IA partiini kisiartaalluni biilinut akitsuut qaffanniarpaa
Siumut politikikkut oqaaseqartartuata Doris J. Jensenip siunnersuut tapersersornagu sapaatit akunerani uani oqaatigaa. Siunnersuummut Siumut kisiartaalluni isumaqataanngilaq.
AAMMA ATUARUK Biilinut akitsuutit nutaat tunuartinneqaqqittut
Demokraatit, Atassut aamma Naleraq siunnersuummut qularput.
- Siullermik patsisigineqarpoq, silap pissusaata allanngoriartorneranut akiuniarnermut silaannarmik mingutitsisumut CO2-mut aniatitsinikinnerunissamut anguniagaqarluni, ullumikkullu biilit nunatsinniittut 1,5 procentiinnaat CO2 tamakkiisoq aniatittarpaat, taamaammat patsisissatut pitsaasuunngilaq, ikkappllarujussuarpoq, Demokraatit siulitaasuat Jens-Frederik Nielsen taama oqarpoq.
Siunnersuummi maanna tusarniaassutigineqartumi, biilit innaallagiamik orsussamillu ingerlatallit akitsuutaasa ukiuni aggersuni qaffakkiartuaartinniarpaat.
AAMMA ATUARUK Naalakkersuisoq: Biilit hybridiusut motorimut akitsuutitakinnerat tunngavissaqarunnarpoq
Biili innaallagissamik ingerlataqartoq naatsorsuutigisamit mingutitsinnginnerunngitsoq Naalakkersuisut isumaqarput, Danmarkimi silap pissusaa pillugu siunnersuisoqatigiit missisuisimanerat innersuussutigineqarluni.
Taamaattumik biilit innaallagissamik orsussammillu ingerlataqartut akitsuutaasaa ullumikkumut sanilliullugu 2026-mi marloriaatinngortinissaat Naalakkersuisut siunnersuutigaat.
- Taamarsuaq akitsuuserneqartariaqannginnami piffissaq ungasinnerusoq eqqarsaatigalugu, orsutortumik annikillisaaniarnermut isumamut assortorami, naak soorunami saqqummiussat allaanerugaluartoq. Aqqalu Jeremiassen Atassut taama oqarpoq.
Biilinut ilanngaatip qaffanneqarnerisigut taakkua isertitakinnerusut akunnattumillu isertitaqartut sulinermi ilanngaataasa qaffanneqarnissaannut atorneqassasut Naalakkersuisut anguniarpaat.
AAMMA ATUARUK Biilinut innaallagiatortunut hybridinullu akitsuutit Inatsisartuni oqaluuserineqassasut
Sulinermi ilaanngaat biilit innaallagissamik orsusamillu ingerlataqartut akitsuutaannit aningaasalersorneqarnissaa pilersaarutaavoq.
Partii Naleqqamillu tamanna eqqarnartoqartinneqarpoq.
Biilinummi ilangaatinit iseritineqartartut maanna aqquserngit aserfallatsaalineqarnerinut iluarsaanneqartarnerinullu atorneqartarmata, siunnersuummi sulinermut ilaanngaammut atorniarneqarnera apeqquserneqarpoq.
- Soorunami allaqqagami tunngavilersuutaani allami, akileraartarnermut aaqqissuusseqqinnisamik isumaqtigiinniartussaalluta, tassunga aningaasalersuiniaramik biiliniit, naak uffami biilinit akitsuutinit qaffaaniaraanni, aqqusinernut assigisaannillu eqqarsaatigineqartariaqartut atornissaat, Pele Broberg oqarpoq imalu aperivoq - biilimmi ikilissappata, taava una neriorsuutaat sumut suminngaanillu tiguneqassagamik? Pele Broberg Naleraq taama oqarpoq.
Inuit Ataqatigiit inatsisartuni gruppeanni siulittaasoq Sermitsiaq.AG-mut oqarpoq, siunnersuut maanna Naalakersuisunit tusarniaassutigineqartoq partiimit akuersaarneqartoq.
Aningaasaqarnermut Naalakersuisoq Naaja H. Nathanielsen KNR-imut oqarpoq, partiit ataasikkaat oqaaseqaataat pillugu maannakkut oqaaseqarniarani.
Tusarniaassutigineqarnerata naammassinissaa taassuma utaqqiniarpaa.
Siunnersuutip tusarniaassutigineqarnera juulip ulluisa arfineq pingajuannut killeqarpoq.
