Naalakkersuisut biilit innaallagissamik ikummatissamillu ingerlateqarsinnaasunut akitsuut 13.000 koruuninut qaffakkumavaat
Ukiuni kingullerni nunatsinni biilit innaallagissamik ingerlatillit amerliartorusaarput. Biilinut taamaattut biilinut ikummatissatortunit akileraarutikinnerunerat amerliartornerannut pissutaaqataavoq.
Biilit innaallagissamik ingerlatillit avatangiisinik mingutsitsinnginnerusutut qinigassaagaluarlutik taamaattoq avatangiisinut pitsaanngequteqarput.
Naalakkersuisut inatsisissatut siunnersuutaanni maanna tusarniaassutigineqaleruttortumi Danmarkimi Klimarådep misissuisimanera innersuussutigineqarpoq. Tassani ilaatigut ima allassimasoqarpoq:
"aniatitsinerit biilinit innaallagiartortunit aamma plug-in-hydridinit pisut taakku atorneqarnerisa nalaanni (sanaartorneqarneranniit isaterisoqarnissaa tikillugu) assersuutigalugu biilinut dieselimik ingerlatilinnut sanilliullugu silap pissusaanut innarliisinnaanerusartut."
Billip innaallagissamik ingerlatilik mikisoq biilimit diesel-itortumit pitsaasumit mingitsitsinnginnerussaguni 50.000 kilometerit ingerlaartussaassavai. Biilillu innaallagissamik ingerlatillip angisuup biilimit diesel-itortumit pitsaamit mingutsitsinnginnerussaguni 100.000 kilometerit ingerlaartussaassallugit. Biilip innaallagissamik ikummatissamillu ingerlateqarsinnaasup 250.000 kilometerit ingerlaartussaassavai biilimit diesel-itortumit mingutsinnginnerussaguni.
AAMMA ATUARUK Biilinut innaallagiartortunut innaalagiamullu nuuttartunut akitsuutit allanngortinnissaat nalorninartoq
Taamaattumik Namminersorlutik oqartussat isumaqarput biilinut innaallagissamik ikummatissamillu ingerlateqarsinnaasunut akileraarutikinnerutitsineq isumaaruttoq.
Biilinut innaallagissamik ikummatissamillu ingerlatilinnut ullumikkut ukiumut akileraarut 6.554 koruuniuvoq.Tamatuma qaffakkiartuaarteriarlugu ukioq 2026-imi ukiumut 13.000 koruuninngornissaa Naalakkersuisut siunnersuutigaat. Assersuutigalugu motorinut ukiumut akileraarut aappagumiit 8.125 koruuninngornissaa siunnersuutigineqarpoq.
Assi: Naalakkersuisut.
Biili innaallagissamik ikummatissamillu ingerlateqarsinnaasoq innaallagiatortumik kiisalu ikummatissamik benziinamik imaluunniit diesel-imik ingerlateqarsinnaavoq. Biileqarporlu tassunga assigusumik, kisianni batteriilimmik, taamaattulllu batteerii immeqqittartuupput. Biilit taamaattut taaneqartarput plug-in hybridbiilit.
Biilit innaallagissamik ikummatissamillu ingerlateqarsinnaasut ikummatissamik orserneqarsinnaapput.
Akitsuutinik allannguinerit suliffeqarnermut ilanngaatip qaffanneqarneranik kinguneqassasut
Biilillu innaallagissamik ikummatissamillu ingerlateqarsinnaasut eqqunneqarnerannut maanna aamma akitsuuteqanngillat, eqqunneqarnerannullu akitsuuteqaqqilissasut Naalakkersuisut kissaatigaat.
Aningaasaqarnermut naalakkersuisoq, Naaja Nathanielsen (IA), siunnersuuteqartuuvoq. Akitsuutinillu allannguinerit suliffeqarnermut ilanngaatip qaffanneqarneranik kinguneqassasut, taanna tusagassiutinut nalunaarpoq.
- Akitsuutinik allannguinerit akileraarutitigut iluanaarutinik qaffaassapput. Iluanaarutit taakku isertitakitsut akileraarutaannik annikillisaanermut atorneqassasut pilersaarutigineqarpoq. Tamanna ilaatigut suliffeqarnermut ilanngaatip qaffanneratigut atulersinneqassasoq pilersaarutaavoq, taamaasiornikkullu ullumimiit marloriaammik qaffasinnerulissalluni.
- Taamaasiornermi akileraarutitigut iluaqutit isertitaqarnerusunut iluaqutaanerusut atorunnaarsillugit isertitakinnerusut akileraarutikinnerulersinnaapput. Tamanna isumaga malillugu akileraarutitigut politikkiuvoq naapertuutiinnanngitsoq aammali minguinnerulersitsisoq.
Nunatta Naatsorsueqqissaartarfia ilisimatitsivoq Nunatsinni 2021-mi Plug-in Hybridbiilit katillutik 554-sut kiisalu biilit nalinginnaasumik innaallagissamik ingerlateqartut 71-iusut.
