Biilinut innaallagiatortunut hybridinullu akitsuutit Inatsisartuni oqaluuserineqassasut
Naalakkersuisut inatsisissatut siunnersuutaat, Inatsisartunut ilaasortat ullumi ataatsimiinnerminni oqaluuserisssavaat.
Biilinut akitsuutit pillugit siunnersuuteqarnermi akitsuut aqqutigalugu avatangiisimut
qajassuussinissaq anguniarneqarneqarpoq. Taamaattumik Naalakkersuisut hybridbilit eqquneqarnerinut akitsuuteqalersinniarpaat.
Piumasaqaat suugaluarpalluunniit, qamutip ingerlat sorleq atorneraa nakkutigineqarnissaanut
ajornakusoorpoq. Qamutip motoori innaallagiatortoq atorneraa qularnarmat, avatangiisinut
sunniutaa aamma qularnarmat, Naalakkersuisut siunnersuuteqarnerminni taama allapput.
Biilinik innaallagiatortunik brintbiiliinillu Kalaallit Nunaannut eqqussuineq annertusivoq taamaatumillu biilinik piginittut
aqqusinernik nungullarsaarnerminni motoorinut akitsuummik akiliisariaqarput.
Naalakkersuisut siunnersuuteqarnerminni kajumissaaruteqarput, biilinik mikinerusunik pisisoqarnerusoqassasoq,
biilinut mikinerusunut akitsuut appartinniarneqarmat, qamutinullu nalitunerusunut akitsuut qaffanniarneqarluni.
AAMMA ATUARUK Sermersooq biilinik innaallagissamik ingerlatilinnik atuilersoq
Tamatuminnga naatsorsuutigineqarpoq, inuit akissarsiakinnerusut biilinik
minnerusunik pisisinnaanissaannut periarfissaq siuarsarneqassammat, Naalakkersuisut siunnersuutiminni taama allapput.
Qamutit motoorillit qimanneqartarnerat ajornarsiuterujussuuvoq, taakkua isaterneqarnissaannut atortussanik ukiumoortunik akiitsuusiisarnissamik Naalakkersuisut atuutilersitsiniarput.
Siunnersuummi snescooterinut qamutinullu minnernut nunakkoorutinut eqqussuinermut akitsuut atorunnaassaaq. Tamanna aalisarnermi piniarnermilu inuussutissarsiortunut immikkut iluaqutaassasoq
naatsorsuutigineqarpoq.
Siunnersuut Partii Naleqqameersumit Pele Brobergimit Aningaasaqanermut Naalakkersuunerata nalaani saqqummiunneqaraluarpoq.
Maannali Partii Naleraq naalakkersuisoqatigiinni ilaajunnaarmat siunnersuut tapersersorneqassanersoq nalunarpoq.
Biilit innaalliagiatortut aamma hybrid kiisalu brintbiilit akiitsuuteqartinneqannginerat utaqqiisaarutaagallartussaagaluarpoq.
Akitsuuteqartinneqannginneralli ukioq nutaaq aallartippat atorunnaasaaq, politikerit allatut aalajangiinngippata.
Inatsisartut ullumi ataatsimiinneranni, ataatsimiititalianut ilaasortanik qinersisoqassaaq, aningaasanullu inatsit siullermeerneqassalluni.
