Naalakkersuisut biilinut innaallagiamik ikummatissanillu ingerlasunut akitsuusiiniarunnaartut
Aningaasaqarnermut naalakkersuisup Naaja Nathanielsenip biilinut inaallagiamik ikummatissamillu ingerlasunut akitsuutip qaffakkiartuaarnissaa upernaaq manna siunnersuutigigamiuk isorineqaqaaq.
Naalakkersuisoqatigiinni partiip aappaa Siumut isornarnartorsiuisunut ilaapput. Naalakkersuisoqatigiinnimi suleqataa tapersiinngiippat siunnersuut akuerineqarnavianngilaq.
AAMMA ATUARUK Naalakkersuisoqatigiit isumaqatigiinngitsut: Siumup akitsuusiiniarneq akerlerigaa
Taamaammat Naaja Nathanielsen siunnersuummik tuniartitsisariaqalerpoq. Tamannalu uggoraa.
- Siunnersuutit politikkikkut tapersersorneqanngitsut ajoraluartumik akuerisariaqarpara. Tamanna uggorigaluarpara, eqqortuusormi isumaqarama. Politikili taamaappoq aamma tamanna tusaatissatut tiguara, Naaja Nathanielsen tusagassiutinut nalunaarummi allappoq.
Innaallagiamik ikummatissanillu ingerlasunik biilinut akitsuutip qaffaneratigut sulinermut ilanngaatip qaffanneqarnissaa taamalillunilu isertitakinnerusunut iluaqutaanissaa siunertaagaluarpoq.
AAMMA ATUARUK IA partiini kisiartaalluni biilinut akitsuut qaffanniarpaa
Tassa akissarsiakinnerusunut akileraarutinik appaanermik kinguneqartussaagaluarpoq.
Akitsuutinilli qaffaanissanut siunnersuutip naalakkersuisunit tunuartinneqarneratigut tamanna pissanngilaq.