Biilinut akitsuutit nutaat tunuartinneqaqqittut
Biilinik innaallagiatortunik brintimilluunniit ingerlatilinnut akitsuunissamut naalakkersuisut inatsisartut ukiaanerani ataasimiinnissaannut atatillugu siunnersuutaat ataasinngornermi ullaakkut tunuartinneqarpoq.
Siunnersuut ippassaq ataasinngornermi aappassaaneerneqartussaagaluarpoq. Biilit innaallagiartortut, brintitortulluunniit hybridilluunniit akitsuusersorneqarnissaat siunniunneqaraluarpoq. Biilit tamakku maannamut akitsuusersorneqanngillat.
AAMMA ATUARUK Biilinut innaallagiartortunut innaalagiamullu nuuttartunut akitsuutit allanngortinnissaat nalorninartoq
Siunnersuutilli itigartitsissutigineqarnissaa, Aningaasaqarnermut Akileraartarnermullu Ataatsimiititaliap isumaqatigiittup innersuussutigaa.
Naalakkersuisoqatigiit tapersersortaat Demokraatit, illuatungiliuttunilu partiit annersaat Inuit Ataqatigiit siunnersuutip immikkoortuisa ilaannut itigartitsipput.
Biilit akitsuusersorneqarnissaannut Naalakkersuisut siunnersuut inatsisartut siorna 2017-imi ukiaanerani ataatsimiinneranni oqaluuserisassanngortikkaluarpaat, upernaakkulli ataatsimiittoqarnissaanut kinguartikkallarlugu. Qinersisoqarnissaali pillugu tamanna taamaatiinnarneqarpoq.
AAMMA ATUARUK Biilinut innaallagiatortunut hybridinullu akitsuutit Inatsisartuni oqaluuserineqassasut
Aqqusinermi atuinermi akitsuutip atorunnaarsinneqarnissaa taamanikkut siunnersuutigineqarpoq, taarsiullugulu liiterimut kilometerinik ingerlasinnaasusia apeqqutaatillugu akitsuusersuisoqarnissaa siunniunneqarluni.
Biilit innaallagiatortut, brintitortulluunniit hybridilluunniit akitsuuserneqannginnerat ukioq manna januaarip aallaqqaataani atorunnaarsinneqartussaagaluarpoq, tamannali aappaagu 2019-imi januaarip aallaqqaataanut kinguartinneqarluni.
Biilinut akitsuusersuinissaq pillugu inatsimmik nutaamik suli atuutilersitsisoqannginnera pissutaalluni biilit akitsuusersorneqannginnerat suli atuutissaaq.
AAMMA ATUARUK Biilinut innaallagiatortunut akitsuusiisannginneq sivitsorneqassasoq
AAMMA ATUARUK Qamutit motoorillit akileraarutaat pillugit siunnersuut kinguartinneqartoq
