinik nalerisaanissaq aningaasanut inatsisissatut siunnersuummut ilanngunneqassasoq, Naalakkersuisut siunnersuutigaat.

Meeqqat inuusuttullu pillugit suliniuteqarnerup missingersuutinut aappaagumut inatsisissatut siunnersuummi salliunneqarnissaa Naalakkersuisut pingaartikkaat,  Naaja Nathanielsen oqarpoq.

Kissaataat: Sulisartoqarnerulissaaq

Suliffissanik amerlanerusunik pilersitsisoqassasoq, Siumukkormiut aamma kissaatigaat.

Nunatsinni ingammik Nuummi illoqarfinnilu annerni allani suliffissaaleqisut ikipput, kisianni Tunumi Kujataanilu suliffissaaleqisut amerlavallaarput. Tasiilami 18-it 65-illu akornanni ukiullit suliffissaaleqisutut nalunaarsoqqasut juulimi 189-iusut, Naatsorsueqqissaartarfiup kisitsisaataani erserpoq.

Tamannalu iliuuseqarfigineqartariaqartoq, Hans Peter Poulsen KNR-imut oqarpoq.

- Pingaartipparput siunissami suliffissanik ineriartortitsinissap suliassartaa massakkut aamma ersarissumik aningaasanut inatsisissamut aamma ilanngunneqarnissaa. Taamaasilluta ukiuni tulliuttuni amerlanersuni unikaallattoqannginnissaa qulakkeerniarlugu.

Sulisartoqarnerulernissaali sumi sulissutigineqassanersoq, taassuma KNR-imut erseqqissaatiginngilaa.

AAMMA ATUARUK Naalakkersuisut biilinut innaallagiamik ikummatissanillu ingerlasunut akitsuusiiniarunnaartut

Naalakkersuisut aningaasanut inatsisissatut siunnersuut 2023-mi 2024-milu amigartooruteqarfiusussatut 2025-mili 2026-milu sinneqartooruteqarfiusussatut missiliorpaat.

Nunatta aningaasaqarnera sukannerfiusorujussuussagaluarpalluunniit aningaasarpaalunnik nikisitsisoqarsinnaasoq, Hans Peter Poulsen isumaqarpoq.

- Piumagutta piumassuseqaruttalu taassuma iluani nikisitsisinnaanerput annertoorujussuuvoq, Hans Peter Poulsen oqarpoq nangillunilu:

- Mianersorpallaaruttali allanngortitsinavianngilagut. Uagut suliassarivarput sulinermik taavalu annertunerusumik timitaliinermik kingunilimmik aningaasanut inatsimmik piumasaqassalluta.

Utoqqaallu atugarisaannik ingammik soraarnerussutisiaqarnerulersinnerisigut pitsanngorsaasoqassasoq, Siumukkormiut aamma kissaatigaat. Soraarnerussutisiaqarnissamummi aaqqissuussinermik allannguisoqarnissaanik siunnersuut Inatsisartuni upernaaq oqaluuserineqareeraluartoq Siumukkormiullu kissaatigigaluaraat soraarnerussutisianik qaffaasoqanngilaq.

Taamaammat taamaaliortoqassasoq, Siumup siunnersuutigeqqinniarpaa.

- Kingullermik ataatsimiinnitsinni oqaatigaarput naammanngitsumik aaqqiivigilaarneqartut, taanna aallaavigalugu tamakkiinerusumik suliarilluakkamik aningaasanut inatsisissamik aaqqiisoqarnissaa piumasarissavarput, Hans Peter Poulsen oqarpoq.

Inuit Ataqatigiilli Siumullu naalakkersuisoqatigiimmata aningaasanut 2023-mut inatsisissatut siunnersuut pillugu isumaqatigiissasut, Naaja Nathanielsenip ilimagilluinnarpaa.

- Naalakkersuisoqatigiit siunnersuummik itigartitsinissaat massakkorpiaq takorlooruminaatsippara. Inuit Ataqatigiit aamma Siumut aningaasanut inatsisissatut siunnersuummik isumaqatigiinngitsoornissaat ilimaginngilara, taanna oqarpoq.