Naalakkersuisoq: Biilit hybridiusut motorimut akitsuutitakinnerat tunngavissaqarunnarpoq

Biilimik innaallagiatortumik ikummatissatortumillu pigisaqaruit atornissaanut akiliinerusalissaatit.

Tamanna biilit avatangiisinut mingutsitsinnginnerunissaannik aallaqqaammut ilimagineqartutulli naapertuutinnginnerannik Naalakkersuisullu akitsuutit qaffasinnerunerannit aningaasanik suliffeqarnermut ilanngaammut qaffasinnerulersitsiniarnerannik pissuteqarpoq.

Naalakkersuisunit siunnersuut maanna tusarniaassutigineqartoq taama ilaatigut oqaasertaqarpoq.

Biilinut plug-in hybridinut motorimut akitsuutip ukiuni tulliuttuni qaffakkiartornissaa ilaatigut siunnersuutigineqarpoq. Akitsuut taanna ullumikkut 6.554 koruuniusoq 2026-mi 13.000 koruuneqalissaaq. Tassa imaappoq marloriaataanik akeqalissalluni.

Tamannali pisariaqartoq, aningaasaqarnermut naalakkersuisoq, Naaja H. Nathanielsen nassuiaavoq.

- Biili biilitulli allatulli aqqusernginut avatangiisinullu ajortisaataavoq. Taamaattumik taakku (plug-in hybridinik piginnittut aaqq.) aamma akiliissasut isumaqarpugut.

AAMMA ATUARUK Bilforhandler og en plug-in hybridbilejer: Dårlig forslag at hæve afgiften

Naalakkersuisut Danmarkimi Silap pissusia pillugu siunnersuisoqatigiinnit misissuineq siunnersuumminni innersuussutigaat.

Plug-in hybridit biilimit dieselitortumit pitsaasumit mingutsitsinnginnerulissaguni 250.000 kilometerinik ingerlaqqaassasoq misissuinerup takutippaa.

Nunatsinni pinngortitaleriffiup missiliuineratulli biili inuit angallatigisaat agguaqatigiissillugu 5450 kilometerinik ingerlasarpat taava motorimut akitsuutip affasitsinnissaanut tunngavissaqarunnaartoq, Naalakkersuisut oqarput.

- Biilit uku mingutsitsisuunnginnerat pissutigalugu uku (plug-in hybridinik piginnittut aaqq.) aamma akiliisalernissaat pissusissamisoortoq nassuerutigisariaqarparput, aningaasallu tassanga pissarsiarisagut allamut atorsinnaassavagut.

Aningaasallu takku Naalakkersuisut ukiuni tulliuttuni tallimani qaffangaatsiarniagaannut suliffeqarnermut ilanngaammut atorneqassapput.

Tamanna sulinissamut soqutiginarnerulersitsiniarnissamik akileraarutinillu akissarsiakitsunut akunnattumillu isertitaqartunut appartinniarnissaanut isumassarsiamik pissuteqarpoq.

- Innuttaasuni eqimattat ilaannit akissaqarsorisatsinnit tigusissaagut. Pissakinnerpaat isumagissavaugt, taava allat akiliisariaqarput, Naaja H. Nathanielsen oqarpoq.

Biilit innaallagiatortut eqqunngeranut aamma akitsuuserneqassasut

Pilersaarummut tassunga aamma plug-in hybridit biilillu innaallagiatortut eqqunneqarnerannut akitsuummit aamma aningaasaliisoqassaaq.

Deres Automi biilinik tuniniaasartup pisortallu Michael Østergårdip eqqussinermut akitsuuteqalissappat biilinik innaallagiatortunik tunisakinnerusoqalissasoq ilimagalugugu KNR-imut oqaatigaa.

Tamanna inuit biilinut nalinginnaasunut dieselitortunut benzinatortunullu uteqqinnissaannut aamma sunniuteqassasoq taassuma erseqqissaatigaa.

Naaja H. Nathanielsenilli oqarnera naapertorlugu naalakkersuisut biilinut innaallagiatortunut ilaatigut tapiissuteqarnermik immikkut ittumik malittarisassaqarnissaa sulissutigigaat. Tamatuma saniatigut biilit innaallagiatortut motorimut akitsuutikiinnassapput.

- Motorimut akitsuummut akiliuteqartariaqassapput, kisianni taakku eqimattatut akuersortutut isiginiarusuppagut. Taamaammat biilit innaallagiatortut pillugit suli immikkut ittumik malittarisassaqassaaq, naalakkersuisoq oqarpoq.

Biilit innaallagiatortut aamma innaallagissamik ikummatissamillu ingerlasartut tuniniarneqarnerisa akitsuusiisoqarnerani unittoornissaat Naalakkersuisullu taamaalillutik sulinermut ilanngaammut qaffaaniarnerisa aningaasalerniarnissaata iluatsinngitsooratarsinnaaneranut apeqqummut Naaja H. Nathanielsen ima akissuteqarpoq:

- Eqqarsarpunga biilit innaallagiatortut suli pisiarerusunneqassasut, pissutigalugu taakku suli immikkut ittumik isumagineqassammata. Biilinik hybridinik pisisut ikiliartussagunarput. Inuit biilinik avatangiisinut mingutsitsinnginnerusunut nuukkiartornissaat neriuutaavoq, naalakkersuisoq oqarpoq, nangillunilu:

- Tamanna aamma motorimut akitsuummik allannguiniarnermi siunertaavoq, taamaalilluta immikkoortunik arlalinnik biilit sorliit avatangiisinut mingutsitsinnginnerunerannik isiginninnerulersitsisunik peqalissalluta taakkulu aamma akikinnerpaamiissapput.

Inatsisissatut siunnersuutip tusarniaassutigineqarnera juulip ulluisa arfineq-pingajuannut ullulerneqartoq Naalakkersuisut nittartagaani atuarneqarsinnaavoq.