Sermersooq biilinik innaallagissamik ingerlatilinnik atuilersoq
Bilinik innaallagissamik ingerlatilinnik pissarsisoqarneratigut tamanna anguniarneqarpoq, kommunip biiliinik taarsersuisoqarneratigut CO2-mik aniatitsineq annikillisinniarneqarpoq, biilit innaallagissamik ingerlateqartut amerlinissaat anguniagaalluni.
Kommuneqarfik Sermersuumi Sanarfinermut Avatangiisinullu Ataatsimiititaliap siulittaasua Mille Søvndahl Pedersen, tusagassiuutinut nalunaarummi ilaatigut taama allaaserisaqarpoq.
- Tamanna ersarissarusupparput biilinik innaallagissamik ingerlatilinnik pissarsinitsigut. Biilinik taarsersuinikkut CO2-mik aniatitsineq annikillisinneqassaaq aamma maligassiuissaagut innuttaasut takusinnaalerpassuk, siunissami kommunip biilii amerlanerit innaallagissamik ingerlateqartut, Mille Søvndahl Pedersen oqarpoq.
AAMMA ATUARUK Biilit innaallagiatortut amerlisariaqarsoraat
Biilit taarsersorneqarnerat kommunimut 3 millionit missaannik aningaasartuutaassaaq. Biililli benziinatortut tuniniarneqarnerannit 1 millionit koruunit isertitsissutaanissaat naatsorsuutigineqarpoq, soorlu aamma kommunip aningaasaartuutai ukiumut 330.000 koruuninik ikilisinneqarnissaat aamma naatsorsuutigineqartoq.
Biilit innaallagissamik ingerlateqartut qulit 15-illu akornanniittut pissarsiarineqarnissaat, Sanarfinermut Avatangiisinullu Ataatsimiititaliap siunnersuutigaa, kommunillu allaffiata saavani biilit innaallagissamik ingerlatillit batteriivinut immiisarfeqarnissaa siunniunneqartoq.
Biilinik innaallagiartortunik pissarsisoqarnissaanut siunnersuut Inuit Ataqatigiinnit Demokraatiniillu saqqummiunneqarpoq.
