Biilit innaallagiatortut amerlisariaqarsoraat
Nuummi biilit ullumikkut 3.000-it missaanniipput. Nuummi biilit 80 procentiisa batterinik ingerlateqalersinnaanerinik kissaateqarneq asuliinnaanngitsuusoq, borgmester Asii Chemnitz Narup oqarpoq.
- Ullumikkut biilit Nuummi 3.000-iusut CO2-imik aniatitsineri nipiliornerilu eqqarsaatigalugit, Nuummi najugaqartunut qujanassaqaaq, nunanilumi allanit aamma tusarluarneqassaqaluni, borgmesteri oqarpoq.
Asii Chemnitz Narup-ip, Angallanermut Naalakkersuisoq saamasumik qinnuigaa, biilit innaallagissamik ingerlateqartut tikisinneqarnerannut atatillugu biilillu taamaattut atorneqarnerannut atatillugu, akitsuusiisannginnermut piffissap sivitsorneqarnissaa, politikerinut eqqarsaatigeqqulaarlugu, taamaaliornikkummi biilinik batteritortunik piserusuttut amerlisinnaammata.
- Oqaasiinnaat atornagit piviusunngortitsinissarput Kommuneqarfik Sermersuumi angorusupparput. Suliniummut tamatumunnga siunnersuisussamik atorfinitsitsinissatsinnut piareersimavugut aamma piareersimaffigaarput kommunip biiliutaasa ilaat innaallagissamik ingerlateqalernissaat, borgmesteri Asii Chemnitz Narup neriorsuivoq.
Biilit innaallagissamik ingerlateqartut Nuummi misiutigalugit atorneqartut iluatsilluartutut, innaallagissanik biileqarnerup ulluani ippassaq pisumi oqaatigineqarpoq. Biilit innaallagissamik ingerlateqartut ukiukkut aamma atorsinnaakutsoortut oqaatigineqarluni.
