Biilinut akitsuusiiniarneq: Tuniniaasoq tuniniaajunnaassasoq atuisorlu pakatsisoq
Innaallagiamik ikummatissanillu akuleriisillugit ingerlasunik bileqarneq akitsupiloortussanngorunarpoq. Taakkuami motoreqarnerannut akileraarut qaffanneqassasoq, Naalakersuisut inatsisissatut siunnersuuteqarput. Taannalu maanna tusarniutaavoq.
Naalakkersuisut biilit innaallagiamik ikummatissanillu akuleriisillugit ingerlasut naatsorsuutigisamit pinngortitamut mingutsitsinerunerarlugit akitsuerusunnertik tunngavilersorpaat. Biilit taamaattut ukiumut akileraarutaat maanna 6.554 koruunimiippoq.
AAMMA ATUARUK Naalakkersuisut biilit innaallagissamik ikummatissamillu ingerlateqarsinnaasunut akitsuut 13.000 koruuninut qaffakkumavaat
Naalakkersuisulli ukiumut akileraarut 2026-p tungaanut akitsoriartuaarusuppaat. 2026-miillu taanna 13000 koruuninngorusullugu. Tassa ullumi akilertakkap marloriaataa.
Assi: Uno Fleischer.
- Taamatut kusanaakujuppoq, kusanaappoq. Inuit ussassaariarlugit mingutsitsinngitsunik biilisisinnaavusi, taava afgiftianut akiliissanngilasi. Kisianni ukiualunnguit qaangiutiinnartut akileeraarluta aallartippugut, Taamak ittunik biililik, Uno Fleischer, KNR-mut oqarpoq.
Taannaanaq akitsorneqalersaanngilaq. Biilit taamaattut nunatsinnut eqqussornerat aamma akisunerulersikkusuppaat. Eqqussornerat maanna akeqanngilaq. Akeqalissappat nunatsinnut eqqunnerinnaa 50.000 koruuneqassaaq, taassumalu saniatigut biili 75.000 koruuninit nalituneruppat 90 procentinik aamma akitsuuserneqassaaq.
200.000 koruunimik akitsussasut
Deres Auto, innaallagiamik ikummatissanillu akuleriisillugit innaallagiaannarnillu ingerlasunik Nuummi tuniniaasuuvoq. Taakkua tunisamik 90 procentii taamaattuusut pisortaq oqarpoq.
Inatsisissatulli siunnersuutit akuersissutigineqassappata taamaattunik tuniniaajunnaassalluni pisortaq aalajangereerpoq. Biilimmi taamaattut 200.000 koruunimik akitsortariaqassagini, taamaalippallu pisinissamut inuit akissaarutissasut taanna isumaqarpoq.
- Biilit innaallagiamik ikummatissanillu ingerlasut aamma innaallagiaannarmik ingerlasut tuniniarunnaassavagut, dieselimillu benzinamillu ingerlasunut uteqqilluta, Michael Østergård oqarpoq.
Taassuma orsussamik atuisuinnarnik tuniniaaqqilersinnaaneq ajornartorsiutaasutut nalilerpaa.
-Inuiaqatigiinnut ajoqusiisoq isumaqarpunga, tassami biilit dieselitortut aamma benzinatortut taarsiullugu eqqussorneqaqqilissapput, innaallagiaq nammineq nunami pilersitarput atorunnaarlugu.
Nunatta Naatsorsueqqissaartarfia naapertorlugu biilit nunatsinni inaaallagiamik ikummatissanillu akuleriisillugit ingerlasunik siorna 554-pput. Hybridinnarmillu ingerlasut 71-llutik.
